ଓ୍ବେଲିଂଟନ୍, ୧୮ା୧ (ପି.ଟି.)-ନ୍ୟୁଜିଲାଣ୍ଡ ଅଲରାଉଣ୍ଡର ଜିମ୍ମି ନିଶାମଙ୍କ ମଧ୍ୟମା ଆଙ୍ଗୁଠିରେ ଶନିବାର ଅସ୍ତ୍ରୋପଚାର ହୋଇଛି। କ୍ରିକେଟ ଓ୍ବେଲିଂଟନ ତରଫରୁ ଏହା ଘୋଷଣା କରାଯାଇଛି। ସପ୍ତାହକ ମଧ୍ୟରେ ଜଣେ ହ୍ୟାଣ୍ଡ୍ ସ୍ପେଶାଲିଷ୍ଟଙ୍କ ଦ୍ୱାରା ତାହାର ସମୀକ୍ଷା କରାଯିବ। ନିଶାମ ଗତବର୍ଷ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ଫର୍ମ ଫେରି ପାଇବା ଲାଗି ସଂଘର୍ଷ ଚଳାଇଥିଲେ। ଚଳିତ ସୁପର ସ୍ମାଶ ଟୁର୍ନାମେଣ୍ଟ ଶେଷ ଭାଗରେ ସେ ଆକ୍ସନକୁ ଫେରିବେ ବୋଲି ଆଶା କରାଯାଉଛି। ଟୁର୍ନାମେଣ୍ଟରେ ତାଙ୍କ ଦଳ ଓ୍ବେଲିଂଟନ ବର୍ତ୍ତମାନ ପଏଣ୍ଟ ଟେବୁଲ ଶୀର୍ଷରେ ରହିଛି। ଏହି ୩୦ ବଷର୍ର୍ୀୟ ଅଲରାଉଣ୍ଡର ତାଙ୍କ ଦଳ ଏପର୍ଯ୍ୟନ୍ତ ଖେଳି ସାରିଥିବା ୬ଟି ମ୍ୟାଚ ମଧ୍ୟରୁ ୫ଟିରେ ଖେଳିସାରିଛନ୍ତି। ସେ ୬୫ରନ ସ୍କୋର କରିଥିବାବେଳେ ୧୬.୨୫ ଆଭରେଜରେ ୮ ଉଇକେଟ ଅକ୍ତିଆର କରିଛନ୍ତି। ସେ ଶନିବାର କ୍ୟାଣ୍ଟରବରି ବିପକ୍ଷ ସୁପର ସ୍ମାଶ ମ୍ୟାଚ ଖେଳିଥିଲେ। ଦଳର ସେ ଟପ୍ ସ୍କୋରର ଭାବେ ୪୯ରନ ସଂଗ୍ରହ କରିଥିଲେ। ଓ୍ବେଲିଂଟନ ନିର୍ଦ୍ଧାରିତ ଓଭରରେ ୭ ଉଇକେଟ ବିନିମୟରେ ୧୫୪ ରନ କରିଥିଲା। ବୋଲିଂରେ ସେ ମହଙ୍ଗା ସାବ୍ୟସ୍ତ ହୋଇଥିଲେ। ସେ ୩.୪ ଓଭରରେ ୩୦ ରନ ଦେଇଥିଲେ। ଗତ କିଛି ମାସ ହେଲା ନିଶାମ ନିଜକୁ ଟି୨୦ କ୍ରିକେଟରେ ସୀମିତ ରଖିଥିଲେ। ସେ ଏପର୍ଯ୍ୟନ୍ତ ନ୍ୟୁଜିଲାଣ୍ଡ ତରଫରୁ ୧୨ ଟେଷ୍ଟ, ୬୩ ଅନ୍ତର୍ଜାତୀୟ ଦିନିକିଆ ଓ ୨୪ ଅନ୍ତର୍ଜାତୀୟ ଟି୨୦ ଖେଳି ଯଥାକ୍ରମେ ୭୦୯, ୧୨୬୮ ଓ ୨୫୦ ରନ ସଂଗ୍ରହ କରିଛନ୍ତି। ସେ ମୋଟ ୯୦ ଅନ୍ତର୍ଜାତୀୟ ଉଇକେଟ ହାସଲ କରିସାରିଛନ୍ତି। ସଂଯୁକ୍ତ ଆରବ ଏମିରେଟ୍ସ (ୟୁଏଇ)ରେ ଅନୁଷ୍ଠିତ ଗତ ଆଇପିଏଲ୍ରେ ସେ କିଙ୍ଗ୍ସ ଇଲେଭେନ ପଞ୍ଜାବ ପକ୍ଷରୁ ଖେଳି ମାତ୍ର ୧୯ ରନ କରିଥିବାବେଳେ ୨ଟି ଉଇକେଟ ନେଇଥିଲେ। କିଙ୍ଗ୍ସ ଇଲେଭେନ ପ୍ଲେ-ଅଫ୍କୁ ଯୋଗ୍ୟତା ଅର୍ଜନ କରି ନ ପାରି ପଏଣ୍ଟ ଟେବୁଲର ୬ଷ୍ଠ ସ୍ଥାନରେ ରହିଥିଲା।
