ଝରିଗାଁ,୧୬।୮(କିଶୋର ଚନ୍ଦ୍ର ମଣ୍ଡଳ): ନବରଙ୍ଗପୁର ଜିଲା ଝରିଗାଁ ନିକଟସ୍ଥ ହୁଣ୍ଡାରଧଡକି ଜଙ୍ଗଲ ନିକଟରେ ଜୁଆ ଖେଳ ଚାଲିଥିବା ବେଳେ ରବିବାର ସନ୍ଧ୍ୟାରେ ଝରିଗାଁ ପୋଲିସ ତରଫରୁ ଅତର୍କିତ ଭାବେ ଚଢ଼ାଉ କରାଯାଇଛି । ଏହି ଘଟଣାରେ ପୋଲିସ ଉମରକୋଟ ଅଞ୍ଚଳର ସନ୍ତୋଷ କୁମାର ପାଢ଼ୀ, ଡାବୁଗାଁର ସନ୍ତୋଷ କୁମାର ପାତ୍ର, ଝରିଗାଁର ଦୁଇ ଜଣ ଡି ସୂପୁ ରାଜୁ, ସନ୍ତୋଷ କୁମାର ନାୟକ ଏବଂ ଛତିଶଗଡ଼ ଦେଓବନ୍ଧ ନିକଟସ୍ଥ ଗିରସିଲା ଗ୍ରାମର କିଶୋର କୁମାର କଶ୍ୟପଙ୍କୁ କାବୁ କରିବାବେଳେ ଅନ୍ୟ ମାନେ ଅନ୍ଧାରର ମଉକାରେ ଦୌଡି ପଳାଇ ଯାଇଥିଲେ।
ଖେଳ ନିକଟରୁ ନଗଦ ୫୮ ହଜାର ୭ଶହ ଟଙ୍କା, ୪ଟି ଚାରି ଚକିଆ ଗାଡ଼ି, ୧୨ଟି ଦୁଇ ଚକିଆ ଗାଡ଼ି ସହ ୪ ମୋବାଇଲ ଓ ୩ ଏଟିମ୍ କାର୍ଡ ପୋଲିସ ଜବତ କରିଥିବା ନେଇ ଥାନା ଅଧିକାରୀ ରଚିତା ମାଡକାମି ପ୍ରକାଶ କରିଛନ୍ତି । ଏନେଇ ପୋଲିସ କେସ ନମ୍ବର ୧୬୨/୨୦୨୬ ରେ ଏକ ମାମଲା ରୁଜୁ କରିଛି । ଚଢାଉ ବେଳେ ଥାନା ଅଧିକାରୀଙ୍କ ସହ ଏସଆଇ କେ. ଲକ୍ଷ୍ମୀନାରାୟଣ ଡୋରା, ହାବିଲଦାର ମୁରଲୀ ବିଶୋଇଙ୍କ ସହ ଥାନାର ବହୁ କର୍ମଚାରୀ ଉପସ୍ଥିତ ରହିଥିଲେ।
