ରାଇକିଆ,୧୦ା୮(ପ୍ରଦୀପ ବେହେରା): କନ୍ଧମାଳ ଜିଲା ରାଇକିଆ ବ୍ଲକ ଇନ୍ଦ୍ରଗଡ ପଞ୍ଚାୟତର ଢେପାଗୁଡ଼ା ଗ୍ରାମରେ ପୁଣି ଭୂସ୍ଖଳନ ହୋଇଛି। ଏହାକୁ ନେଇ ଗ୍ରାମବାସୀ ଭୟଭୀତ ହୋଇ ରହିଛନ୍ତି। ଗାଁକୁ ସଂଯୋଗ କରିଥିବା କଂକ୍ରିଟ ରାସ୍ତାରେ ଗତ କିଛି ଦିନର ଲଗାଣ ବର୍ଷାରେ ୧୨ ଫୁଟ ଗାତ ସୃଷ୍ଟି ହେବାରୁ ଲୋକେ ଯାତାୟାତ କରୁନାହାନ୍ତି। ସେଠାରେ ୧୫ରୁ ଊର୍ଦ୍ଧ୍ୱ ପରିବାର ରହୁଥିବା ବେଳେ ଆସନ୍ନ ବିପଦକୁ ଦୃଷ୍ଟିରେ ରଖି ୪ ପରିବାରଙ୍କୁ ନିକଟ ହାଇସ୍କୁଲକୁ ସ୍ଥାନାନ୍ତର କରାଯାଇଛି। ବ୍ଲକ ପ୍ରଶାସନ ତରଫରୁ ଗାଁ ପରିସ୍ଥିତି ଅନୁଧ୍ୟାନ କରିବା ସହ ଯୁଦ୍ଧ କାଳୀନ ଭିତ୍ତିରେ ରାସ୍ତା ମରାମତି ପାଇଁ ଜିଲା ପ୍ରଶାସନକୁ ରିପୋର୍ଟ କରଯାଇଛି।
ଅନ୍ୟପକ୍ଷରେ ପାଖାପାଖି ୧୦ ବର୍ଷ ତଳେ ଏହି ଢେପାଗୁଡ଼ା ଗ୍ରାମରେ ସମାନ ରାସ୍ତାରେ ପ୍ରବଳ ଜଳସ୍ରୋତ ଆସି ଭୂସ୍ଖଳନ ସୃଷ୍ଟି ହୋଇ ୧୫ ଫୁଟର ଦୁଇଟି ଗାତ ସୃଷ୍ଚି ହେବା ସହ ରାସ୍ତା ଧସିବା ଆରମ୍ଭ ହୋଇଥିଲା। ଗ୍ରାମବାସୀଙ୍କ ସୁରକ୍ଷାକୁ ଦୃଷ୍ଟିରେ ରଖି ଇନ୍ଦ୍ରଗଡ଼ରେ ଏକ ବିଦ୍ୟାଳୟ ଗୃହରେ ଅସ୍ଥାୟୀ ଭାବେ ସ୍ଥାନାନ୍ତର କରାଯାଇଥିଲା। ପରବର୍ତ୍ତୀ ସମୟରେ ଗ୍ରାମର ଅନ୍ୟ ଏକ ସ୍ଥାନରେ ୧୮ ପରିବାରଙ୍କୁ ଜମିପଟ୍ଟା ଯୋଗାଇଦେବା ସହ ଘର ତିଆରି ପାଇଁ ଆର୍ଥିକ ସହାୟତା ମଧ୍ୟ ଯୋଗାଇ ଦିଆଯାଇଥିଲା। ଇତିମଧ୍ୟରେ ୧୦ ବର୍ଷ ବିତି ଯାଇଥିଲେ ମଧ୍ୟ ଜଣେ ଦୁଇ ଜଣ ପରିବାରକୁ ଛାଡ଼ି ଦେଲେ ପ୍ରଥମ କିସ୍ତି ଟଙ୍କା ନେଇ କେହି ମଧ୍ୟ ଘର କାମ କରିନାହାନ୍ତି। ସେମାନେ ପୁଣିଥରେ ପୂର୍ବ ବିପଦ ପୂର୍ଣ୍ଣ ଜାଗାରେ ହିଁ ରହି ଆସୁଥିଲେ। ବର୍ତ୍ତମାନ ସେହି ସ୍ଥାନରେ ପୁଣି ଥରେ ଭୂସ୍ଖଳନ ଅନ୍ୟତ୍ର ସ୍ଥାନାନ୍ତରକୁ ନେଇ ପ୍ରଶ୍ନ ଉଠିବା ସହ ଏହା ଗ୍ରାମବାସୀଙ୍କ ଚିନ୍ତା ବଢ଼ାଇଛି।
ଏ ନେଇ ରାଇକିଆ ବିଡିଓ ସବ୍ୟସାଚୀ ସାହୁ କହିଛନ୍ତି, ରାସ୍ତା ଓ ସୃଷ୍ଟି ହୋଇଥିବା ଗର୍ତ୍ତକୁ ମରାମତି କରାଯାଇ ସ୍ବାଭାବିକ କରିବା ପାଇଁ ପଦକ୍ଷେପ ନିଆଯାଉଥିବା ବେଳେ ସେମାନଙ୍କର ଅସମ୍ପୂର୍ଣ୍ଣ ଘର କାମକୁ ନେଇ ସମସ୍ୟା ସୃଷ୍ଚି ହୋଇଛି। ପୂର୍ବରୁ ପ୍ରଶାସନ ତରଫରୁ ସମସ୍ତ ସହାୟତା ସତ୍ତ୍ୱେ ଟଙ୍କା ନେଇ ନିର୍ଦ୍ଧାରିତ ସମୟ ମଧ୍ୟରେ ଘରକାମ ନ କରିବା ଯୋଗୁ ଗ୍ରାମବାସୀଙ୍କୁ ଘର ତିଆରି ସହାୟତାକୁ ନେଇ ଅସୁବିଧା ଉପୁଜୁଛି।
