ଜୁନାଗଡ,୧୦।୧୦(ଡି.ଏନ୍.ଏ.) – କଳାହାଣ୍ଡି ଜିଲା ଜୁନାଗଡ ବ୍ଲକ ଚାରଭାଟି ପଞ୍ଚାୟତ ସଂକ୍ରିଗୁଡା ଗ୍ରାମକୁ ସଂଯୋଗ କରୁଥିବା ରାସ୍ତା ଏବେ ମରଣଯନ୍ତା ପାଲଟିଛି। ଦୀର୍ଘବର୍ଷ ହେବ ଏହି ରାସ୍ତା ମରାମତି କରାଯାଇ ନ ଥିବାରୁ ଏପରି ସମସ୍ୟା ଦେଖାଦେଇଛି। ଏହାକୁ ନେଇ ଗ୍ରାମବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି।
ଜଙ୍ଗଲ ପାଦଦେଶରେ ଥିବା ଚାରଭାଟି ପଞ୍ଚାୟତ ସଂକ୍ରିଗୁଡା ଗ୍ରାମର ଜନସଂଖ୍ୟା ପ୍ରାୟ ୫ଶହ। ଏହି ଗ୍ରାମକୁ ଯାଇଥିବା ରାସ୍ତାଟି ଦୀର୍ଘବର୍ଷ ହେବ ମରାମତି କରାଯାଇନାହିଁ । ଫଳରେ ରାସ୍ତାଟି ଏବେ ଶୋଚନୀୟ ହୋଇପଡିଛି। ବର୍ଷା ହେଲେ ରାସ୍ତା ଅବସ୍ଥା ସଙ୍ଗିନ ହୋଇପଡେ। ବର୍ଷା ସମୟରେ ରାସ୍ତାରେ ଖାଲଖମା ସହ ଆଣ୍ଠୁଏ କାଦୁଅ ହୋଇଥାଏ। ଫଳରେ ଅତିକଷ୍ଟରେ କେବଳ ଦୁଇ ଚକିଆ ଯାନ ଯାଇପାରୁଥିବା ବେଳେ ଗାଁକୁ ଚାରିଚକିଆ ଯାନ ଆଦୌ ଯାଇପାରେ ନାହିଁ। ଚାରିଚକିଆ ଯାନରେ ଯିବାକୁ ହେଲେ ଗ୍ରାମଠୁ ଦେଢ କି.ମି. ଦୂର ମୁଖ୍ୟ ଛକକୁ ଯିବାକୁ ପଡିଥାଏ। ଏହି ସମୟରେ ଗ୍ରାମକୁ ଆମ୍ବୁଲାନ୍ସ ଆସିପାରୁ ନ ଥିବାରୁ ଗର୍ଭବତୀ, ରୋଗୀଙ୍କୁ ଡାକ୍ତରଖାନା ନେବା ପାଇଁ ରୋଗୀଙ୍କ ସମ୍ପର୍କୀୟ ନାନା ଅସୁବିଧାର ସମ୍ମୁଖୀନ ହୋଇଥାନ୍ତି। ଏହି ରାସ୍ତାଟି ପଞ୍ଚାୟତ ତଥା ବ୍ଲକ ଅଧୀନରେ ଥିଲେ ମଧ୍ୟ ମରାମତି ଦିଗରେ କୌଣସି ପଦକ୍ଷେପ ନିଆଯାଉନାହିଁ। ଏଥିପ୍ରତି ବ୍ଲକ ତଥା ଜିଲା ପ୍ରଶାସନ ଦୃଷ୍ଟିଦେଇ ରାସ୍ତା ମରାମତି କରିବାକୁ ଗ୍ରାମବାସୀ ଦାବି କରିଛନ୍ତି। ତେବେ ଏ ନେଇ ଜୁନାଗଡ଼ ବିଡିଓ ଦୁଲାରାମ ମାରାଣ୍ଡିଙ୍କୁ ପଚାରିବାରୁ ସେ କହିଛନ୍ତି ଯେ, ଅନୁଧ୍ୟାନ କରି ପଦକ୍ଷେପ ନିଆଯିବ।
