ସାରା ଦେଶରେ କରୋନା ସଂକ୍ରମଣ ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ପ୍ରତ୍ୟହ ସଂକ୍ରମିତଙ୍କ ସଂଖ୍ୟା ୨ ଲକ୍ଷ ପାର କରୁଥିବା ବେଳେ କିଛି ସ୍ଥାନରେ ଡାକ୍ତରଖାନାରେ ରୋଗୀଙ୍କୁ ଭର୍ତ୍ତି କରିବାକୁ ସ୍ଥାନ ନ ଥିବା ନେଇ ଚର୍ଚ୍ଚା ହେଉଛି। କିଛି ସ୍ଥାନରେ ଭେଣ୍ଟିଲେଟରର ଅଭାବ ଥିବା ବେଳେ କିଛି ସ୍ଥାନରେ ରେମଡେସିଭିର୍ ଭଳି ଇଞ୍ଜେକ୍ଶନର କଳାବଜାର ହେଉଥିବା ନଜରକୁ ଆସୁଛି। ଏଭଳି ପ୍ରତିକୂଳ ପରିସ୍ଥିତିରେ ସାବଧାନତା ଅତ୍ୟନ୍ତ ଜରୁରୀ। ଲୋକଙ୍କ ମନରେ ବିଭିନ୍ନ ପ୍ରକାର ପ୍ରଶ୍ନ ଆସିବା ସ୍ବାଭାବିକ। ଆସନ୍ତୁ ସେଭଳି କିଛି ପ୍ରଶ୍ନ ଓ ତା’ର ଉତ୍ତର ବିଷୟରେ ଜାଣିବା:
– ଯଦି ପ୍ରାରମ୍ଭିକ ଲକ୍ଷଣ ଦେଖାଦେଉଛି, ତେବେ ପରୀକ୍ଷା କରାଇନେବା ଉଚିତ କି?
ଉ- ହଁ। ଯଦି ଆପଣଙ୍କୁ ଜ୍ୱର, ସ୍ବାଦ ଅନୁଭବ ନ କରିବା, ଗନ୍ଧ ବାରି ପାରୁନାହାନ୍ତି ଏବଂ ନିଃଶ୍ୱାସ ନେବାରେ ଅସୁବିଧା ହେଉଛି, ତେବେ ତୁରନ୍ତ ଆପଣଙ୍କୁ ଆର୍ଟିପିସିଆର୍ ପରୀକ୍ଷା କରାଇନେବା ଉଚିତ। ଏହାଛଡ଼ା କରୋନାର ନୂତନ ଲକ୍ଷଣରେ ଗୋଲାପୀ ଆଖି, ନାକରୁ ପାଣି ବୋହିବା ଏବଂ ଶ୍ରବଣ ସମସ୍ୟାକୁ ମଧ୍ୟ ଧରାଯାଇପାରେ।
– ଟିକା ନେଇସାରିଛି, ତଥାପି ପରୀକ୍ଷା କରାଇବା ଉଚିତ କି?
ଉ- ଯେଉଁମାନେ ଟିକାର ଦୁଇଟି ଡୋଜ୍ ନେଇଛନ୍ତି ଏବଂ ଦୁଇ ସପ୍ତାହ ବିତିଯାଇଛି, ତେବେ କୌଣସି ଲକ୍ଷଣ ନ ଥିଲେ ପରୀକ୍ଷା କରାଇବାର ଆବଶ୍ୟକତା ନାହିଁ।
– କେଉଁ ପରୀକ୍ଷା କରାଇବା ଉଚିତ, ଆର୍ଟିପିସିଆର୍ କିମ୍ବା ଆଣ୍ଟିଜେନ୍?
ଉ- ଆର୍ଟିପିସିଆର୍ ଗୋଲ୍ଡ ଷ୍ଟାଣ୍ଡାର୍ଡ ଟେଷ୍ଟ। ରାପିଡ୍ ଆଣ୍ଟିଜେନ୍ ଟେଷ୍ଟ ତୁରନ୍ତ ରିପୋର୍ଟ ଦେଇଥାଏ। ଯଦି ଏହା ପଜିଟିଭ୍ ଆସେ, ତେବେ ଏହା କୋଭିଡ୍ ହୋଇଥିବା ସ୍ପଷ୍ଟ କରେ। ହେଲେ ଯଦି ର଼୍ୟାଟ୍ ରିପୋର୍ଟ ନେଗେଟିଭ୍ ଆସେ ଏବଂ କରୋନାର ଲକ୍ଷଣ ରହିଥାଏ, ତେବେ ଆର୍ଟିପିସିଆର୍ ଟେଷ୍ଟ କରାଇନେବା ଉଚିତ।
– ସିଟି ମୂଲ୍ୟରୁ କରୋନା ଥିବା କିଭଳି ଜାଣିବେ?
