ନୂଆଦିଲ୍ଲୀ,୩୦।୫: ଦିଲ୍ଲୀ ସାକେତ୍ କୋର୍ଟର ୪୨ ବର୍ଷୀୟା ମହିଳା ବିଚାରପତିଙ୍କ ମୃତଦେହ ଦକ୍ଷିଣ ଦିଲ୍ଲୀ ରାଜପୁର ଅଞ୍ଚଳରେ ଥିବା ତାଙ୍କ ଭାଇଙ୍କ ଘରୁ ଝୁଲନ୍ତା ଅବସ୍ଥାରେ ମିଳିଛି। ମହିଳା ବିଚାରପତି ତାଙ୍କ ସ୍ବାମୀ ଅଶୋକ ବେନିଓ୍ବାଲଙ୍କ ସହ ସାକେତ୍ କୋର୍ଟ ରେସିଡେନ୍ସିଆଲ କମ୍ପ୍ଲେକ୍ସରେ ରହୁଥିଲେ। ଅଶୋକ ମଧ୍ୟ ବିଚାରପତି ଅଛନ୍ତି।
ମହିଳା ବିଚାରପତି ଜଣଙ୍କ ଶୁକ୍ରବାରଠାରୁ ନିଖୋଜ ଥିଲେ। ଏନେଇ ତାଙ୍କ ସ୍ବାମୀ ପୋଲିସକୁ ଫୋନ୍ କରି ଜଣାଇଥିଲେ। ସାକେତ୍ ଥାନା ପୋଲିସ ଏକ ନିଖୋଜ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ସିସିଟିଭି ଫୁଟେଜ୍ ଅନୁଧ୍ୟାନ ପରେ ଏକ ଅଟୋରିକ୍ସା ଉପରେ ପୋଲିସ ସନ୍ଦେହ କରି ଡ୍ରାଇଭରଙ୍କୁ ଜେରା କରିଥିଲା। ସେ ମହିଳା ବିଚାରପତିଙ୍କୁ ରାଜପୁର ଖୁର୍ଦ ଅଞ୍ଚଳରେ ଛାଡ଼ିଥିବା ପୋଲିସ ଆଗରେ କହିଥିଲେ। ଏହା ପରେ ପୋଲିସ ଅଶୋକଙ୍କ ସହ ଯୋଗାଯୋଗ କରି ଉକ୍ତ ଅଞ୍ଚଳରେ ମହିଳା ବିଚାରପତିଙ୍କ ଭାଇ ରହୁଥିବା ଜାଣିବାକୁ ପାଇଥିଲେ। ଅଶୋକଙ୍କୁ ନେଇ ପୋଲିସ ଟିମ୍ ପହଞ୍ଚି ଘର ସିଲିଂ ଫ୍ୟାନ୍ରୁ ମହିଳା ବିଚାରପତିଙ୍କ ମୃତଦେହ ଝୁଲୁଥିବା ଦେଖିବାକୁ ପାଇଥିଲେ। ଆତ୍ମହତ୍ୟାର ପ୍ରକୃତ କାରଣ ଜଣାପଡ଼ି ନାହିଁ। ପୋଲିସ ଘଟଣାର ତଦନ୍ତ ଚଳାଇଛି।
