Odisha Elections 2024

ନ୍ୟାୟିକ ବିଜୟ

ଏକ ଦଶନ୍ଧିରୁ ଅଧିକ ପୁରୁଣା ମାମଲାରେ ସୁପ୍ରିମକୋର୍ଟ ତାଙ୍କ ପୂର୍ବ ନିର୍ଦ୍ଦେଶକୁ ରଦ୍ଦକରି ଦିଲ୍ଲୀ ମେଟ୍ରୋ ରେଳ ନିଗମ (ଡିଏଏମ୍‌ଆର୍‌ସି)କୁ ଏକ ବଡ଼ ବିଜୟ ପ୍ରଦାନ କରିଛନ୍ତି। ଏହା ପୂର୍ବରୁ ଶୀର୍ଷ ଅଦାଲତ ଡିଏମ୍‌ଆର୍‌ସିଙ୍କୁ ଅନିଲ ଅମ୍ବାନୀଙ୍କ ଫାର୍ମ ଦିଲ୍ଲୀ ବିମାନବନ୍ଦର ମେଟ୍ରୋ ଏକ୍ସପ୍ରେସ୍‌ ଲିମିଟେଡ୍‌ (ଡିଏଏମ୍‌ଇପିଏଲ୍‌)କୁ ୮,୦୦୦ କୋଟି ଟଙ୍କା ଦେବାକୁ ନିର୍ଦ୍ଦେଶ ଦେଇଥିଲେ। କୋର୍ଟଙ୍କ ନିର୍ଦ୍ଦେଶ ପ୍ରତ୍ୟାହାର ନ୍ୟାୟର ଏକ ବଡ଼ ଦୁରୁପଯୋଗକୁ ଦର୍ଶାଉଛି। ଫଳସ୍ବରୂପ ଦିଲ୍ଲୀ ହାଇକୋର୍ଟରେ କାର୍ଯ୍ୟାନୁଷ୍ଠାନ ପ୍ରକ୍ରିୟା ବନ୍ଦ ହୋଇଗଲା ଏବଂ ଡିଏଏମ୍‌ଆର୍‌ସି ଅତ୍ୟଧିକ ବାଧ୍ୟତାମୂଳକ ଦେୟରୁ ବଞ୍ଚିତ ହେଲା। ତେବେ ଉଭୟ ପକ୍ଷଙ୍କୁ ସେମାନଙ୍କର ପୂର୍ବ ରାୟର ସ୍ଥିତିକୁ ଫେରାଇ ଆଣିବା ଲକ୍ଷ୍ୟ ରଖି ଡିଏଏମ୍‌ଆର୍‌ସି ଦ୍ୱାରା ଜମା ହୋଇଥିବା ଅର୍ଥ ଫେରସ୍ତ କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି। ଏହି ଆଇନଗତ ବିବାଦ ଦିଲ୍ଲୀ ବିମାନବନ୍ଦର ମେଟ୍ରୋ ଏକ୍ସପ୍ରେସ୍‌ ଲାଇନ ନିର୍ମାଣ, ପରିଚାଳନା ଏବଂ ତା’ର ରକ୍ଷଣାବେକ୍ଷଣ ପାଇଁ ୨୦୦୮ରୁ ହୋଇଥିବା ଏକ ରିହାତି ଚୁକ୍ତିରୁ ସୃଷ୍ଟି ହୋଇଥିଲା। ୨୦୧୨ରେ ଡିଏଏମ୍‌ଆର୍‌ସିର ଗଠନମୂଳକ ତ୍ରୁଟି ଦାବିକରି ଡିଏଏମ୍‌ଇପିଏଲ୍‌ ଚୁକ୍ତିନାମାକୁ ଶେଷ କଲାପରେ ବିବାଦ ବଢ଼ିଥିଲା। ୨୦୧୭ରେ ନ୍ୟାୟିକ ଲଢ଼େଇରେ ଡିଏଏମ୍‌ଇପିଏଲ୍‌ ଜିତିଥିଲା, ଅନୀଲ ଅମ୍ବାନୀ ଫାର୍ମକୁ ଡିଏଏମ୍‌ଆର୍‌ସି ୮,୦୦୦ କୋଟି ଟଙ୍କା ପ୍ରଦାନ କରିବାକୁ କୋର୍ଟ କହିଥିଲେ। ବର୍ତ୍ତମାନ ସେହି ମାମଲା ବନ୍ଦ ହୋଇଯାଇଛି। କିନ୍ତୁ ଏହି ନିଷ୍ପତ୍ତି ସରକାରୀ ଏବଂ ବେସରକାରୀ ସଂସ୍ଥା ସହ ଜଡ଼ିତ ମଧ୍ୟସ୍ଥତା ବିବାଦରେ ଥିବା ଜଟିଳତାକୁ ସୂଚିତକରେ। ୧୨ବର୍ଷ ଧରି ଚାଲିଥିବା ଏକ ମାମଲା ମଧ୍ୟ ଦର୍ଶାଏ ଯେ ଭାରତରେ ନ୍ୟାୟିକ ପ୍ରକ୍ରିୟା କେତେ ଲକ୍ଷ୍ୟ ବିହୀନ ଓ ମନ୍ଥର। ଆହୁରି ଗୁରୁତ୍ୱପୂର୍ଣ୍ଣ କଥା ହେଉଛି, ମାମଲାକୁ ପ୍ରଭାବୀ ଓ ସ୍ବଚ୍ଛ ଭାବେ ଉପସ୍ଥାପନ କରିବାରେ ସରକାରୀ ବାବୁମାନଙ୍କର ଉତ୍ତରଦାୟିତ୍ୱ ଏବଂ ସ୍ବଚ୍ଛତାର ଗମ୍ଭୀରତାକୁ ପ୍ରତିଫଳନ କରିଛି।

