ଭଣ୍ଡାରିପୋଖରୀ,୨୬।୮(ସ୍ବ.ପ୍ର.): ଭଦ୍ରକ ଜିଲା ଭଣ୍ଡାରିପୋଖରୀ ବ୍ଲକ ୧୬ନଂ. ଜାତୀୟ ରାଜପଥର ପାଳଦାବାଙ୍କଠାରୁ ଯାଜପୁର ଜିଲାକୁ ସଂଯୋଗ କରୁଛି କୋଳିପଦି କେନାଲ ରାସ୍ତା। ଏହି ରାସ୍ତା ଏବେ ମରଣଯନ୍ତା ସାଜିଛି। ରାସ୍ତା ସାରା ଖାଲଖମା ଭର୍ତ୍ତି ହୋଇଛି। ଏହି ରାସ୍ତା ଏକମାତ୍ର ସଂଯୋଗୀକରଣ ବାଇପାସ୍ ରାସ୍ତା ଭାବେ ବ୍ୟବହୃତ ହେଉଛି। ଭଦ୍ରକ ଓ ଯାଜପୁର ଜିଲାର ହଜାର ହଜାର ଜନସାଧାରଣ ଏହି ରାସ୍ତା ଦେଇ ଯାତାୟାତ କରନ୍ତି। ବିଭିନ୍ନ ଭାରି ଯାନ ମଧ୍ୟ ଚଳାଚଳ କରୁଛି। କେନାଲ ବନ୍ଧ ଉପରେ ଉକ୍ତ ରାସ୍ତା ନିର୍ମାଣ ହୋଇଥିବା ବେଳେ ଏହାକୁ ପୂର୍ତ୍ତ ବିଭାଗ ରାସ୍ତା ସହ ସଂଯୋଗ କରାଯାଇଛି। ପ୍ରତ୍ୟେକ ଦିନ ସାଇକେଲ ଓ ମୋଟର ସାଇକେଲରେ ଯାଉଥିବା ସ୍କୁଲ, କଲେଜ ଛାତ୍ରୀଛାତ୍ରୀ ହୁଅନ୍ତୁ କିମ୍ବା ଅଟୋ, ରିକ୍ସାରେ ଯାଉଥିବା ଯାତ୍ରୀ ସମସ୍ତେ ଏହି ସ୍ବଳ୍ପ ରାସ୍ତା ଅତିକ୍ରମ କରିବାକୁ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଖାଲ ଯୋଗୁ ଗାଡ଼ି ଓ ସାଇକେଲରୁ ଚାଳକ ପଡ଼ି ଆହତ ହେଉଛନ୍ତି। ଖାଲଗୁଡ଼ିକରେ ବର୍ଷାପାଣି ଜମିବା ଯୋଗୁ ଗାଡ଼ି ଚାଳକ ଦ୍ୱନ୍ଦ୍ୱରେ ପଡ଼ି ଯାଉଛନ୍ତି। ହେଲେ ମରାମତି ପାଇଁ ବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଉ ନ ଥିବା ସ୍ଥାନୀୟ ଲୋକେ ଅଭିଯୋଗ କରୁଛନ୍ତି। ୪ ବର୍ଷ ତଳେ ଜଳ ସମ୍ପଦ ବିଭାଗ ପକ୍ଷରୁ ପ୍ରାୟ ୪୦ ଲକ୍ଷ ଟଙ୍କା ଖର୍ଚ୍ଚରେ ରାସ୍ତା ମରାମତି କରାଯାଇଥିଲା। ଅଧାପନ୍ତରିଆ ଭାବେ କାମ ହୋଇଥିବାରୁ ରାସ୍ତାଟି ଶୀଘ୍ର ଶୋଚନୀୟ ହୋଇପଡ଼ିଥିବା ଅଭିଯୋଗ ହେଉଛି। ମାଳଦା, ରହଣିଆ, ସରସଦା, କୁରିଙ୍ଗା, ଷୋଳମପୁର, ନପଙ୍ଗ ଆଦି ୬ ପଞ୍ଚାୟତର ଲୋକେ ହଇରାଣ ହୋଇ ଏହି ରାସ୍ତାରେ ଯିବାଆସିବା କରୁଛନ୍ତି। ପ୍ରଶାସନ ଏଥିପ୍ରତି ଦୃଷ୍ଟି ଦେବାକୁ ଶିକ୍ଷାବିତ୍ କାର୍ତ୍ତିକ ସ୍ବାଇଁ, ମୁରଲୀଧର ଦାସ, ହରିହର ଜେନା, ସୀତାକାନ୍ତ ନାୟକ ପ୍ରମୁଖ ଦାବି କରିଛନ୍ତି। ଏ ସମ୍ପର୍କରେ ଜଳସମ୍ପଦ ବିଭାଗ ସହକାରୀ କାର୍ଯ୍ୟ ନିର୍ବାହୀ ଯନ୍ତ୍ରୀ ଶଙ୍କର୍ଷଣ ବେହେରା କହିଛନ୍ତି, କେନାଲ ରାସ୍ତାରେ ଦଶ ଟନ୍ ଓଜନରୁ ଅଧିକ ଯାନ ଚଳାଚଳ ଯୋଗୁ ଏଭଳି ଅବସ୍ଥା ହୋଇଛି। ତେବେ ଖୁବ୍ଶୀଘ୍ର ଏହାର ମରାମତି କରାଯିବ।
