ନୂଆଦିଲ୍ଲୀ,୯।୨: ଲଗାତାର ତିନୋଟି ଟେଷ୍ଟ ଜିତିବାର ସଫଳତା ହାସଲ କରିଛି ଇଂଲଣ୍ଡ ଟିମ୍। ପ୍ରଥମେ ଶ୍ରୀଲଙ୍କାକୁ ଦୁଇଟି ଟେଷ୍ଟରେ ପରାଜିତ କରିବା ପରେ ଭାରତ ବିପକ୍ଷରେ ଖେଳୁଥିବା ପ୍ରଥମ ଟେଷ୍ଟ ମ୍ୟାଚ୍ରେ ୨୨୭ରନ୍ର ବିଶାଳ ବିଜୟ ହାସଲ କରିଛି ଇଂଲଣ୍ଡ ଦଳ। ଏହି ତିନୋଟି ଯାକ ମୁକାବିଲାରେ ଉଲ୍ଲେଖନୀୟ ପ୍ରଦର୍ଶନ କରି ବାହା ବାଃ ସାଉଁଟିଛନ୍ତି ଇଂଲଣ୍ଡ ଅଧିନାୟକ ଜୋ ରୁଟ୍। ସେ ଚେନ୍ନାଇ ଟେଷ୍ଟରେ ଦଳର ବିଜୟ ନେଇ ମଙ୍ଗଳବାର ପ୍ରତିକ୍ରିୟା ରଖିଛନ୍ତି।
ରୁଟ୍ କହିଛନ୍ତି, ତାଙ୍କ ଦଳ ନୂତନ ମାନଦଣ୍ଡ ନିର୍ଦ୍ଧାରିତ କରିଛି। ଶ୍ରୀଲଙ୍କାରେ ସ୍ପିନ୍ ଉପଯୋଗୀ ଓ୍ବିକେଟ୍ରେ ଖେଳିବା ତାଙ୍କ ପାଇଁ ଭାରତ ବିପକ୍ଷ ପ୍ରସ୍ତୁତିରେ ସହାୟକ ହୋଇଛି। ଏଣୁ ଦଳର ପ୍ରଦର୍ଶନ ପାଇଁ ସେ ଗର୍ବିତ। ନୂତନ ଉପଲବ୍ଧି ହାସଲ କରିଥିଲେ ହେଁ ଅନେକ କିଛି ଦିଗରେ ଭଲ ପ୍ରଦର୍ଶନ କରିବାକୁ ହେବ। ଏହି ଟେଷ୍ଟଠାରୁ ଭଲ ପ୍ରଦର୍ଶନ ଦଳ କରିପାରିବ। ତାଙ୍କ ଟିମ୍ରେ ମହାନ ଖେଳାଳି ଅଛନ୍ତି। ଆଗାମୀ ମ୍ୟାଚ୍ରେ ଦଳ ଏହାର ପୁନରାବୃତ୍ତି କରିପାରିବ। ଏହାଠାରୁ ଭଲ ଖେଳି ପାରିବ। ତେବେ ଏହା ଏକ ଆହ୍ବାନ ହେବ ବୋଲି ସେ କହିଛନ୍ତି।
