ସୁନ୍ଦରଗଡ଼, ୧୭।୪ (ଡି.ଏନ୍.ଏ): ସୁନ୍ଦରଗଡ ସରକାରୀ ମେଡିକାଲ କଲେଜରେ ବିଭିନ୍ନ ପଦବୀରେ ଚାକିରି କରାଇଦେବା ନାଁରେ ଠକେଇ ମାମଲାରେ ଟାଉନ ଥାନା ପୋଲିସ ରବିବାର ୫ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ସଦର ଥାନା ତସଲାଡିହି ଗ୍ରାମର ମୁଖ୍ୟ ଅଭିଯୁକ୍ତ ସୁଶାନ୍ତ ମାଝୀ, କାଲୋବାହାଲର ଚୈତନ୍ୟ ତନ୍ତୀ, ମହୁଲପାଲିର ମଦନ ଗର୍ଡିଆ, ଶଙ୍କରାର ଜେରକ୍ସ ଦୋକାନୀ ଆଶିଷ ନାଏକ ଏବଂ ସୋମନାଥ ପୃଷେଠ। ପୋଲିସ ସେମାନଙ୍କ ନିକଟରୁ କମ୍ପ୍ୟୁଟର, ପ୍ରିଣ୍ଟର ଓ ଜାଲ୍ କାଗଜପତ୍ର ଆଦି ଜବତ କରିଛି। ଗିରଫ ସମସ୍ତ ଅଭିଯୁକ୍ତଙ୍କୁ ସୋମବାର କୋର୍ଟଚାଲାଣ କରାଯିବ ବୋଲି ପୋଲିସ ସୂଚନା ଦେଇଛି।
ପୋଲିସ ସୂଚନା ଅନୁସାରେ, ଅଭିଯୁକ୍ତମାନେ ପ୍ରଥମେ ସୁନ୍ଦରଗଡ ସରକାରୀ ମେଡିକାଲ କଲେଜରେ ସୁପରଭାଇଜର, ରିଶେପସନିଷ୍ଟ, ସିକ୍ୟୁରିଟି ଗାର୍ଡ ଓ ମେଡିକାଲ ସହାୟକ ପଦବୀରେ ଚାକିରି କରାଇଦେବାକୁ ଗ୍ରାମାଞ୍ଚଳର ବେକାର ଯୁବତୀଯୁବକମାନଙ୍କୁ ପ୍ରଲୋଭନ ଦେଖାଇଥିଲେ। ଏଥିପାଇଁ ସେମାନେ ଯୁବତୀଯୁବକମାନଙ୍କଠାରୁ ୪୦ହଜାରରୁ ଆରମ୍ଭ କରି ଦେଢଲକ୍ଷ ଟଙ୍କା ପର୍ଯ୍ୟନ୍ତ ନେଇଥିଲେ ଏବଂ ଓଡିଶା ସରକାରଙ୍କ ଲୋଗୋ ଥାଇ ମେଡିକାଲ କଲେଜର ଡିନ୍ ପ୍ରଫେସର ଦୈତାରୀ ରାଉରତାୟଙ୍କ ଦସ୍ତଖତ ଜାଲ୍ କରି ନିଯୁକ୍ତିପତ୍ର, ଅଫିସ ନିଯୁକ୍ତି ଆଦେଶନାମା ଓ ପରିଚୟପତ୍ର ପ୍ରଦାନ କରିଥିଲେ। ତେବେ ବନ୍ଧପାଲି ଗ୍ରାମର ଜୟନ୍ତ ଚାନ୍ଦ ତାଙ୍କଠାରୁ ଏଭଳି ଠକେଇ କରି ଟଙ୍କା ଆଦାୟ କରାଯାଇଥିବା ନେଇ ସୁନ୍ଦରଗଡ ଟାଉନ ଥାନାରେ ଅଭିଯୋଗ କରିଥିଲେ। ଉକ୍ତ ଅଭିଯୋଗକୁ ଭିତ୍ତି କରି ପୋଲିସ ଏକ ଠକେଇ ମାମଲା (ନଂ.୯୧।୨୩) ରୁଜୁ କରିଥିଲା ଏବଂ ଏସ୍ପି ପ୍ରତ୍ୟୁଷ ଦିବାକରଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଟାଉନ ଥାନା ଆଇଆଇସି ସୁଶାନ୍ତ କୁମାର ପରିଡା ମାମଲାର ତଦନ୍ତ ଆରମ୍ଭ କରିଥିଲେ। ତଦନ୍ତ ବେଳେ ଅଭିଯୁକ୍ତ ଚୈତନ୍ୟ ତନ୍ତୀ ମେଡିକାଲ କଲେଜର କର୍ମଚାରୀ ବୋଲି ଜଣାପଡିଥିଲା। ମୁଖ୍ୟ ଅଭିଯୁକ୍ତ ତାଙ୍କୁ ହାତ କରି ଅଞ୍ଚଳର ପ୍ରାୟ ୫୦ଜଣଙ୍କଠାରୁ ଲକ୍ଷ ଲକ୍ଷ ଟଙ୍କା ଠକି ନେଇଥିବା ପୋଲିସ ତଦନ୍ତ ପରେ ଜଣାପଡିଛି।
