ବ୍ରଜରାଜନଗର,୫।୨ (ଡି.ଏନ୍.ଏ.): ପୂର୍ବତନ ସ୍ବାସ୍ଥ୍ୟମନ୍ତ୍ରୀ ନବ କିଶୋର ଦାସଙ୍କ ହତ୍ୟାକାଣ୍ଡର ପର୍ଦ୍ଦାଫାଶ କରିବା ପାଇଁ କ୍ରାଇମବ୍ରାଞ୍ଚ ତଦନ୍ତ ଜାରି ରଖିଛି। ହତ୍ୟାକାରୀ ପୋଲିସ୍ ଏଏସ୍ଆଇ ଗୋପାଳ କୃଷ୍ଣ ଦାସଙ୍କୁ କ୍ରାଇମବ୍ରାଞ୍ଚ ମାରାଥନ ଜେରା କରୁଛି। ଗୋପାଳ ବିମାନବନ୍ଦର ଥାନା ପାଇଖାନା ସେପ୍ଟିଟାଙ୍କିରେ ପକାଇଥିବା କାଗଜ ଖଣ୍ଡକୁ ଉଦ୍ଧାର କରାଯାଇ ଏଥିରେ ଲେଖାଥିବା ହସ୍ତାକ୍ଷର କାହାର ଜାଣିବା ପାଇଁ ଏହାକୁ ଫୋରେନସିକ ଲାବ୍କୁ ପଠାଯିବ ବୋଲି କୁହାଯାଇଛି। ଅନ୍ୟପକ୍ଷେ ତଦନ୍ତ ବେଳେ ଗାନ୍ଧୀଛକ ଫାଣ୍ଡି ପରିସରରେ ଅଭିଯୁକ୍ତ ଗୋପାଳ ବ୍ୟବହାର କରୁଥିବା ଏକ କାର୍ ଥିବା ଜଣାପଡିଥିଲା। ଏହି କାର୍କୁ କ୍ରାଇମବ୍ରାଞ୍ଚ ଶୁକ୍ରବାର ଯାଞ୍ଚ କରିବା ପରେ ଏଥିରୁ ଏକ ଡାଏରି ଓ କେତେକ କାଗଜପତ୍ର ମିଳିଥିଲା। ଏହି ଡାଏରିରେ କ’ଣ ଲେଖା ରହିଛି ତାହାକୁ ନେଇ କ୍ରାଇମବ୍ରାଞ୍ଚ ତଦନ୍ତ ଆରମ୍ଭ କରିଛି। ଓଆର୍୧୫ଏନ୍-୪୨୬୩ନଂ. ହୁଣ୍ଡାଇ ଭେର୍ନା କାର୍ ବ୍ରଜରାଜନଗରର ଅରୁଣ କୁମାର ମୁନ୍ଦ୍ରାଙ୍କ ନାମରେ ରହିିଛି। ଏହି କାର୍ଟି ସମ୍ବଲପୁର ଆଞ୍ଚଳିକ ପରିବହନ ବିଭାଗ ଅଧୀନରେ ୨୦୦୯ରେ ରେଜିଷ୍ଟ୍ରେଶନ ହୋଇଥିବା ଜଣାପଡିଛି। ଏହାର ଫିଟ୍ନେଶ ୨୦୨୪ ଜୁଲାଇ ୨୧ ପର୍ଯ୍ୟନ୍ତ ରହିଛି। ଏ ନେଇ କାର୍ ମାଲିକ ଅରୁଣ କହିଛନ୍ତି, ସେ ଏହାକୁ ବିକ୍ରି କରିବା ପାଇଁ କାର୍ ଶୋ’ରୁମ୍କୁ ନେଇଥିଲେ। ସେଠାରେ କାର୍ ମୂଲ୍ୟ ୮୦ହଜାର ଟଙ୍କା ହୋଇଥିଲା। ଏହା ଜାଣିବାପରେ ଏଏସ୍ଆଇ ଗୋପାଳ ଏହାକୁ ଗତ ନଭେମ୍ବର ମାସରେ ୧ଲକ୍ଷ ଟଙ୍କାରେ କିଣିଥିଲେ। କାର୍ ମାଲିକଙ୍କୁ ଗୋପାଳ ପ୍ରଥମେ ୫୦ହଜାର ଟଙ୍କା ଦେଇଥିଲେ। ବାକି ଟଙ୍କା ଦେଲେ କାର୍ର ମାଲିକାନା ଗୋପାଳଙ୍କ ନାମରେ ହେବ ବୋଲି ଉଭୟଙ୍କ ମଧ୍ୟରେ କଥାବାର୍ତ୍ତା ହୋଇଥିଲା ବୋଲି ଅରୁଣ କହିଛନ୍ତି। ଅରୁଣ ଜଣେ ପ୍ରତିଷ୍ଠିତ ବ୍ୟବସାୟୀ। ତାଙ୍କର କୋଲ୍ ଟ୍ରାନ୍ସପୋର୍ଟିଂ, ପେଟ୍ରୋଲ ପମ୍ପ, ହିରୋ ବାଇକ୍ ଶୋ’ରୁମ୍ ଆଦି ବ୍ୟବସାୟ ରହିଛି। ଏଭଳି ଜଣେ ବ୍ୟବସାୟୀଙ୍କ ନିକଟରୁ ଏଏସ୍ଆଇ ଗୋପାଳ କାର୍ କିଣିବାକୁ ନେଇ ଅଞ୍ଚଳରେ ଚର୍ଚ୍ଚା ଜୋର୍ ଧରିଛି। ବ୍ୟବସାୟୀଙ୍କ ସହିତ ଏଏସ୍ଆଇ ଗୋପାଳଙ୍କ କ’ଣ ଲିଙ୍କ୍ ରହିଛି ତାହାକୁ ନେଇ ସାଧାରଣରେ ନାନା କଥା ଆଲୋଚନା ହେଉଛି। କ୍ରାଇମବ୍ରାଞ୍ଚ ଏହାର ପୁଙ୍ଖାନୁପୁଙ୍ଖ ତଦନ୍ତ କଲେ ପ୍ରକୃତ ରହସ୍ୟ ଖୋଲିବ ବୋଲି କୁହାଯାଉଛି।
