ନୂଆଦିଲ୍ଲୀ,୩୦।୮: କଂଗ୍ରେସର ନେତୃତ୍ୱ ପରିବର୍ତ୍ତନକୁ ନେଇ ଯେଉଁ ଚିଠି ଲେଖାଯାଇଥିଲା ଏବେ ପର୍ଯ୍ୟନ୍ତ ଏହାର ସମାଧାନ ହୋଇ ପାରୁନାହିଁ। ଚିଠି ଲେଖି ଥିବା କଂଗ୍ରେସ ନେତାଙ୍କ ମଧ୍ୟରେ ଜଣେ ଥିଲେ ବରିଷ୍ଠ ନେତା କପିଲ ଶିବଲ। ଏବେ ସେ ଏହାକୁ ନେଇ ଚିନ୍ତା ପ୍ରକଟ କରିଛନ୍ତି। ସେ କହିଛନ୍ତି କଂଗ୍ରେସ କାର୍ଯ୍ୟକାରିଣୀ ବୈଠକରେ ତାଙ୍କ ଦ୍ୱାରା ଉଠାଯାଇଥିବା କଥାର ନା କିଛି ସମାଧାନ ହେଲା ନା ଏହାକୁ ବିଚାରକୁ ନିଆଗଲା। ଏମିତିକି ଚିଠି ଲେଖା ପ୍ରସଙ୍ଗକୁ ନେଇ କେହି ନେତା ବି ମୁହଁ ନ ଖୋଲିବା ଆଉ ଏକ ଚିନ୍ତାର ବିଷୟ ବୋଲି ସେ କହିଛନ୍ତି। ସେ କହିଛନ୍ତି ଏହି ସମୟରେ ଦଳକୁ ଜଣେ ପୂର୍ବତନ ଅଧ୍ୟକ୍ଷ ଆବଶ୍ୟକ। ଏହାସହ ଚିଠିରେ ଲେଖାଯାଇଥିବା ସମସ୍ୟା ଗୁଡିକର ତୁରନ୍ତ ସମାଧାନ ହେବା ଦରକାର। ସେ କହିଛନ୍ତି କଂଗ୍ରେସ ସବୁବେଳେ ଭାରତୀୟ ଜନତା ପାର୍ଟି(ଭାଜପା) ଉପରେ ସମ୍ବିଧାନ ପାଳନ କରୁ ନ ଥିବା ଓ ଲୋକତନ୍ତ୍ରକୁ ନଷ୍ଟ କରୁଥିବା ଅଭିଯୋଗ ଆଣୁଛି। ହେଲେ ଆମେ କ’ଣ କରୁଛୁ ବୋଲି ସେ ପ୍ରଶ୍ନ କରିଛନ୍ତି। ଆମକୁ ବି ସମ୍ବାଧାନର ପାଳନ କରିବା ଆବଶ୍ୟକ। ତେବେ ବୈଠକରେ କାହିଁକି ଚିଠିରେ ଲେଖାଯାଇଥିବା କଥା ଆଲୋଚନା ନ ହେଲା ବୋଲି ସେ ଚିନ୍ତା ପ୍ରକଟ କରିଛନ୍ତି। ଆଉ ଯଦି ସେଥିରେ କିଛି ଭୁଲ୍ ଥିଲା ତାକୁ ନେଇ ପ୍ରଶ୍ନ କରାଯାଉନି କାହିଁକି। କିନ୍ତୁ ଆମକୁ ଅସନ୍ତୁଷ୍ଟ ବୋଲି କୁହାଯାଉଛି।
