ଛତ୍ରପୁର,୩ା୧(ଡି.ଏନ.ଏ.): ସରକାରଙ୍କ ପକ୍ଷରୁ ସାମାଜିକ ସୁରକ୍ଷା ଓ ଦିବ୍ୟାଙ୍ଗଙ୍କ ନିମନ୍ତେ ସହାୟତା ଯୋଜନାରେ ଲୋକମାନଙ୍କୁ ଚିହ୍ନଟ କରାଯାଇ ସେମାନଙ୍କୁ ସହୟତା ମିଳିଥାଏ। ସାମାଜିକ ସୁରକ୍ଷା ବିଭାଗ ପକ୍ଷରୁ ୧୩ ଗୋଟି ଯୋଜନା ରହିଛିି। ଯେପରି ବିଭିନ୍ନ ପ୍ରକାରର ପେନସନ ଯୋଜନା, ବାଣିଶ୍ରୀ ବତ୍ତି, ଦୃଷ୍ଟିହିନଙ୍କ ନିମନ୍ତେ ଲାପ୍ଟପ୍, ଡିଆରଆଇ ଲୋନ୍, ମିଶନ କ୍ଷମତା, ବସ୍ ପାସ, ବରିଷ୍ଠ ନାଗରିକଙ୍କ ପାଇଁ ତ୍ରୀର୍ଥ ଯାତ୍ରା ଯୋଜନା, ସ୍ବତନ୍ତ୍ର ବିଦ୍ୟାଳୟ, ବୃଦ୍ଧାଶ୍ରମ, ବୟୋଜ୍ୟୋଷ୍ଠ ସମ୍ମାନ ଯୋଜନା, କିନ୍ନର ଯୋଜନା, ବିବାହ ପ୍ରୋତ୍ସାହନ, ଭିନ୍ନକ୍ଷମ ହିତାଧିକାରୀଙ୍କ ବୃତ୍ତି ଆଦି ରହିଛି। ଏହିସବୁ ଯୋଜନାର ଠିକ୍ ସଚେତନତା କରାଯାଉନଥିବାରୁ ପ୍ରକୃତ ହିତାଧିକାରୀମାନେ ଚିହ୍ନଟ ହୋଇପାରୁ ନ ଥିବା ଜଣାପଡିଛି। କିନ୍ନର ଯୋଜନା ରହିଥିଲେ ବି ଗଞ୍ଜାମ ଜିଲାରେ ଥିବା କିନ୍ନରମାନେ କ’ଣ ସବୁ ସୁବିଧା ସେମାନଙ୍କ ପାଇଁ ରହିଛି ତାହା ସେମାନେ ଜାଣନ୍ତି ନାହିଁ ବୋଲି ଛତ୍ରପୁରରେ ଥିବା କିଛି କିନ୍ନରମାନେ ଅଭିଯୋଗ କରିଛନ୍ତି। ଏପରିକି ବହୁ କିନ୍ନର ରହିଥିଲେ ବି ଏଯାବତ ସେମାନଙ୍କୁ ଜିଲା ପ୍ରଶାସନ ପକ୍ଷରୁ ଚିହ୍ନଟ ମଧ୍ୟ ହୋଇପାରୁ ନାହାନ୍ତି କି ସେମାନଙ୍କୁ ପରିଚୟ ପତ୍ର ମିଳିପାରୁନାହିଁ। ଜିଲାରେ ଏଯାବତ ୨୫୭ କିନ୍ନର ଚିହ୍ନଟ ହୋଇଥିବା ଜିଲା ସାମାଜିକ ସୁରକ୍ଷା ଅଧିକାରୀ କଲ୍ୟାଣୀ ଦାସ ସୂଚନା ଦେଇଛନ୍ତି । ୨୫୭ ମଧ୍ୟରୁ ବ୍ରହ୍ମପୁର ରେ ୬୨ ରହିଥିବା କହିଥିଲେ। କିନ୍ନର ମାନେ ସ୍ବୟଂ ସହାୟକ ଗୋଷ୍ଠୀ ସଂଘ କରି ସେମାନଙ୍କୁ ୫୦ ହଜାର ଟଙ୍କାର ଋଣ ପ୍ରଦାନ କରାଯାଇ ସେମାନେ କିପରି ସ୍ବାବଲମ୍ବୀ ହୋଇପାରିବେ ତାହାକୁ ଗୁରୁତ୍ୱ ଦିଆଯାଉଛି । ଏହା ସହ ସେମାନଙ୍କୁ ପରିଚୟ ପତ୍ର ପ୍ରଦାନ କରାଯାଇ ଖାଦ୍ୟ ନିରାପତ୍ତା ଯୋଜନାରେ ଅନ୍ତର୍ଭୂକ୍ତ କରାଯାଉଛି। କିନ୍ନର ଚିହ୍ନଟ ପରେ ଅନ୍ୟାନ୍ୟ ସୁବିଧା ମଧ୍ୟ ପ୍ରଦାନ କରାଯାଉଛି ବୋଲି କହିଥିଲେ। ଜିଲାରେ ୫ ଟି କିନ୍ନରମାନେ ସ୍ବୟଂ ସହାୟକ ଗୋଷ୍ଠୀ କରି ସେମାନଙ୍କୁ ୫୦ ହଜାର ଟଙ୍କା ଲେଖାଏ ପ୍ରଦାନ କରାଯାଇଛି ବୋଲି କହିଥିଲେ। କିନ୍ତୁ ଏଯାବତ ଆହୁରି ଅନେକ କିନ୍ନର ରହିଛନ୍ତି ଯାହାକି ସେମାନେ ଚିହ୍ନଟ ହୋଇପାରୁନାହାନ୍ତି ବୋଲି କିନ୍ନରମାନେ କହିଛନ୍ତି । ଜିଲା ସାମାଜିକ ସୁରକ୍ଷା ବିଭାଗର ଅବହେଳା ଯୋଗ ବହୁ କିନ୍ନର ଚିହ୍ନଟ ନହେବା ସହ ଯେଉଁ ମାନେ ଅଛନ୍ତି ସରକାରଙ୍କ କଣ ସବୁ ସୁବିଧା ରହିଛି ସେମାନେ ଜାଣନ୍ତି ନାହିଁ। ଠିକ ସଚେତନତା ଅଭାବରୁ ଏହିସବୁ ଅସୁବିଧା ହେଉଛି ବୋଲି ଛତ୍ରପୁରର କିନ୍ନରମାନେ କହିଛନ୍ତି । ଜିଲାରେ କ୍ୟାମ୍ପ କରି କିନ୍ନର ମାନଙ୍କୁ ଚିହ୍ନଟ କରିବା ସହ କଣ ସବୁ ସୁବିଧା ରହିଛି ସେନେଇ ଏକ ସଚେତନତା କରିବାକୁ ଦାବୀ ଉଠିଛି ।
