ନୂଆଦିଲ୍ଲୀ,୭।୨ : ଚାକିରି ସନ୍ତୁଷ୍ଟି ବା ଜବ୍ ସାଟିସଫିକେଶନ କେତେକଙ୍କ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ରହିଥାଏ। ନିଜ ପସନ୍ଦର ଚାକିରି ନ ମିଳିଲେ ସେମାନଙ୍କୁ ସନ୍ତୋଷ ମିଳି ନ ଥାଏ। ଏହାର ସଦ୍ୟତମ ଉଦାହରଣ ଏବେ ଦେଖିବାକୁ ମିଳିଛି। ସିଧାସଳଖ ନିଯୁକ୍ତି ମାଧ୍ୟମରେ କେନ୍ଦ୍ରୀୟ ଅର୍ଦ୍ଧସୈନିକ ବାହିନୀରେ ଆସିଷ୍ଟାଣ୍ଟ କମାଣ୍ଡାଣ୍ଟ ଭାବରେ ନିଯୁକ୍ତ ହେବା ଗର୍ବର ବିଷୟ ବୋଲି କୁହାଯାଇ୍ଥାଏ।
ତେବେ ପ୍ରାୟ ଏକ ଦଶନ୍ଧି ଧରି ଯୁବ ଅଧିକାରୀମାନେ ଏହି ଫୋର୍ସରେ ଚାକିରି ଛାଡିଥିବାର ନଜିର ରହିଛି। ଫୋର୍ସର ପୂର୍ବତନ ଅଧିକାରୀମାନେ ଏହାର ମୁଖ୍ୟ କାରଣ ଭାବରେ ପଦୋନ୍ନତିରେ ବିଳମ୍ବକୁ ଦର୍ଶାଇଛନ୍ତି। ପଦୋନ୍ନତି ପାଇଁ କ୍ୟାଡର ଅଧିକାରୀମାନଙ୍କୁ ଏକ ଲମ୍ବା କୋର୍ଟ ଲଢ଼େଇ କରିବାକୁ ପଡିଥାଏ। ତେବେ ବିଏସଏଫ ଗେଜେଟେଡ ଅଫିସର୍ ଆସିଷ୍ଟାଣ୍ଟ କମାଣ୍ଡାଣ୍ଟ ଚାକିରି ଛାଡି ପୁଣିଥରେ ଦିଲ୍ଲୀ ପୋଲିସରେ ହାବିଲଦାର ହେବା ଏବେ ଏକ ଚର୍ଚ୍ଚାର ବିଷୟ ପାଲଟିଛି। ସୋସିଆଲ ମିଡିଆରେ ଦିଲ୍ଲୀ ପୋଲିସର ଚିଠି ମଧ୍ୟ ଭାଇରାଲ ହୋଇଛି ଯେଉଁଥିରେ ଆସିଷ୍ଟାଣ୍ଟ କମାଣ୍ଡାଣ୍ଟ ବିବେକଙ୍କ ଇସ୍ତଫା ଏବଂ ଦିଲ୍ଲୀ ପୋଲିସକୁ ଫେରିବା ପାଇଁ ନିର୍ଦ୍ଦେଶ ଜାରି କରାଯାଇଛି।
ବିବେକ ଦିଲ୍ଲୀ ପୋଲିସରେ ହାବିଲଦାର (ମିନିଷ୍ଟ୍ରରିଆଲ) ଭାବରେ କାର୍ଯ୍ୟ କରୁଥିଲେ। ଯେତେବେଳେ ତାଙ୍କୁ ଦିଲ୍ଲୀ ପୋଲିସ ଏକାଡେମୀରେ ପୋଷ୍ଟ କରାଯାଇଥିଲା, ସେତେବେଳେ ସେ ଆସିଷ୍ଟାଣ୍ଟ କମାଣ୍ଡାଣ୍ଟ ପାଇଁ ୟୁପିଏସସି ପରୀକ୍ଷା ପାଇଁ ପ୍ରସ୍ତୁତି ଆରମ୍ଭ କରିଥିଲେ। ତାଙ୍କର କଠିନ ପରିଶ୍ରମ ସଫଳ ହୋଇଥିଲା ଏବଂ ସେ ସିଏପିଏଫରେ ମନୋନୀତ ହେଲେ। ସେ ବିଏସଏଫରେ ଆସିଷ୍ଟାଣ୍ଟ କମାଣ୍ଡାଣ୍ଟ ନିଯୁକ୍ତ ହୋଇଥିଲେ। ୨୨ ସେପ୍ଟେମ୍ବର ୨୦୨୨ ରେ ଦିଲ୍ଲୀ ପୋଲିସ ମଧ୍ୟ ତାଙ୍କ ଇସ୍ତଫା ଗ୍ରହଣ କରିଥିଲେ।
ବିବେକଙ୍କ ପ୍ରଶିକ୍ଷଣ ବିଏସଏଫରେ ଆରମ୍ଭ ହୋଇଥିଲା। ଟ୍ରେନିଂ ସମୟରେ ଏପରି କିଛି ଘଟିଥିଲା ଯାହାଦ୍ୱାରା ସେ ଦିଲ୍ଲୀ ପୋଲିସର ହାବିଲଦାର କାମକୁ ପସନ୍ଦ କରିବା ଆରମ୍ଭ କରିଥିଲେ। ସେ ୨୦ ଜାନୁୟାରୀ ୨୦୨୩ ରେ ବିଏସଏଫ ରୁ ଇସ୍ତଫା ଦେଇଥିଲେ। ଏହା ପରେ ବିବେକ ସିସିଏସ ପେନସନ ନିୟମ ୧୯୭୨ ର ଏଫଆର ୧୩ ଏବଂ ନିୟମ ୨୬ ଅନୁଯାୟୀ ଦିଲ୍ଲୀ ପୋଲିସରେ ପୁଣି ଯୋଗଦାନ ପାଇଁ ଆବେଦନ କରିଥିଲେ। ଦିଲ୍ଲୀ ପୋଲିସ ତାଙ୍କ ଆବେଦନକୁ ଗ୍ରହଣ କରିଥିଲେ। ଏହି ପରିପ୍ରେକ୍ଷୀରେ ଡେପୁଟି ଡାଇରେକ୍ଟର / ଆଡମିନିଷ୍ଟ୍ରେଶନ, ଦିଲ୍ଲୀ ପୋଲିସ ଏକାଡେମୀ ଦ୍ୱାରା ଏକ ନିର୍ଦ୍ଦେଶନାମା ୨ ଫେବୃୟାରୀରେ ଜାରି କରାଯାଇଥିଲା। ବିବେକ ଗେଜେଟେଡ ଅଫିସର ଚାକିରି ଛାଡି ପୁଣି ହାବିଲଦାର ଚାକିରିରେ ଯୋଗ ଦେଇଥିଲେ। ତାଙ୍କୁ ଦିଲ୍ଲୀ ପୋଲିସ ଏକାଡେମୀ, ଝୌଦୋଡା କାଲାନରେ ପୋଷ୍ଟିଂ କରାଯାଇଛି।