ମୃତ୍ୟୁର ତଦନ୍ତ ଦାବି

ନିକଟରେ ମେଘାଳୟରେ ଜଣେ ସହକର୍ମୀଙ୍କ ଆତ୍ମହତ୍ୟା ଯୋଗୁ ଭାରତୀୟ ବନ ସେବା (ଆଇଏଫ୍‌ଏସ୍‌) ଅଧିକାରୀମାନେ ବଡ଼ ସମସ୍ୟାରେ ପଡ଼ିଛନ୍ତି। ମୁଖ୍ୟ ବନ ସଂରକ୍ଷକ ଏନ୍‌. ଲୁଇଖାମ ନିକଟରେ ତାଙ୍କ ସରକାରୀ ବାସଭବନରେ ଆତ୍ମହତ୍ୟା କରିଛନ୍ତି। ଏହି ଦୁର୍ଭାଗ୍ୟଜନକ ଘଟଣାରେ ଆଇଏଫ୍‌ଏସ୍‌ ଆସୋସିଏସନର କେନ୍ଦ୍ରୀୟ ୟୁନିଟ୍‌ ଲୁଇଖାମ୍‌ଙ୍କ ମୃତ୍ୟୁର ଅନୁସନ୍ଧାନ ଏବଂ ତାଙ୍କୁ ଏଭଳି ନିଷ୍ପତ୍ତି ନେବାକୁ ପ୍ରେରିତ କରିଥିବା ବ୍ୟକ୍ତିଙ୍କ ଉପରେ ତଦନ୍ତ କରିବା ଲାଗି ଦାବି କରିଛି। ସୂଚନା ମୁତାବକ, ଆସୋସିଏସନର ସମ୍ପାଦକ ଜେନେରାଲ ସୁନୀଶ ବକ୍ସି ମେଘାଳୟର ମୁଖ୍ୟ ଶାସନ ସଚିବ ଡୋନ୍‌ଲାଣ୍ଡ ଫିଲିପ୍ସ ୱାହଲାଙ୍ଗ୍‌ଙ୍କୁ ଚିଠି ଲେଖି କହିଛନ୍ତି ଯେ ଗତ ମାସରେ ଜଣେ ଜୁନିୟର ମହିଳା ସହକର୍ମୀ ତାଙ୍କ ବିରୋଧରେ ମିଥ୍ୟା ଯୌନ ନିର୍ଯାତନା ଅଭିଯୋଗ ଆଣିଥିଲେ ଏବଂ ଏହି ଅଭିଯୋଗ ଯୋଗୁ ସେ ମାନସିକ ଆଘାତ ପାଇଥିଲେ। ଖଣି ଲବି ଉପରେ ଲୁଇଖାମ୍‌ କାର୍ଯ୍ୟାନୁଷ୍ଠାନ ନେବା ପରେ ସେମାନଙ୍କ ଚାପରେ ଏଭଳି ଅଭିଯୋଗ କରାଯାଇଥିବା କୁହାଯାଉଛି। ଅଧିକାରୀଙ୍କ ବିରୋଧରେ କୌଣସି ପ୍ରମୁଖ ପ୍ରମାଣ ନ ଥିବା ସତ୍ତ୍ୱେ ତାଙ୍କ ପ୍ରତିଷ୍ଠାରେ ଆଞ୍ଚ ଅଣାଯାଇଥିଲା। ଅଧିକାରୀଙ୍କ ମୃତ୍ୟୁର ପ୍ରଭାବ ସମଗ୍ର ଆଇଏଫ୍‌ଏସ୍‌ ଗୋଷ୍ଠୀ ମଧ୍ୟରେ ଗଭୀର ଭାବରେ ଅନୁଭୂତ ହୋଇଛି, ଯାହା ଦେଶବ୍ୟାପୀ ଅଧିକାରୀଙ୍କ ମନୋବଳକୁ ଏକ ଝଟକା ବୋଲି କୁହାଯାଇପାରେ। ଲୁଇଖାମ୍‌ଙ୍କ ଆତ୍ମହତ୍ୟା ଘଟଣାରେ ସିବିଆଇ ତଦନ୍ତ ପାଇଁ ଆସୋସିଏସନ ଦାବି କରିଛି। ଏଭଳି ଅଘଟଣ ପାଇଁ ପରିବେଶ ସୃଷ୍ଟିକରିବାରେ ଯେଉଁମାନେ ଉତ୍ତରଦାୟୀ ଓ ମୁଖ୍ୟ ଭୂମିକା ନେଇଛନ୍ତି ସେମାନଙ୍କ ବିରୋଧରେ ତୁରନ୍ତ ନିର୍ଣ୍ଣାୟକ ଭୂମିକା ନେବା ଲାଗି ଲୁଇଖାମ୍‌ଙ୍କ ପୂର୍ବ ସହକର୍ମୀମାନେ ଜିଦ ଧରିଛନ୍ତି।

