ଦାରିଙ୍ଗବାଡି, ୧୪।୪ (ଅରୁଣ ସାହୁ):କନ୍ଧମାଳ ଜିଲାପାଳ ଅମ୍ରିତ ଋତୁରାଜଙ୍କୁ ଝୁରୁଛନ୍ତି ଦାରିଙ୍ଗବାଡିର ଏକାଧିକ ଦୁର୍ଗମ ଅଞ୍ଚଳବାସୀ। ସେ ଆଉ ଅଞ୍ଚଳରେ ଜଣେ ସାଧାରଣ ମଣିଷ ଭଳି ସ୍କୁଟିରେ ବୁଲୁନାହାନ୍ତି। ଲୋକଙ୍କ ସମସ୍ୟା ଶୁଣୁଥିଲେ ସିଧା ଲୋକଙ୍କ ନିକଟକୁ ଯାଉଥିଲେ ହେଲେ ଗତ କିଛି ଦିନ ହେଲା ସେ ଆଉ ସ୍କୁଟି ରେ ଅଚାନକ ପହଞ୍ଚୁ ନ ଥିବା କୁହାଯାଉଛି।
ପ୍ରକାଶ ଯେ, ଗତ ବର୍ଷ ଅଗଷ୍ଟ ମାସରେ ପ୍ରତି ରବିବାର ଜିଲାପାଳ ଦାରିଙ୍ଗବାଡିର ବିଭିନ୍ନ ଅଞ୍ଚଳକୁ ପରିଦର୍ଶନରେ ଯାଇଥିଲେ। ସେ ଲୋକଙ୍କ ସହ ଜଣେ ସାଧାରଣ ଲୋକଙ୍କ ଭଳି ମିଶୁଥିଲେ ଓ କୃଷି, ଜଳ ସେଚନ, ଜୀବନଜୀବିକା ଉପରେ ଲୋକଙ୍କୁ ସିଧା ଆଲୋଚନା କରି ସ୍ଥାନୀୟ ପ୍ରଶାସନକୁ ଲୋକଙ୍କ ସମସ୍ୟାର ସମାଧାନ ପାଇଁ ନିର୍ଦ୍ଦେଶ ଦେଉଥିଲେ। ସେହିପରି ବିଭିନ୍ନ ଛାତ୍ରାବାସରେ ପହଞ୍ଚି ଛାତ୍ରୀଛାତ୍ରଙ୍କ ସମସ୍ୟା ଓ ସେମାନଙ୍କ ସୁବିଧା ଅସୁବିଧା, ସମ୍ପର୍କରେ ଅବଗତ ହେଉଥିଲେ ଏବେ ସେ ସବୁ ବନ୍ଦ ହୋଇଯାଇଛି । ଜିଲାପାଳ ଦାରିଙ୍ଗବାଡିର ଡାକ ବଙ୍ଗଳାରେ ପହଞ୍ଚି ସେଠାରୁ ବ୍ଲକ କର୍ମଚାରୀଙ୍କ ସ୍କୁଟି ନେଇ ପର୍ଯ୍ୟଟନକ୍ଷେତ୍ର ସମେତ ବିଭିନ୍ନ ଗ୍ରାମକୁ ପରିଦର୍ଶନରେ ଯାଉଥିଲେ। ଫଳରେ ସରକାରୀ କର୍ମଚାରୀ ଚଳଚଞ୍ଚଳ ହେବା ସହ ଲୋକଙ୍କ ଜୀବନଜୀବିକାରେ ପରିବର୍ତ୍ତନ ହେବାରେ ଜିଲାପାଳ ସହାୟକ ହୋଇଥିଲେ। ତେବେ ଦୁର୍ଗମ ସୋନପୁରର ମୁଚୁଡ଼ିପାଙ୍କା ଗ୍ରାମଠାରୁ ଆରମ୍ଭ କରି ପାଙ୍ଗାଲି, ଡବେରୀ ଆଦି ଅଞ୍ଚଳ ସେ ସ୍କୁଟିରେ ଶେଷଥର ପାଇଁ ଗତ ଅଗଷ୍ଟ ୧୯ରେ ପରିଦର୍ଶନ କରିଥିଲେ।
ସୂଚନାଯୋଗ୍ୟ ଯେ, ଜିଲାପାଳ ଦାରିଙ୍ଗବାଡି ବୁଲିବା ସମୟରେ ପର୍ଯ୍ୟଟନକ୍ଷେତ୍ର ବିଶେଷ କରି ଡୁଲୁରୀ ପାଇନ ବଣରେ ଟ୍ରାକିଂ ଟ୍ରେଲ କରାଯାଇଥିବା ସହ ଦାରିଙ୍ଗବାଡିରେ ଏକାଧିକ ଗ୍ରାମରେ ଜଳ ସେଚନ ବ୍ୟବସ୍ଥା, ଲୋକଙ୍କ ଜୀବନଜୀବିକାରେ ସ୍ବାବଲମ୍ବୀ ହୋଇପାରିଛି।
