ନୟାଗଡ଼ ଅଫିସ,୧୦।୬: ନୟାଗଡ଼ ଜିଲା ଶରଣକୂଳ ଥାନା ବଡ଼ପୁଟ ଗାଁରେ ବ୍ୟକ୍ତିଗତ ଜମିରେ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନା (ଏମ୍ଜିଏନ୍ଆର୍ଇଜିଏସ୍)ରେ ରାସ୍ତା ନିର୍ମାଣକୁ ବିରୋଧ କରିବାରୁ ଏକ ପରିବାରକୁ କଙ୍ଗାରୁ କୋର୍ଟରେ ଦଣ୍ଡିତ କରାଯାଇଛି । କଙ୍ଗାରୁ କୋର୍ଟର ଦଣ୍ଡିତ ଅର୍ଥ ୫ ଲକ୍ଷ ୬ ଟଙ୍କା ନ ଦେବାରୁ ବଡ଼ପୁଟର ରାଜୀବ କୁମାର ସାହୁଙ୍କୁ ବାସନ୍ଦ କରାଯାଇଛି। ଗୁରୁବାର ଭୋର ସମୟରେ ତାଙ୍କ ଘର ସମ୍ମୁଖରେ କଣ୍ଟାଗଛ ପକାଇ ଅବରୋଧ କରାଯାଇଛି। ଏପରି କି ପରିବାରର ସମସ୍ତଙ୍କୁ ଜୀବନରେ ମାରିଦେବାକୁ ଧମକ ଦିଆଯାଇଛି। ଏନେଇ ରାଜୀବ ଶରଣକୂଳ ଥାନାରେ ଅଭିଯୋଗ କରିଥିଲେ ମଧ୍ୟ ଏହି ରିପୋର୍ଟ ଲେଖା ଯିବା ପର୍ଯ୍ୟନ୍ତ ତାଙ୍କ ଘର ସମ୍ମୁଖରୁ କଣ୍ଟାଗଛ ହଟାଯାଇ ନାହିଁ। ଏପରି ନିର୍ଯାତନା ଯୋଗୁ ରାଜୀବଙ୍କ ପରିବାର ଲୋକେ ଭୟରେ ଘରୁ ବାହାରି ପାରୁନାହାନ୍ତି ।
ଏନେଇ ରାଜୀବ କହିଛନ୍ତି, ମୋର ବ୍ୟକ୍ତିଗତ ୩ ଡେସିମିଲ ଜମିରେ ଏମ୍ଜିଏନ୍ଆର୍ଇଜିଏସ୍ରେ ରାସ୍ତା ତିଆରି କରିବାକୁ କେତେଜଣ ବ୍ୟକ୍ତି ଜିଦ୍ କରିଥିଲେ। ହେଲେ ସେହି ଜମିରେ ଚାଷ କରି ମୁଁ ପରିବାର ପ୍ରତିପୋଷଣ କରୁଛି। ସେଠାରେ ରାସ୍ତା ନିର୍ମାଣ ନ କରିବାକୁ ଅନୁରୋଧ କରିଥିଲି । ହେଲେ ମୋ କଥା କେହି ଶୁଣିଲେ ନାହିଁ କି କ୍ଷତିପୂରଣ ଦେଲେନି। ଶେଷରେ ମୋ ବ୍ୟକ୍ତିଗତ ଜମିରେ ମାଟି ପକାଇ ପ୍ରାୟ ୧ବର୍ଷ ତଳେ ରାସ୍ତା ନିର୍ମାଣ କରାଯାଇଥିଲା। ଏହାର ପ୍ରତିବାଦ କରିବାରୁ ମୋ ବିରୋଧରେ ଗାଁରେ କଙ୍ଗାରୁ କୋର୍ଟ ବସିଥିଲା। ମୋତେ ୫ ଲକ୍ଷ ୬ ଟଙ୍କା ଜରିମାନା କରାଗଲା। ଜରିମାନା ଅଥର୍ର୍ ତୁରନ୍ତ ନ ଦେଲେ କିଛି ଠିକ୍ ହେବ ନାହିଁ ବୋଲି ଧମକ ମିଳିଥିଲା । ପରେ ପରିବାର ଲୋକଙ୍କୁ ହତ୍ୟା ଧମକ ମିଳିଛି । ଶେଷରେ ମୋ ଘର ସମ୍ମୁଖରେ କଣ୍ଟାଗଛ ପକାଇ ସେମାନେ ଅବରୋଧ କରିଛନ୍ତି। ଥାନାରେ ଅଭିଯୋଗ କରିଥିଲେ ମଧ୍ୟ ମୋତେ ନ୍ୟାୟ ମିଳୁ ନାହିଁ ବୋଲି ରାଜୀବ ଦୁଃଖର ସହ କହିଛନ୍ତି ।
ଏନେଇ ଶରଣକୂଳ ଥାନା ଆଇଆଇସି ଜୟଦୀପ ମହାନ୍ତି କୁହନ୍ତି, ବଡ଼ପୁଟରେ ଘର ସମ୍ମୁଖରେ କଣ୍ଟାଗଛ ପକାଯିବା ଘଟଣାରେ ଗ୍ରାମବାସୀ ଓ ଅଭିଯୋଗକାରୀଙ୍କ ମଧ୍ୟରେ ଚାଲିଥିବା ବିବାଦର ସମାଧାନ କରାଯିବାକୁ ଚେଷ୍ଟା ହୋଇଥିଲା । ହେଲେ ଅଭିଯୋଗକାରୀ ସମାଧାନ କରିବାକୁ ମନା କରିବା ପରେ ଏକ ମାମଲା(ନଂ.୬୮/୨୨) ରୁଜୁ ହୋଇ ତଦନ୍ତ ଆରମ୍ଭ ହୋଇଛି । ଅଭିଯୋଗକାରୀଙ୍କ ଘର ସମ୍ମୁଖରେ ପଡିଥିବା କଣ୍ଟାଗଛ ହଟା ଯାଇଛି ବୋଲି ସେ କହିଛନ୍ତି ।