ଇସିଙ୍କ ଚାପ

ଗୁଜରାଟ ସରକାରଙ୍କ ଉପରେ ନିର୍ବାଚନ ଆୟୋଗ (ଇସିଆଇ) ଧ୍ୟାନ ଦେଇଛି। ୨୬ ଲୋକ ସଭା ଆସନ ଏବଂ ୫ ବିଧାନସଭା ଆସନ ପାଇଁ ନାମାଙ୍କନ ଚାଲିଥିବାବେଳେ ରାଜ୍ୟରେ ଖାଲିଥିବା ପଦବୀ ପୂରଣ ପାଇଁ ଆଇପିଏସ୍‌ ଅଧିକାରୀଙ୍କ ତାଲିକା ଶୀଘ୍ର ଦାଖଲ କରିବାକୁ ରାଜ୍ୟ ସରକାରଙ୍କୁ ନିର୍ବାଚନ କମିଟି ନିର୍ଦ୍ଦେଶ ଦେଇଛନ୍ତି। ନିର୍ବାଚନ ଆଚରଣ ବିଧି ଲାଗୁହେବା ପରେ ଏହି ପଦକ୍ଷେପ ନିଆଯାଇଛି, ଯେଉଁଥିରେ କୌଣସି ନିଯୁକ୍ତି କିମ୍ବା ପଦୋନ୍ନତି ଦେବା ପୂର୍ବରୁ ରାଜ୍ୟ ସରକାର ନିର୍ବାଚନ ଆୟୋଗଙ୍କ ଅନୁମୋଦନ ନେବା ବାଧ୍ୟତାମୂଳକ। ନିର୍ବାଚନ ପ୍ରକ୍ରିୟାରେ କୌଣସି ଅନୁଚିତ ପ୍ରଭାବ ରୋକିବା ଏହି ପଦକ୍ଷେପର ଲକ୍ଷ୍ୟ। ମାସରୁ ଅଧିକ ସମୟ ଧରି ସୁରଟ ପୋଲିସ କମିଶନର ଏବଂ ୩ ରେଞ୍ଜ ଇନ୍ସପେକ୍ଟର ଜେନେରାଲଙ୍କ ପଦବୀ ଖାଲି ପଡ଼ିଛି। ଏହା ସହ ଖେଦା ଓ ମେହସାନାର ଏସ୍‌ପି ପଦବୀ ୨ ମାସ ହେଲା ଖାଲି ରହିଛି। ପର୍ଯ୍ୟବେକ୍ଷକମାନେ କହନ୍ତି, ଏହି ବିଳମ୍ବର ବିଭିନ୍ନ କାରଣ ଦର୍ଶାଯାଇଛି । ଯେପରିକି ଗତ ବର୍ଷ କେନ୍ଦ୍ରୀୟ ଡେପୁଟେଶନରେ କାର୍ଯ୍ୟ କରୁଥିବା ୪ଜଣ ଆଇପିଏସ୍‌ ଅଧିକାରୀ ଏବଂ ଗୋଟିଏ ଲୋକ ସଭା ନିର୍ବାଚନମଣ୍ଡଳୀରେ ୩ ବର୍ଷ ଲାଗି କାର୍ଯ୍ୟକାଳ ବୃଦ୍ଧି କରାଯାଇ ନିର୍ବାଚନ ଆୟୋଗଙ୍କ ଦ୍ୱାରା ୫ଜଣ ଅଧିକାରୀଙ୍କୁ ଲିଭ୍‌ ରିଜର୍ଭରେ ରଖାଯାଇଥିଲା। ଅବଶ୍ୟ, ବିଳମ୍ବ ପାଇଁ ଅନ୍ୟ ଏକ କାରଣ ଥିଲେ ବି ସ୍ପଷ୍ଟ ଭାବରେ ଉଲ୍ଲେଖ କରାଯାଇ ନାହିଁ। ଗୁଜରାଟର ବରିଷ୍ଠ ସରକାରୀ ନିଯୁକ୍ତି କେବଳ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ (ପିଏମ୍‌ଓ)ର ସବୁଜ ସଙ୍କେତ ପରେ ହିଁ କରାଯାଇଥାଏ। କିନ୍ତୁ ଏବେ ନିର୍ବାଚନ ଆୟୋଗ ଏହି ନିଯୁକ୍ତିକୁ କାର୍ଯ୍ୟକାରୀ କରିବେ।
Email: dilipcherian@gmail.com


Enter your email to get our daily news in your inbox.

All Right Reserved By Dharitri.Com

ଏଇ ଭାରତରେ

ବୟସ ୮୭, ତଥାପି ଏହି ବୟସରେ ସଡ଼କ ଦୁର୍ଘଟଣାରେ ଜୀବନ ବଞ୍ଚାଇବା ଲାଗି ପ୍ରଶିକ୍ଷଣ କାର୍ଯ୍ୟକ୍ରମ ଜାରି ରଖିଛନ୍ତି ରାଜସ୍ଥାନର ଡ. ମାୟା ଟଣ୍ଡନ। ସେ...

