ନୂଆଦିଲ୍ଲୀ,୩।୧୨: ଭାରତ-ଅଷ୍ଟ୍ରେଲିଆ ମଧ୍ୟରେ ଦିନିକିଆ ସିରିଜ ଶେଷ ହେବା ପରେ ଏବେ ଟି-୨୦ ସିରିଜ ଉପରେ ସମସ୍ତଙ୍କ ନଜର। ୨-୧ରେ ଭାରତ ସିରିଜ ହାରିବା ପରେ ଏବେ ଟି-୨୦ରେ ଜିତ୍ ହାସଲ କରୁ ବୋଲି ଆଶା ରଖିଛନ୍ତି ପ୍ରଶଂସକ। ଏପରିସ୍ଥଳେ ଦଳର ଓପନିଂ ଫ୍ଲପ ହେଉଥିବା ଦେଖାଯାଉଛି। ଏହାକୁ ଦୃଷ୍ଟିରେ ରଖି ପୂର୍ବ ଅଧିନାୟକ ତଥା ଘୋଷକ ସୁନିଲ ଗାଭାସ୍କର ଖେଳାଳିଙ୍କ ସ୍ଥାନରେ ପରିବର୍ତ୍ତନ କରାଯାଉ ବୋଲି ଦାବି କରିଛନ୍ତି। ଶିଖର ଧଓ୍ବନଙ୍କ ସହ କେଏଲ୍ ରାହୁଲ ପଡ଼ିଆକୁ ଓହ୍ଲାନ୍ତୁ ବୋଲି ସେ କହିଛନ୍ତି।
ତୃତୀୟ ଦିନିକିଆରେ ଭାରତ ଜିତିବା ପରେ ଗାଭାସ୍କର କହିଛନ୍ତି, କେଏଲ୍ ରାହୁଲଙ୍କୁ ଧଓ୍ବନଙ୍କ ସହ ଓପନିଂ କରିବା ଆବଶ୍ୟକ। କାରଣ ୬୭୦ ରନ୍ କରି ଆଇପିଏଲ୍ରେ ଅରେଞ୍ଜ କପ୍ ପାଇଛନ୍ତି ରାହୁଲ। ସେହିଭଳି ଧଓ୍ବନ ମଧ୍ୟ ୬୧୮ ରନ୍ କରିଥିଲେ। ଉଭୟ ଟି-୨୦ ଫର୍ମାଟରେ ଭଲ ପ୍ରଦର୍ଶନ କରିଥିଲେ। ଏଣୁ ସେ ଯଦି ୧୪ ରୁ ୧୫ ଓଭର ପର୍ଯ୍ୟନ୍ତ ପଡ଼ିଆରେ ରୁହନ୍ତି ତେବେ ହାର୍ଦ୍ଦିକଙ୍କୁ ୪ର୍ଥ ଏବଂ ଶ୍ରେୟସଙ୍କୁ ୫ମ ସ୍ଥାନରେ ପଠାଇବା ଉଚିତ ବୋଲି ସେ କହିଛନ୍ତି। ଏବେ ଅଧିନାୟକ ବିରାଟ କାହାକୁ ସୁଯୋଗ ଦେଉଛନ୍ତି ତାହା ବାକି ରହିଲା।
