କେନ୍ଦୁଝର, ୧୭।୧୨(ଡି.ଏନ.ଏ.): ପର୍ଯ୍ୟଟନ ପୀଠ, ଜଳପ୍ରପାତ, ବିସ୍ତୀର୍ଣ୍ଣ ସବୁଜବନାନୀ ପ୍ରତି ଆକର୍ଷିତ ହୋଇ ରାଜ୍ୟ ଓ ରାଜ୍ୟ ବାହାରୁ ଲକ୍ଷାଧିକ ପର୍ଯ୍ୟଟକ ଧାଇଁ ଆସନ୍ତି କେନ୍ଦୁଝର ଜିଲାକୁ। ବିଶେଷ କରି ଶୀତ ଦିନରେ ଲକ୍ଷ ଲକ୍ଷ ପର୍ଯ୍ୟଟକ ଆସନ୍ତି ସାନଘାଗରାର ସାନିଧ୍ୟ ପାଇଁ, ବଡଘାଗରାର ପ୍ରପାତ ସୌନ୍ଦର୍ଯ୍ୟ ଉପଭୋଗ ପାଇଁ, ପୁଣି ଖଣ୍ଡାଧାରରେ ଭୋଜି କରିବା ଲାଗି। କାନ୍ଝାରୀ ଡ୍ୟାମଠାରୁ ଆରମ୍ଭ କରି କାଞ୍ଜିପାଣି ଘାଟୀ, ହଦଗଡ଼ଠାରୁ ଆରମ୍ଭ କରି ଭୀମକୁଣ୍ଡ ପର୍ଯ୍ୟନ୍ତ ପର୍ଯ୍ୟଟକଙ୍କର ସୁଅ ଛୁଟିଥାଏ। ମାତ୍ର କରୋନା କଟକଣା ଏବେ ବି ପୂର୍ବପରି ବଳବତ୍ତର ଥିବାରୁ ଜିଲାର ପର୍ଯ୍ୟଟନସ୍ଥଳୀ ଓ ପିକ୍ନିକ୍ ସ୍ପଟ୍ ଖାଁ ଖାଁ ହୋଇପଡ଼ିଛି।
ପର୍ଯ୍ୟଟନ ଋତୁରେ ହାତ ବାନ୍ଧି ବସିଛନ୍ତି ଏହା ଉପରେ ନିର୍ଭର କରୁଥିବା ବ୍ୟକ୍ତି ଓ ତାଙ୍କ ପରିବାରର ସଦସ୍ୟମାନେ। ନଭେମ୍ବର, ଡିସେମ୍ବର, ଜାନୁୟାରୀ ଓ ଫେବୃୟାରୀ ମାସରେ କେନ୍ଦୁଝର ଜିଲାର ବିଭିନ୍ନ ସ୍ଥାନରେ ହଜାର ହଜାର ପର୍ଯ୍ୟଟକଙ୍କ ସମାଗମ ହୋଇଥାଏ। ଏହି ଶିଳ୍ପ ଉପରେ ନିର୍ଭର କରି ଚଳୁଥିବା ଲୋକଙ୍କ ମନରେ ଉତ୍ସାହ ସୃଷ୍ଟି କରିଥାଏ। ମାତ୍ର କରୋନା କଟକଣା ସବୁ ହରଷ ଛଡ଼ାଇ ନେଇଛି। ଲୋକଙ୍କ ରୋଜଗାରରେ କରୋନା ପାହାର ବାଜିଛି। ଜିଲାର ୧୫ଟି ସ୍ଥାନ ପର୍ଯ୍ୟଟନସ୍ଥଳୀ ତାଲିକାରେ ସ୍ଥାନୀତ ହୋଇଛି। ସେଥିମଧ୍ୟରୁ ବଡ଼ଘାଗରା ପର୍ଯ୍ୟଟନସ୍ଥଳୀଟି ଜଳପ୍ରପାତ ପାଇଁ ପ୍ରସିଦ୍ଧି ଲାଭ କରିଥିବାବେଳେ ଦେଓଗାଁର କୁଶଳେଶ୍ୱର ଧର୍ମପୀଠ, ମା’ ତାରିଣୀ ପୀଠ ଘଟଗାଁ, ବୈତରଣୀର ଉତ୍ପତ୍ତିସ୍ଥଳ ଗୋନାସିକା, ବିଶିଷ୍ଟ ଶୈବପୀଠ ମୁର୍ଗାମହାଦେବ, ଗଡ଼ଚଣ୍ଡି, ଚକ୍ରତୀର୍ଥ ଏବଂ ରାଜନଗରକୁ ଧର୍ମପୀଠର ଆଖ୍ୟା ଦିଆଯାଇଛି। ସେହିପରି ଜିଲାର ସାନଘାଗରା, ହାଣ୍ଡିଭଙ୍ଗା, ଖଣ୍ଡାଧାର, ସୀତାବିଞ୍ଜିରେ ମଧ୍ୟ କରୋନା କଟକଣା ଏଯାଏ ରହିଛି। କେନ୍ଦୁଝର ଜିଲାର ଏହି ସଂଖ୍ୟାଧିକ ପର୍ଯ୍ୟଟନସ୍ଥଳୀ ବର୍ତ୍ତମାନ ପରିପ୍ରେକ୍ଷୀରେ ଖୋଲାଯିବ ନାହିଁ ବୋଲି ଜିଲାପାଳ ଆଶିଷ ଠାକ୍ରେ ସୂଚନା ଦେଇଛନ୍ତି। କରୋନାର ଦ୍ୱିତୀୟ ଲହର ସୃଷ୍ଟି ହେବାର ସମ୍ଭାବନା ଥିବା ସହ କେନ୍ଦୁଝରରେ କରୋନାକୁ ମୂଳୋତ୍ପାଟନ କରିବା ପାଇଁ ଏବେବି ସତର୍କତାର ଆବଶ୍ୟକତା ରହିଛି ବୋଲି ଜିଲାପାଳ ପ୍ରକାଶ କରିଛନ୍ତି। ତରବରିଆ ଭାବରେ ପର୍ଯ୍ୟଟନ କେନ୍ଦ୍ରଗୁଡ଼ିକ ଖୋଲାଯିବା ଠିକ୍ ହେବ ନାହିଁ ବୋଲି ସେ ତାଙ୍କ ପ୍ରତିକ୍ରିୟାରେ ପ୍ରକାଶ କରିଛନ୍ତି।
