ବେଜିଂ,୨୪ା୫: ଫେବୃୟାରୀ ୨୪ରେ ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍ ନିଜ ସୈନ୍ୟଙ୍କୁ ୟୁକ୍ରେନ୍ ଉପରେ ଆକ୍ରମଣ କରିବାକୁ ନିର୍ଦ୍ଦେଶ ଦେଇଥିଲେ। ଏହି ‘ସ୍ବତନ୍ତ୍ର ସାମରିକ ଅଭିଯାନ’କୁ ଆମେରିକା ସମେତ ପାଶ୍ଚାତ୍ୟ ରାଷ୍ଟ୍ରଗୁଡ଼ିକ ବିରୋଧ କରିଆସିଥିବାବେଳେ ରୁଷିଆକୁ ଚାଇନା ସମର୍ଥନ ଜାରି ରଖିଛି। ଏହା ପଛରେ ଚାଇନାର ଅଭିସନ୍ଧି ହେଉଛି ବେଜିଂ ତାଇଓ୍ବାନ୍କୁ ଦଖଲ ଉଦ୍ୟମ କଲେ ରୁଷିଆର ସମର୍ଥନ ହାସଲ କରିବା। ରୁଷିଆ-ୟୁକ୍ରେନ୍ ଯୁଦ୍ଧକୁ ୩ ମାସ ପୂରିଥିବାବେଳେ ଚାଇନାର ସମ୍ଭାବ୍ୟ ତାଇଓ୍ବାନ୍ ଆକ୍ରମଣକୁ ନେଇ ଏକ ଅଡିଓ କ୍ଲିପ୍ ପ୍ରଘଟ ହୋଇଛି। ଚାଇନାର ଯୁଦ୍ଧ ଯୋଜନା ସମ୍ପର୍କରେ ରୋଡ୍ମ୍ୟାପ୍କୁ କିପରି କାର୍ଯ୍ୟକାରୀ କରାଯିବ, ସେନେଇ କମ୍ୟୁନିଷ୍ଟ ପାର୍ଟି ଅଫ୍ ଚାଇନା (ସିପିସି) ଏବଂ ପିପୁଲ୍ସ ଲିବରେଶନ୍ ଆର୍ମି (ପିଏଲ୍ଏ) ମଧ୍ୟରେ ହୋଇଥିବା ଆଲୋଚନାର ଏହି କ୍ଲିପ୍ ସାମ୍ନାକୁ ଆସିବା ପରେ ହଇଚଇ ସୃଷ୍ଟି ହୋଇଛି। ଚାଇନା ରାଷ୍ଟ୍ରପତି ଶି ଜିନ୍ପିଙ୍ଗ୍ଙ୍କ ଭିତିରି ସାମରିକ ଅଭିଯାନକୁ ଧରାପକାଇବା ପାଇଁ ସିପିସିର ବରିଷ୍ଠ ଅଧିକାରୀମାନେ ଏହାକୁ ପ୍ରଘଟ କରିଥିବା କୁହାଯାଉଛି।
ଚାଇନା ଜନ୍ମିତ ମାନବାଧିକାର କର୍ମୀ ଜେନିଫର ଜେଙ୍ଗ୍ ଟୁଇଟ୍ କରିଥିବା ଏକ ଅଡିଓ କ୍ଲିପ୍ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ସିପିସି-ପିଏଲ୍ଏର ଏକ ଉଚ୍ଚସ୍ତରୀୟ ବୈଠକରେ ଗୁଆଙ୍ଗ୍ଡୋଙ୍ଗ୍ର ପାର୍ଟି ସେକ୍ରେଟାରି, ଡେପୁଟି ସେକ୍ରେଟାରି, ଗଭର୍ନର ଓ ଭାଇସ୍ ଗଭର୍ନର ସାମିଲ ଥିଲେ। ମେଜର ଜେନେରାଲ ଝୋଉ ହେ, ଗୁଆଙ୍ଗ୍ଡୋଙ୍ଗ୍ ମିଲିଟାରି ରିଜିୟନ୍ କମାଣ୍ଡର, ଗୁଆଙ୍ଗ୍ଡୋଙ୍ଗ୍ ପ୍ରୋଭିନ୍ସିଆଲ କମିଟିର ଷ୍ଟାଣ୍ଡିଂ କମିଟି ସଦସ୍ୟ ଓ୍ବାଙ୍ଗ୍ ଶୋଉଜିନ୍ଙ୍କ ସମେତ ପିଏଲ୍ଏର ଅନ୍ୟ କେତେଜଣ ବରିଷ୍ଠ ଅଧିକାରୀ ମଧ୍ୟ ବୈଠକରେ ଉପସ୍ଥିତ ଥିଲେ। ତାଇଓ୍ବାନ୍ ସେନାକୁ ଧ୍ୱଂସ କରିବା ଓ ଯୁଦ୍ଧ ପାଇଁ ପଛଘୁଞ୍ଚା ନ ଦେବା, ଚାଇନାର ଜାତୀୟ ସାର୍ବଭୌମତ୍ୱ ତଥା କ୍ଷେତ୍ରୀୟ ଅଖଣ୍ଡତାକୁ ବଜାୟ ରଖିବା ପାଇଁ ରାଷ୍ଟ୍ରପତି ଶି ଜିନ୍ପିଙ୍ଗ୍ଙ୍କ ରଣନୈତିକ ନିଷ୍ପତ୍ତିକୁ କିପରି କାର୍ଯ୍ୟକାରୀ କରାଯିବ ସେନେଇ ଉକ୍ତ ଗୁପ୍ତ ବୈଠକରେ ଆଲୋଚନା ହୋଇଥିଲା। ସେହିପରି ଯୁଦ୍ଧ ପାଇଁ କେଉଁ କମ୍ପାନୀଗୁଡ଼ିକ ଅଧିକରୁ ଅଧିକ ଡ୍ରୋନ୍, ବୋଟ୍ ଓ ଅନ୍ୟ ଯୁଦ୍ଧ ଉପକରଣ ନିର୍ମାଣ କରିପାରିବେ, ତାହାର ମଧ୍ୟ ଏକ ତାଲିକା ପ୍ରସ୍ତୁତ କରାଯାଇଥିଲା। ଇଷ୍ଟର୍ନ ଓ ସଦର୍ନ ଓ୍ବାର୍ଜୋନ୍ ପକ୍ଷରୁ ଗୁଆଙ୍ଗ୍ଡୋଙ୍ଗ୍କୁ ମୋଟ ୨୦ଟି ବର୍ଗର ଓ ୨୩୯ ଉପକରଣ ପ୍ରସ୍ତୁତ କରିବାକୁ ଦାୟିତ୍ୱ ନ୍ୟସ୍ତ କରାଯାଇଥିଲା। ୧.୪୦ ଲକ୍ଷ ପିଏଲ୍ଏ ସୈନ୍ୟ, ୯୫୩ ଯୁଦ୍ଧଜାହାଜ, ୧,୬୫୩ ଡ୍ରୋନ୍, ୨୦ ବିମାନବନ୍ଦର, ୬ ମରାମତି ଓ ଜାହାଜ ନିର୍ମାଣ ୟାର୍ଡ, ୧୪ ଏମର୍ଜେନ୍ସି ଟ୍ରାନ୍ସଫର ସେଣ୍ଟର ଆଦି ଏଥିରେ ଅନ୍ତର୍ଭୁକ୍ତ। ୫୭ ମିନିଟ୍ର ଏହି କ୍ଲିପ୍କୁ ୟୁଟ୍ୟୁବ୍ ଚ୍ୟାନେଲ ଏଲ୍ୟୁଡିଇ ମିଡିଆ ପକ୍ଷରୁ ପୋଷ୍ଟ କରାଯିବା ପରେ ବେଜିଂର ଅଡ଼ୁଆ ବଢ଼ିଛି। ତାଇଓ୍ବାନ୍ ଦଖଲ ପାଇଁ ଜିନ୍ପିଙ୍ଗ୍ଙ୍କ ସାମରିକ ଯୋଜନାକୁ ଧରାପକାଇବା ପାଇଁ ସିପିସିର ବରିଷ୍ଠ ଅଧିକାରୀମାନେ ଏହାକୁ ପ୍ରଘଟ କରିଥିବା ଉକ୍ତ ୟୁଟ୍ୟୁବ୍ ଚ୍ୟାନେଲ କହିଛି।
