ଯାଜପୁର ଅଫିସ/ଧର୍ମଶାଳା,୧ା୨(ଡି.ଏନ.ଏ.): ଧର୍ମଶାଳା ତହସିଲ ଅନ୍ତର୍ଗତ ଡଙ୍କାରୀ କଳାପଥର ଖାଦାନରେ ରବିବାର ଚଢ଼ାଉ କରାଯାଇ କମ୍ପ୍ରେସର, ଟ୍ରାକ୍ଟର, ହାଇୱା, ହିଟାଚି ମେଶିନ ଆଦି ୧୦ ଗାଡ଼ି ଜବତ କରାଯାଇଛି। ଏଥିସହିତ ୫ ଜଣଙ୍କୁ ଅଟକ ରଖାଯାଇଛି। ଧରିତ୍ରୀରେ ଡଙ୍କାରୀରୁ ପୁଣି କଳାପଥର ଚୋରି ଶୀର୍ଷକ ଖବର ପ୍ରକାଶ ପାଇବା ପରେ ଜିଲାପାଳଙ୍କ ନିର୍ଦ୍ଦେଶରେ ଚଢାଉ ହୋଇଥିବା ସୂଚନା ମିଳିଛି। ଏହାସହ ବେଆଇନ ଭାବେ ଉତ୍ତୋଳନ ହୋଇଥିବା କଳାପଥର ରହିଛି ବୋଲି କୁହାଯାଇଛି। ତେବେ ଡଙ୍କାରୀରେ ପ୍ରାୟ ୨ ବର୍ଷ ହେବ କୋଟି କୋଟି ଟଙ୍କାର କଳାପଥର ଲୁଟ କରୁଥିବା ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇ ନ ଥିବା ଅଭିଯୋଗ ହୋଇଛି। ଡଙ୍କାରୀ ଆରଆଇଙ୍କ ରିପୋର୍ଟ ଆଧାରରେ ଧର୍ମଶାଳା ତହସିଲଦାର ତାଙ୍କ ପତ୍ରସଂଖ୍ୟା ୪୩୦୨/୨୧ା୧୨ା୨୦ରେ ଜେନାପୁର ଥାନାଧିକାରୀଙ୍କୁ ୩ ଜଣ ପଥର ମାଫିଆଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ନିର୍ଦ୍ଦେଶ ଦେଇଥିଲେ। ଏପରି କି ୩ଜଣ ଅଭିଯୁକ୍ତ ଡଙ୍କାରୀ ଗ୍ରାମର ରବି ଦାସ, ଚଢେଇଧରା ଗ୍ରାମର କୁନା ପୃଷ୍ଟି ଓ ଢେଙ୍କାନାଳ ଜିଲା ନାଜିଚୌକିଛକ ଗ୍ରାମର ସ୍ବରୂପାନନ୍ଦ ଦାସଙ୍କ ନାମରେ ମାମଲା ରୁଜୁ କରିବାକୁ ନିର୍ଦ୍ଦେଶ ହୋଇଥିଲା। ହେଲେ ଡଙ୍କାରୀରେ ଚଢ଼ାଉ କରି ରାଜସ୍ବ ଓ ପୋଲିସ ବାହାବାହା ନେବାକୁ ଉଦ୍ୟମ କରୁଥିବା ଅଭିଯୋଗକାରୀ ସର୍ବେଶ୍ୱର ବେହୁରା କହିଛନ୍ତି। ଚଢାଉ ସମୟରେ ଡଙ୍କାରୀରେ ୩୦ରୁ ଉର୍ଦ୍ଧ୍ୱ ଗାଡି ବେଆଇନ ଉତ୍ତୋଳନ କରୁଥିବାବେଳେ ନାମକୁ ମାତ୍ର ୧୦ଟି ଗାଡି ଜବତ କରାଯାଇଛି ବୋଲି ଚର୍ଚ୍ଚା ହେଉଛି। ଏ ସଂକ୍ରାନ୍ତରେ ଧର୍ମଶାଳା ତହସିଲଦାର ପ୍ରଶାନ୍ତ ସାମନ୍ତରାୟ କହିଛନ୍ତି, ବେଆଇନ କଳାପଥର ଉତ୍ତୋଳନ ସ୍ଥାନରେ ଚଢାଉ କରାଯାଇଛି। ଏଥିରେ କେଉଁମାନଙ୍କୁ ସାମିଲ କରାଯାଇଛି ତାର ବାଛବିଚାର କରାଯାଇ ନାହିଁ। ଅନ୍ୟପକ୍ଷରେ ଦୀର୍ଘ ବର୍ଷ ହେଲା ଡଙ୍କାରୀ ପାହାଡରେ କଳାପଥର ଲୁଟ କରୁଥିବା ପ୍ରମୁଖ ଲୋକଙ୍କୁ ଛାଡି ଚଢ଼ାଉ କରାଯାଇଥିବା କୁହାଯାଉଛି।