ଗ୍ରୀଷ୍ମରେ ଛାୟାଦ୍ରୁମ

ଡ. ଶରତ ଚନ୍ଦ୍ର ପରିଡ଼ା   ପ୍ରଚଣ୍ଡ ଗ୍ରୀଷ୍ମରେ ଶୀତଳ ଛାଇ ଟିକିଏ ମିଳିଗଲେ ସତେ କି ଅମୃତ! ମଝିରେ ମଝିରେ ଝଡ଼ବତାସ ଆସି ପୁରୁଣାକାଳିଆ...

ଅକାଳ ପକ୍ବ ଫଳ ଅମୃତ ନା ବିଷ

ଡ. ଚିନ୍ତାମଣି ପଣ୍ଡା   ଋତୁକାଳୀନ ଫଳ ଓ ପନିପରିବା ସବୁ ବର୍ଷର ଭିନ୍ନ ଭିନ୍ନ ଋତୁରେ ବଜାରକୁ ଆସିଥାଏ। ଯେଉଁ ସମୟରେ ଯେଉଁ ଫଳଟି...

ନୈରାଶ୍ୟର ପ୍ରତିବାଦ

ସ୍ଲାଭୋଜ୍‌ ଜିଜେକ୍‌   ଏବେ ଅତି ଖରାପ ସମୟ ପଡ଼ିଛି। ପ୍ରକୃତିରେ ଶାନ୍ତି ଓ ସ୍ଥିରତାରେ ବ୍ୟାଘାତ ଘଟୁଛି। ବାରମ୍ବାର ଦୁବାଇରେ ପ୍ରବଳ ବର୍ଷା କିମ୍ବା...

ମିଶୁ ମୋର ଦେହ ଏ ଦେଶ ମାଟିରେ

ବର୍ତ୍ତମାନ ଚାରିଆଡ଼େ ନିର୍ବାଚନର ମାହୋଲ। ସବୁଠି ନେତାମାନଙ୍କର ମାଳ ମାଳ ପ୍ରତିଶ୍ରୁତିର ସ୍ବର। ଦୂରଦର୍ଶନ ହେଉ ବା ସାମାଜିକ ଗଣମାଧ୍ୟମ, ଯେକୌଣସି ପ୍ଲାଟ୍‌ଫର୍ମ ହେଉ ସବୁଠି...

ଚାରି ଦୁଆର ଓ ରତ୍ନ ଭଣ୍ଡାର

ପୁରୀ ସହର ବା ଜିଲା ନୁହେଁ ବରଂ ରାଜ୍ୟ ଓ ରାଜ୍ୟ ବାହାରେ ଏପରି କି ବିଦେଶରେ ରହୁଥିବା ସମସ୍ତ ଶ୍ରୀଜଗନ୍ନାଥପ୍ରେମୀଙ୍କ ମନରେ ଶ୍ରୀମନ୍ଦିରର ଚାରି...

ଏଇ ଭାରତରେ

ଉତ୍ତରାଖଣ୍ଡରେ ପାଇନ ଗଛର ଶୁଷ୍କପତ୍ର (ପାଇନ ନିଡଲ୍ସ) ବନାଗ୍ନିର ଏକ ବଡ଼ କାରଣ ବୋଲି କୁହାଯାଉଛି। ଏହା ବର୍ଷ ବର୍ଷ ଧରି ଗଛମୂଳରେ ଜମା ହୋଇ...

ସମୟାନ୍ତରେ ରାମାୟଣ

ଗଙ୍ଗା ନଦୀ ଅବବାହିକାରେ ଭାରତର ୫୦ ପ୍ରତିଶତ ଭୋଟର ରହନ୍ତି। ତେଣୁ ହିନ୍ଦୁତ୍ୱବାଦୀ ରାଜନେତାମାନଙ୍କ ପାଇଁ ରାମାୟଣ ବିଶେଷକରି ତୁଳସୀ ଦାସ ରଚିତ ରାମଚରିତ ମାନସ...

Advertisement

ଧରିତ୍ରୀ କାର୍ଟୁନ

Archives
Model This Week

ପିଲାଙ୍କ ଧରିତ୍ରୀ

Why Dharitri