ନୂଆଦିଲ୍ଲୀ,୫।୬: ବୈଭବ ସୂର୍ଯ୍ୟବଂଶୀ IPL ୨୦୨୬ରେ MVP (ମୋଷ୍ଟ ଭାଲ୍ୟୁଏବଲ ପ୍ଲେୟାର) ରହିଛନ୍ତି, ଯିଏ ଅରେଞ୍ଜ କ୍ୟାପ ସହିତ ଆହୁରି ଅନେକ ପୁରସ୍କାର ମଧ୍ୟ ଜିତିଛନ୍ତି। ପ୍ରଥମ ବଲ୍ରୁ ହିଁ ବଡ଼ ସଟ ଖେଳିବାର କ୍ଷମତା ତାଙ୍କୁ ସ୍ବତନ୍ତ୍ର କରିଥାଏ, ଏବଂ ସବୁଠାରୁ ବଡ଼ କଥା ହେଉଛି ସେ ଏଥିରେ ସଫଳ ମଧ୍ୟ ହେଉଛନ୍ତି। ସେ କ୍ୱାଲିଫାୟର୍-୨ ରେ ମଧ୍ୟ ୯୬ ରନ୍ର ଏକ ବମ୍ଫର ପାରି ଖେଳିଥିଲେ, ଯେତେବେଳେ ଅନ୍ୟ ବ୍ୟାଟ୍ସମ୍ୟାନମାନେ ପିଚରେ ତିଷ୍ଠି ପାରୁନଥିଲେ, ସେତେବେଳେ ସେ ବୁଝାମଣାର ସହ ଖେଳକୁ ଆଗକୁ ବଢ଼ାଇଥିଲେ। ଯଦିଓ ତାଙ୍କ ଦଳ ହାରିଯାଇଥିଲା। କୃଣାଲ ପାଣ୍ଡ୍ୟା ତାଙ୍କର ପ୍ରଶଂସା କରି କହିଛନ୍ତି ଯେ ସେହି ପିଲାଟି ପାଖରେ ବୁଦ୍ଧି ଅଛି, ସେ କେବଳ ସ୍ଲଗିଂ (ଅନ୍ଧାଧୁନ୍ଧ ବ୍ୟାଟିଂ) ତ ଆଦୌ କରୁନାହିଁ।
ବୈଭବ ସୂର୍ଯ୍ୟବଂଶୀଙ୍କୁ ମାତ୍ର ୧୫ ବର୍ଷ ବୟସ ହୋଇଛି ଏବଂ ତାଙ୍କ ବ୍ୟାଟିଂ ଦେଖି ଦୁନିଆର ବଡ଼ ବଡ଼ ଦିଗ୍ଗଜମାନେ ଆଶ୍ଚର୍ଯ୍ୟ ହୋଇଯାଉଛନ୍ତି। ଯେତେବେଳେ ତାଙ୍କୁ IPL ପାଇଁ ରାଜସ୍ଥାନ ରୟାଲ୍ସ କିଣିଥିଲା, ସେତେବେଳେ ତାଙ୍କୁ ମାତ୍ର ୧୩ ବର୍ଷ ହୋଇଥିଲା। ଆରମ୍ଭରୁ ତାଙ୍କ ବୟସକୁ ନେଇ ହିଁ ଚର୍ଚ୍ଚା ହୋଇଥିଲା ଯେ ଏହା କଣ ସତ? ସେ କଣ ସତରେ ୧୫ ବର୍ଷର ନା ଏଥିରେ କିଛି ଜାଲିଆତି ଅଛି। କିନ୍ତୁ ଏବେ କେବଳ ବୈଭବଙ୍କ ବ୍ୟାଟିଂକୁ ନେଇ ଚର୍ଚ୍ଚା ହେଉଛି।
ଚାମ୍ପିଅନ ଦଳ RCB ରେ ସାମିଲ ଥିବା କୃଣାଲ ପାଣ୍ଡ୍ୟା ମଧ୍ୟ ବୈଭବଙ୍କ ବ୍ୟାଟିଂ ଦ୍ୱାରା ପ୍ରଭାବିତ ହୋଇଛନ୍ତି, ସେ ମଧ୍ୟ ଆଶ୍ଚର୍ଯ୍ୟ ଅଛନ୍ତି ଯେ ମାତ୍ର ୧୫ ବର୍ଷର ଜଣେ ଖେଳାଳି ଏଭଳି ଖେଳୁଛନ୍ତି। IPL ୨୦୨୬ ମଧ୍ୟରେ କୃଣାଲ ମଧ୍ୟ ବୈଭବଙ୍କ ସାମ୍ନାରେ ବୋଲିଂ କରିଥିଲେ ଏବଂ ତାଙ୍କ ଉଇକେଟ୍ ମଧ୍ୟ ନେଇଥିଲେ। ‘ଟାଇମ୍ସ ଅଫ ଇଣ୍ଡିଆ’କୁ ଦେଇଥିବା ସାକ୍ଷାତକାରରେ କୃଣାଲ କହିଛନ୍ତି, “ହଁ, ଆମର ରାଜସ୍ଥାନ ରୟାଲ୍ସ ବିପକ୍ଷରେ ମ୍ୟାଚ ଥିଲା, ମୁଁ ତାଙ୍କ ଉଇକେଟ୍ ମଧ୍ୟ ନେଇଥିଲି।”
କୃଣାଲ ଆହୁରି କହିଛନ୍ତି, “କିନ୍ତୁ ତାଙ୍କ ପାଖରେ କ’ଣ ପ୍ରତିଭା ଅଛି, ମାତ୍ର ୧୫ ବର୍ଷ ବୟସରେ ଏପରି ପ୍ରତିଭା ରହିବା ଆଶ୍ଚର୍ଯ୍ୟଜନକ। ୨୫, ୩୦ କିମ୍ବା ୪୦ ବର୍ଷ ବୟସରେ ଏପରି ବ୍ୟାଟିଂ କରିବା ପ୍ରଶଂସନୀୟ, କିନ୍ତୁ କେବଳ ୧୫ ବର୍ଷ? ସେ କେବଳ ଅନିୟମିତ ସଟ ଖେଳନ୍ତି ନାହିଁ, ତାଙ୍କର ବୁଦ୍ଧି ମଧ୍ୟ ଅଛି।”
