କୋକସରା, ୧୮।୩ (ଦୁଷ୍ମନ୍ତ କୁମାର ପାଟ୍ଟଯୋଷୀ): କଳାହାଣ୍ଡି ଜିଲା କୋକସରା ବ୍ଳକ ଅଞ୍ଚଳରେ ଗତକାଲି ଅପରାହ୍ନରେ କାଳବୈଶାଖୀର କରାଳ ରୂପ ଦେଖିବାକୁ ମିଳିଛି। ପ୍ରବଳ ବର୍ଷା ସାଙ୍ଗକୁ କୁଆପଥର ମାଡ଼ ଯୋଗୁଁ ଅଞ୍ଚଳରେ ବ୍ୟାପକ କ୍ଷୟକ୍ଷତି ହୋଇଥିବା ଖବର ମିଳିଛି। ବିଶେଷ କରି ଚାଷୀଙ୍କ ମେରୁଦଣ୍ଡ ଭାଙ୍ଗିଯାଇଥିବା ବେଳେ ଅନେକ ପରିବାର ବାସହରା ହୋଇପଡ଼ିଛନ୍ତି।
ବ୍ଳକର ଆମପାଣି, ବରାଡଙ୍ଗା, ଲଡୁଗାଁ ଓ ବଡ଼ପୋଡ଼ାଗୁଡ଼ା ପଞ୍ଚାୟତରେ କାଳବୈଶାଖୀ ସବୁଠାରୁ ଅଧିକ ପ୍ରଭାବ ପକାଇଛି। ବିଲରେ ଥିବା ମୁଗ, ବିରି ଓ ସୂର୍ଯ୍ୟମୁଖୀ ଭଳି ଡାଲି ଜାତୀୟ ଫସଲ ସମ୍ପୂର୍ଣ୍ଣ ନଷ୍ଟ ହୋଇଯାଇଛି। ବାଇଗଣ, ଟମାଟୋ, ପିଆଜ ଓ ଆଳୁ ଚାଷ ସହ ଆମ୍ବ ବଗିଚା ମଧ୍ୟ ବ୍ୟାପକ ଭାବେ କ୍ଷତିଗ୍ରସ୍ତ ହୋଇଛି। ଆମପାଣିର ଯାଦବ ନାଏକ, ସିଉନୀ ଗ୍ରାମର କୃପାସିନ୍ଧୁ ରାଉତ, ଗଜନନ ରାଉତ ଓ ମାଧବୀ ଦଳପତିଙ୍କ ସମେତ ଶତାଧିକ ଚାଷୀ ସର୍ବସ୍ୱ ହରାଇଛନ୍ତି।
ବର୍ଷା ଓ ପବନର ବେଗ ଏତେ ଥିଲା ଯେ, କନ୍ଦାଗଡ ଗ୍ରାମର ବୈଷ୍ଣବ ମାଝୀ, ଲକ୍ଷ୍ମଣ ବାଗ, ଦୈତାରୀ ମାଝୀ ଓ ନିକୁଞ୍ଜ ମାଝୀଙ୍କ ସମେତ ପ୍ରାୟ ୨୦ରୁ ଅଧିକ ପରିବାରଙ୍କ ଘରର ଛପର ଓ ଆଜବେଷ୍ଟସ ଭାଙ୍ଗି ଚୂରମାର ହୋଇଯାଇଛି। ଫଳରେ ଲୋକେ ଏବେ ଖୋଲା ଆକାଶ ତଳେ ରହିବାକୁ ବାଧ୍ୟ ହେଉଛନ୍ତି।
ଏହି ପ୍ରାକୃତିକ ବିପର୍ଯ୍ୟୟ ପରେ ସ୍ଥାନୀୟ ପ୍ରଶାସନ ପକ୍ଷରୁ ତଦନ୍ତ ପ୍ରକ୍ରିୟା ଆରମ୍ଭ ହୋଇଛି।କୋକସରା ଗୋଷ୍ଠୀ କୃଷି ଅଧିକାରୀ ରାକେଶ କୁମାର ମାଝୀ କହିଛନ୍ତି ଯେ, କୃଷି ଓ ଉଦ୍ୟାନ କୃଷି ବିଭାଗର ମିଳିତ ଟିମ୍ ୭୨ ଘଣ୍ଟା ମଧ୍ୟରେ କ୍ଷୟକ୍ଷତିର ଆକଳନ କରି ରିପୋର୍ଟ ପ୍ରଦାନ କରିବେ। ଅତିରିକ୍ତ ତହସିଲଦାର ମୋହନ ଚରଣ ଜେନା ସମସ୍ତ ରାଜସ୍ୱ ନିରୀକ୍ଷକ (RI) ମାନଙ୍କୁ କ୍ଷେତ୍ର ପରିଦର୍ଶନ କରି ତୁରନ୍ତ ରିପୋର୍ଟ ଦେବାକୁ ନିର୍ଦ୍ଦେଶ ଦେଇଛନ୍ତି।ସରକାରୀ ସହାୟତା ମିଳିଲେ କ୍ଷତିଗ୍ରସ୍ତ ଚାଷୀ ଓ ଗରିବ ପରିବାର ଗୁଡ଼ିକ କିଛିଟା ଆଶ୍ୱସ୍ତି ପାଇବେ ବୋଲି ସ୍ଥାନୀୟ ଅଞ୍ଚଳରେ ଦାବି ହେଉଛି।