ଉ-ଆର୍ଟିପିସିଆର୍ ଟେଷ୍ଟରେ ରୋଗୀଙ୍କୁ କରୋନା ପଜିଟିଭ୍ ଅଥବା ନେଗେଟିଭ୍ ହୋଇଥିବା ସିଟି ଭ୍ୟାଲୁ ଆଧାରରେ ନିରୂପଣ କରାଯାଇଥାଏ। ଯଦି ସିଟି କାଉଣ୍ଟ ୩୫ରୁ ଅଧିକ ଥାଏ, ତେବେ ଏହା କରୋନା ପଜିଟିଭ୍ ବୋଲି ବିବେଚନା କରାଯାଇଥାଏ। ହେଲେ ଅନେକ ସ୍ଥାନରେ ଏହାକୁ ନେଇ ଭିନ୍ନ ନିୟମମାନ ରହିଛି। ଅନେକ ଥର ଡାକ୍ତରମାନେ ରୋଗୀଙ୍କୁ ସିଟି ସ୍କାନ ପାଇଁ ପରାମର୍ଶ ଦିଅନ୍ତି।
– କୋଭିଡ୍ର ଷ୍ଟେଜ୍ କ’ଣ କ’ଣ? ଏହା କିଭଳି ନିର୍ଦ୍ଧାରିତ କରାଯାଇଛି?
ଉ- କୋଭିଡ୍ର ଷ୍ଟେଜ୍-୧ରେ ହୋମ୍ କ୍ୱାରାଣ୍ଟାଇନ୍ରେ ଥିବା ରୋଗୀ ଆସିଥା’ନ୍ତି। ସେମାନଙ୍କ ପାଖରେ ଲକ୍ଷଣ ନ ଥାଏ। ସେମାନଙ୍କର ଛାତିର ସ୍କାନ ସ୍ବାଭାବିକ ଥାଏ। ଏହି ଅବଧିରେ ସାମାନ୍ୟ ଜ୍ୱର, କଫ, ତଣ୍ଟି ଦରଜ ଏବଂ ବାନ୍ତି ଭଳି ଲକ୍ଷଣ ଦେଖାଦେଇପାରେ।
ଷ୍ଟେଜ୍-୨ ସମୟରେ ଲଗାତାର ଜ୍ୱର, କଫ, ଛାତିରେ ସଂକ୍ରମଣ ଭଳି ସମସ୍ୟା ଦେଖାଦେଲେ ଆଇସୋଲେଶନ ସହ ଆଇସିୟୁ ଯିବା ଭଳି ଅବସ୍ଥା ଆସିପାରେ।
ଷ୍ଟେଜ-୩ ସମୟରେ ସ୍ବାସ୍ଥ୍ୟାବସ୍ଥା ଅଧିକ ଖରାପ ହେବା ଫଳରେ ହୃଦ୍ଘାତ ଭଳି ସମସ୍ୟା ଦେଖାଦେଇପାରେ। ଏଣୁ ରୋଗୀକୁ ଡାକ୍ତରଖାନାରେ ଭେଣ୍ଟିଲେଟରର ଆବଶ୍ୟକତା ପଡ଼ିପାରେ।
– କୌଣସି ରୋଗୀ ରେମିଡିସିଭର୍ ଇଞ୍ଜେକ୍ସନ ନେଇପାରିବେ କି?
ଉ- ନା। ଏହା କେବଳ ଡାକ୍ତରଙ୍କ ପରାମର୍ଶରେ ନିଆଯାଇପାରେ। ରୋଗୀର ଅବସ୍ଥା ଦେଖି ଡାକ୍ତରମାନେ ଏହାକୁ ନେବାକୁ ପରାମର୍ଶ ଦେଇପାରନ୍ତି। ବିଶେଷକରି ଛାତିର ଏକ୍ସ-ରେ କିମ୍ବା ସିଟି ସ୍କାନରେ ସଂକ୍ରମଣ ଦେଖାଯାଏ ଏବଂ ଭେଣ୍ଟିଲେଟର ଓ ଅକ୍ସିଜେନ ଭଳି ସମସ୍ୟା ଦେଖାଯାଏ, ସେତେବେଳେ ଡାକ୍ତରମାନେ ଏହାକୁ ଆବଶ୍ୟକ ଅନୁଯାୟୀ ବ୍ୟବହାର କରିଥା’ନ୍ତି।
ଟିକା ବ୍ୟତୀତ କରୋନାକୁ କିପରି ଏଡ଼ାଇପାରିବେ?
ଉ- ନିଜକୁ ସୁରକ୍ଷିତ କିଭଳି ରଖିବେ ସେ ନେଇ ଚିନ୍ତା କରନ୍ତୁ। ଘରୁ ବାହାରକୁ ଆସିବା ବେଳେ ସର୍ବଦା ମାସ୍କ ପରିଧାନ କରନ୍ତୁ। ସାମାଜିକ ଦୂରତ୍ୱ ବଜାୟ ରଖନ୍ତୁ।
