ମୁମ୍ବାଇ: ବଲିଉଡ କୁଇନ କଙ୍ଗନା ରାନାୱତ କିଛି ନା କିଛି କାରଣ ପାଇଁ ଥାଆନ୍ତି ଚର୍ଚ୍ଚାରେ । ନିକଟରେ ମହାରାଷ୍ଟ୍ର ରାଜନୈତିକ ସଙ୍କଟ ମଧ୍ୟରେ ସେ ପୂର୍ବତନ ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କୁ ଟାର୍ଗେଟ କରିଥିଲେ । ଆଉ କହିଥିଲେ ପାପ ବଢିଲେ ସର୍ବନାଶ ହୁଏ । ଏହା ଏବେ ଆଲୋଚନାର ପରିସରକୁ ଚାଲି ଆସିଛି । କେବଳ ସେତିକି ନୁହେଁ ଏବେ କିଛିବର୍ଷ ତଳର ଭିଓିଡକୁ ନେଇ ବି ଚର୍ଚ୍ଚାକୁ ଆସିଛନ୍ତି ପଙ୍ଗା ଗର୍ଲ କଙ୍ଗନା ରାନାୱତ ।
୨୦୧୯ରେ ମୁମ୍ବାଇରେ ଆୟୋଜିତ ଏକ କାର୍ଯ୍ୟକ୍ରମରେ କଙ୍ଗନାଙ୍କୁ ନେଇ ବଲିଉଡ ନାୟିକା ରେଖା ଯେଉଁ ବୟାନ ଦେଇଥିଲେ ତାହା ଏବେ ପୁଣି ଥରେ ତାଜା ହୋଇ ଉଠିଛି । ଉକ୍ତ କାର୍ଯ୍ୟକ୍ରମରେ ରେଖା କହିଥିଲେ, ମୋର ଯଦି ଝିଅ ଥାଆନ୍ତା ତେବେ ସେ ନିଶ୍ଚିତ ଭାବେ କଙ୍ଗନାଙ୍କ ପରି ହୋଇଥାଆନ୍ତା ।
ସୂଚନାଯୋଗ୍ୟ, ୨୦୧୯ରେ ମୁମ୍ବାଇରେ ମରାଠି ଗୌରବ ଇଭେଣ୍ଟରେ ରେଖାଙ୍କୁୁ ଏକ ସ୍ପେଶାଲ ଆୱାର୍ଡ ଦିଆଯାଇଥିଲା ଆଉ ସେହି କାର୍ଯ୍ୟକ୍ରମରେ କଙ୍ଗନାଙ୍କ ଶାଢି ପିନ୍ଧା ଲୁକ ଜବରଦସ୍ତ ଥିଲା । ରେଖା ଦେଇଥିବା ଗିପ୍ଟ ଶାଢି ପିନ୍ଧି କଙ୍ଗନା ଉକ୍ତ କାର୍ଯ୍ୟକ୍ରମକୁ ଆସିଥିବା ବେଳେ ରେଖା କଙ୍ଗନାଙ୍କର ଖୁବ୍ ତାରିଫ କରିଥିଲେ । ଏମିତିକି ତାଙ୍କର ଝିଅ ଥିଲେ କଙ୍ଗନାଙ୍କ ପରି ହୋଇଥାଆନ୍ତା ବୋଲି ସେ କହିଥିଲେ । ଏବେ ରେଖାଙ୍କର ଜଣେ ପ୍ରଶଂସକ ଏହି ପୁରୁଣା ଭିଡିଓକୁ ଶେୟାର କରିବା ପରେ କଙ୍ଗନା ଏହା ଉପରେ କମେଣ୍ଟ କରିଛନ୍ତି । କଙ୍ଗନା କହିଛନ୍ତି ଏବେ ପର୍ଯ୍ୟନ୍ତ ମିଳିଥିବା ସବୁଠାରୁ ବଡ ପ୍ରଶଂସ ।
ସୂଚନାଯୋଗ୍ୟ, କଙ୍ଗନା ୨୦୦୬ ରେ ଫିଲ୍ମ ‘ଗ୍ୟାଙ୍ଗଷ୍ଟର’ ମାଧ୍ୟମରେ ବଲିଉଡରେ ଡେବ୍ୟୁ କରି ବହୁତ ଶୀଘ୍ର ଦର୍ଶକଙ୍କ ନିକଟରେ ପହଞ୍ଚି ଯାଇଥିଲେ । ଏବେ ଅପକମିଙ୍ଗ ଫିଲ୍ମ ‘ତେଜସ’ରେ କଙ୍ଗନାଙ୍କୁ ଦେଖିବାକୁ ମିଳିବ । ଏହାପରେ ତାଙ୍କ ହାତରେ ରହିଛି ‘ଏମରଜେନ୍ସି’ । ଏଥିରେ ସେ ଭାରତର ପ୍ରଥମ ମହିଳା ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ଚରିତ୍ରର ନଜର ଆସିବେ ।
