ରାଞ୍ଚି,୩୦।୮: ନିର୍ବାଚନ କମିଶନ ମୁଖ୍ୟମନ୍ତ୍ରୀ ତଥା ଜେଏମ୍ଏମ୍ ମୁଖ୍ୟ ହେମନ୍ତ ସୋରେନଙ୍କୁ ଅଯୋଗ୍ୟ ଘୋଷଣା କରିବା ଝାଡ଼ଖଣ୍ଡରେ ରାଜନୈତିକ ଅସ୍ଥିରତା ଦେଖାଦେଇଛି। କିନ୍ତୁ ନିର୍ବାଚନ କମିଶନଙ୍କ ନିଷ୍ପତ୍ତିକୁ ବର୍ତ୍ତମାନ ପର୍ଯ୍ୟନ୍ତ ଝାଡଖଣ୍ଡର ରାଜ୍ୟପାଳ ସ୍ବୀକୃତି ଦେଇନାହାଁନ୍ତି। ଇତିମଧ୍ୟରେ ନିଜ ସରକାରକୁ ବଞ୍ଚାଇବା ପାଇଁ ମୁଖ୍ୟମନ୍ତ୍ରୀ ହେମନ୍ତ ସୋରେନ ପ୍ରାଣପଣେ ଉଦ୍ୟମ ଚଳାଇଛନ୍ତି। ଏଥିପାଇଁ ମଙ୍ଗଳବାର ଅପରାହ୍ନରେ ମେଣ୍ଟ ବିଧାୟକମାନଙ୍କ ସହ ସୋରେନ ରାଞ୍ଚି ଏୟାରପୋର୍ଟରେ ପହଞ୍ଚିଛନ୍ତି। ମୁଖ୍ୟମନ୍ତ୍ରୀଙ୍କ ବାସଭବନରୁ ହେମନ୍ତ ସୋରେନ ବିଧାୟକଙ୍କ ସହ ୨ଟି ବସ୍କୁ ନେଇ ଏୟାରପୋର୍ଟକୁ ଯାଇଥିଲେ। ସେଠାରୁ ସମସ୍ତ ବିଧାୟକ ରାୟପୁର ଗସ୍ତ କରିବେ। ତେବେ ମୁଖ୍ୟମନ୍ତ୍ରୀ ରାୟପୁର ଯାଇ ନ ଥିବା ବେଳେ ସେ କେବଳ ବିଧାୟକଙ୍କ ସହ ବିମାନବନ୍ଦରକୁ ଯାଇଥିବା ଜଣାପଡ଼ିଛି। ଏହି ସମୟରେ ସୋରେନ କହିଛନ୍ତି, ‘ଆମେ ପ୍ରତ୍ୟେକ ଅସୁବିଧାର ସମ୍ମୁଖୀନ କରିବୁ। କୌଣସି ଅପ୍ରିତିକର ଘଟଣା ଘଟିବ ନାହିଁ। ଆମେ ସବୁକିଛି ପାଇଁ ପ୍ରସ୍ତୁତ, ପରିସ୍ଥିତି ଆମ ନିୟନ୍ତ୍ରଣରେ ରହିଛି ବୋଲି ସୋରେନ କହିଛନ୍ତି। ସମସ୍ତ ବିଧାୟକ ରାୟପୁରର ମେଫେୟାର ରିସର୍ଟକୁ ଯାଉଛନ୍ତି। ରିସର୍ଟ ବାହାରେ ପୋଲିସ ମୁତୟନ ପାଇଁ ନିର୍ଦ୍ଦେଶ ଦିଆଯାଇଛି। ମେଫେୟାର ରିସର୍ଟରେ ସମସ୍ତ ୪୭ରୁମ ବୁକ ହୋଇଛି ଏବଂ ସମସ୍ତ ବିଧାୟକ ସନ୍ଧ୍ୟା ୭ଟାରେ ରାୟପୁରରେ ପହଞ୍ଚିବେ। ଅନ୍ୟପଟେ ସେପ୍ଟେମ୍ବର ୧ରେ ରାଞ୍ଚିରେ ଅପରାହ୍ନ ୪ଟାରେ କ୍ୟାବିନେଟ ବୈଠକ ଡକାଯାଇଛି ବୋଲି ସୋରେନ କହିଛନ୍ତି।
