କଟକ ଅଫିସ, ୧୦ା୮: କଟକସ୍ଥିତ ଓଡ଼ିଶା ଜୁଡିସିଆଲ ଏକାଡେମୀରେ ନବନିଯୁକ୍ତ ୪୭ ଜଣ ସିଭିଲ ଜଜ୍ଙ୍କ ଶପଥ ଗ୍ରହଣ ଉତ୍ସବ ସୋମବାର ଅନୁଷ୍ଠିତ ହୋଇଯାଇଛି। ଏଥିରେ ହାଇକୋର୍ଟ ମୁଖ୍ୟ ବିଚାରପତି ଏସ୍. ମୁରଲୀଧର ଅଧ୍ୟକ୍ଷତା କରି ସିଭିଲ ଜଜ୍ମାନଙ୍କୁ ଶପଥ ପାଠ କରାଇଥିଲେ। ଏହି ଅବସରରେ ମୁରଲୀଧର କହିଥିଲେ, ୪୭ ଜଣ ସିଭିଲ ଜଜ୍ଙ୍କ ମଧ୍ୟରେ ୩୦ ଜଣ ମହିଳା ଅଛନ୍ତି। ଏହା ଓଡ଼ିଶା ନ୍ୟାୟପାଳିକା ପାଇଁ ଏକ ଶୁଭ ସଙ୍କେତ। ଏଥିସହ ସେ ସାଧାରଣ ଲୋକଙ୍କ ସେବା ଓ ସରକାରୀ ସେବା ମଧ୍ୟରେ ଥିବା ଭିନ୍ନତା ବିଷୟରେ ଆଲୋକପାତ କରିଥିଲେ। ସିଭିଲ ଜଜ୍ମାନେ ନିଜକୁ ସରକାରୀ ସେବକ ନୁହେଁ ଲୋକଙ୍କ ସେବକ ଭାବେ ମାନିବାକୁ ସେ କହିଥିଲେ। ଜଣେ ବିଚାରପତିଙ୍କ ପାଇଁ ନ୍ୟାୟ ପ୍ରଦାନ ହିଁ ଏକମାତ୍ର ଲକ୍ଷ୍ୟ। ଏଥିସହ ଅଦାଲତକୁ ଆସୁଥିବା ଜନସାଧାରଣ କିମ୍ବା ସାକ୍ଷୀଙ୍କ ପ୍ରତି ଉତ୍ତମ ଶିଷ୍ଟାଚାର ପ୍ରଦର୍ଶନ କରିବାକୁ ସେ ପରାମର୍ଶ ଦେଇଥିଲେ। ଜଷ୍ଟିସ ବିଶ୍ୱଜିତ୍ ମହାନ୍ତି ସ୍ବାଗତ ଭାଷଣ ଓ ଜଷ୍ଟିସ ଶଶିକାନ୍ତ ମିଶ୍ର ଧନ୍ୟବାଦ ଦେଇଥିଲେ। ଏହି ଉତ୍ସବରେ ଜଷ୍ଟିସ ଏସ୍. କେ. ପାଣିଗ୍ରାହୀ, ନ୍ୟାୟିକ ଅଧିକାରୀ ଓ ସିଭିଲ ଜଜ୍ମାନଙ୍କ ମାତାପିତା ଓ ପରିବାରବର୍ଗ ଉପସ୍ଥିତ ଥିଲେ।
ସୂଚନାଯୋଗ୍ୟ, ତାଲିମ ଶେଷ ହେବା ପରେ ନବନିଯୁକ୍ତ ୪୭ ଜଣ ସିଭିଲ ଜଜ୍ଙ୍କୁ ଓଡ଼ିଶା ନ୍ୟାୟିକ ସେବାରେ ସୋମବାର ସାମିଲ କରାଯାଇଛି। ହାଇକୋର୍ଟଙ୍କ ଦ୍ୱାରା ଅନୁମୋଦିତ ପ୍ରଶିକ୍ଷଣ ମଡ୍ୟୁଲ ଅନୁସାରେ ଉକ୍ତ ସିଭିଲ ଜଜ୍ମାନେ ନିଯୁକ୍ତି ପାଇବା ପରେ ଜୁଡିସିଆଲ ଏକାଡେମୀରେ ତାଲିମ ନେଇଥିଲେ। ତାଲିମ ନେବା ସମୟରେ ବିଭିନ୍ନ କୋର୍ଟ, ବିତ୍ତୀୟ ପ୍ରବନ୍ଧନ, ଫୋରେନ୍ସିକ ସାଇନ୍ସ, ମଧୁସୂଦନ ଦାସ ଏକାଡେମୀ ବିତ୍ତୀୟ ପ୍ରବନ୍ଧନ, ଏସ୍ସିବି ମେଡିକାଲ କଲେଜ, ରେଭିନ୍ୟୁ ଅଫିସର୍ସ ଟ୍ରେନିଂ ଇନ୍ଷ୍ଟିଚ୍ୟୁଟ୍, ଷ୍ଟେଟ୍ ଫୋରେନ୍ସିକ ସାଇନ୍ସ ଲାବୋରେଟୋରି ପରିଦର୍ଶନ କରିଥିଲେ। ସେହିପରି ତାଲିମ ନେବା ସମୟରେ କଏଦୀଙ୍କ ଜୀବନ ବିଷୟରେ ଜାଣିବା ପାଇଁ ଚୌଦ୍ୱାର ସର୍କଲ ଜେଲ୍ ଓ ଜାମୁଝରି ଓପନ ଏୟାର ଜେଲ୍ ବୁଲିଥିଲେ।
