ନୂଆଦିଲ୍ଲୀ,୨।୧: ବଦଳିପାରେ ଜମ୍ମୁ କଶ୍ମୀରର ନାମ। ଏହାକୁ କଶ୍ମୀର ନୁହେଁ ବରଂ କାଶ୍ୟପ ନାମରେ ନାମିତ କରାଯାଇପାରିବ ବୋଲି ଗୁରୁବାର କେନ୍ଦ୍ର ଗୃହମନ୍ତ୍ରୀ ଅମିତ ଶାହା କହିଛନ୍ତି। ‘J&K and Ldakh Through the Ages’ ପୁସ୍ତକ ଉନ୍ମୋଚନ ଅବସରରେ ସେ ଏଭଳି ବୟାନ ଦେଇଛନ୍ତି। ତେବେ ଶଙ୍କରାଚାର୍ଯ୍ୟ କହିବା, ସିଲ୍କ ରୁଟ୍ ଏବଂ ହେମିଶ ମଠରୁ ଏହା ପ୍ରମାଣିତ ହେଉଛି ଯେ କଶ୍ମୀରରେ ହିଁ ଭାରତୀୟ ସଂସ୍କୃତିର ମୂଳଦୁଆ ପକାଯାଇଥିଲା। କଶ୍ମୀରରେ ସୁଫି, ବୌଦ୍ଧ ଆଦି ମଠଗୁଡ଼ିକ ଭଲ ଭାବେ ବିକଶିତ ହୋଇଥିଲା।
ଶାହା କହିଛନ୍ତି, କଶ୍ମୀରୀ, ଡୋଗ୍ରୀ, ବାଲ୍ଟି ଏବଂ ଝାନ୍ସ୍କରୀ ଭାଷାକୁ ସରକାର ଅନୁମୋଦନ କରିଛନ୍ତି। ଏଥିଲାଗି ମୁଁ ପ୍ରଧାନମନ୍ତ୍ରୀ ମୋଦିଙ୍କୁ ଧନ୍ୟବାଦ ଦେଉଛି। ପିଏମ୍ଙ୍କ ଜିଦ୍ ଥିଲା ଯେ UT ଗଠନ ପରେ କଶ୍ମୀରର ଛୋଟ ସ୍ଥାନୀୟ ଭାଷା ମଧ୍ୟ ଜୀବନ୍ତ ରଖିବା ଉଚିତ। ଏହା ଦର୍ଶାଏ ଯେ କଶ୍ମୀର ପ୍ରତି ପ୍ରଧାନମନ୍ତ୍ରୀ କେତେ ଚିନ୍ତା କରନ୍ତି।
ଧାରା ୩୭୦ ଏବଂ ୩୫ଏ ଦେଶକୁ ଏକଜୁଟ୍ କରିବା ଲାଗି ବ୍ୟବସ୍ଥା ଅଟେ। ଏହି ଧାରାଗୁଡ଼ିକ ଲାଗି ସମ୍ବିଧାନ ସଭାରେ କୌଣସି ସଂଖ୍ୟାଗରିଷ୍ଠତା ନ ଥିଲା। ସେଥିଲାଗି ସେହି ସମୟରେ ଏହାକୁ ଅସ୍ଥାୟୀ କରାଯାଇଥିଲା, କିନ୍ତୁ ସ୍ବାଧୀନତା ପରେ ମୋଦି ସରକାର ଏହି ଅବହେଳିତ ଅଧ୍ୟାୟକୁ ହଟାଇ ବିକାଶର ରାସ୍ତା ଖୋଲିଛନ୍ତି। ଧାରା ୩୭୦ କଶ୍ମୀର ଯୁବକମାନଙ୍କ ମଧ୍ୟରେ ବିଚ୍ଛିନ୍ନତାର ମଞ୍ଜି ବୁଣିଛି। ଧାରା ୩୭୦ ଭାରତ ଏବଂ କଶ୍ମୀର ମଧ୍ୟରେ ଥିବା ବନ୍ଧନକୁ ଭାଙ୍ଗି ଦେଇଥିଲା, ଫଳରେ ଘାଟିରେ ଆତଙ୍କବାଦ ବୃଦ୍ଧି ପାଇଥିଲା। ଏବେ ଏହା ହଟାଯିବା ପରେ ଆତଙ୍କ ହ୍ରାସ ପାଇଛି।
ଶାହା କହିଛନ୍ତି, ପୁସ୍ତକ ମାଧ୍ୟମରେ କଶ୍ମୀରର ଇତିହାସକୁ ପ୍ରତିଷ୍ଠା କରିବାକୁ ଚେଷ୍ଟା କରାଯାଇଛି। ଗୋଟିଏ ସ୍ଥାନରେ କଶ୍ମୀରର ଇତିହାସକୁ ଏହି ପୁସ୍ତକରେ ପ୍ରମାଣ ସହ ଇତିହାସକୁ କୁହାଯାଇଛି। ଭାରତ ହେଉଛି ଏକମାତ୍ର ଦେଶ ଯାହାର ସୀମା ସାଂସ୍କୃତିକ ପରମ୍ପରା ଉପରେ ଆଧାରିତ, ସେଥିଲାଗି କଶ୍ମୀରରୁ କନ୍ୟାକୁମାରୀ ଯାଏ ଭାରତ ଏକ। ଆମ ଦେଶକୁ ଭାଙ୍ଗୁଥିବା ତଥ୍ୟକୁ ବୁଝିବାକୁ ହେବ। କାରଣ ଏହାକୁ ବିକୃତ କରାଯାଇଛି। ଏହି ପୁସ୍ତକରୁ ଗୋଟିଏ କଥା ପ୍ରମାଣିତ ହେଉଛି ଯେ ଭାରତର କୋଣଅନୁକୋଣରେ ସଂସ୍କୃତିର ଅଂଶ ବିଛାଡ଼ି ହୋଇ ରହିଛି, ସେମାନଙ୍କ ମଧ୍ୟରୁ ଅନେକ କିଛିକଶ୍ମୀରରୁ ଆସିଛି ବୋଲି ସେ କହିଛନ୍ତି।
