ପାଟନା,୪।୧୦: ନିର୍ବାଚନ ରଣନୀତିକାର ତଥା ଜେଡିୟୁର ପୂର୍ବତନ ରାଷ୍ଟ୍ରୀୟ ଉପସଭାପତି ପ୍ରଶାନ୍ତ କିଶୋର ଭାଜପା ପକ୍ଷରୁ କାମ କରୁଥିବା ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ଦଳ ଅଭିଯୋଗ କରିଛି।
ପ୍ରଶାନ୍ତଙ୍କ ବହୁପ୍ରଚାରିତ ‘ଜନ ସୁରାଜ’ ପଦଯାତ୍ରା ପାଇଁ ପାଣ୍ଠି ଆସୁଛି କେଉଁଠୁ ବୋଲି ଜେଡିୟୁ ପ୍ରଶ୍ନ କରିଛି। ପ୍ରଶାନ୍ତଙ୍କ ରାଜ୍ୟବ୍ୟାପୀ ପଦଯାତ୍ରାକୁ ଜେଡିୟୁ ସଭାପତି ରାଜୀବ ରଞ୍ଜନ ସିଂ ଓରଫ ଲଲନ ନିନ୍ଦା କରିଛନ୍ତି। ନୀତୀଶଙ୍କ ଶାସନରେ ରାଜ୍ୟରେ କେତେ ବିକାଶ ହୋଇଛି ତାହା ବିହାର ଜନସାଧାରଣ ଭଲ ଭାବେ ଜାଣନ୍ତି। ତେଣୁ ପ୍ରଶାନ୍ତ କିଶୋରଙ୍କଠାରୁ ସାର୍ଟିଫିକେଟର ଆବଶ୍ୟକତା ନାହିଁ ବୋଲି ଲଲନ କହିଛନ୍ତି। ପ୍ରଶାନ୍ତ ତାଙ୍କ ଯାତ୍ରାକୁ ଯେକୌଣସି ନାଁ ଦେଲେ ମଧ୍ୟ ସେ ଭାଜପା ତରଫରୁ କାର୍ଯ୍ୟ କରୁଥିବା ଜଣାପଡ଼ୁଛି। ସେ ତାଙ୍କ ପଦଯାତ୍ରା ପାଇଁ ପୂରା ପୃଷ୍ଠା ବିଜ୍ଞାପନ ଦେଉଛନ୍ତି। ଆୟକର ବିଭାଗ, ସିବିଆଇ ଏବଂ ଇଡି ଏଥିପ୍ରତି ଦୃଷ୍ଟି ନ ଦେବା କେବଳ କେନ୍ଦ୍ର ସରକାରଙ୍କ ସମର୍ଥନ ପାଇଁ ସମ୍ଭବ ହୋଇଛି ବୋଲି ଜେଡିୟୁ ସଭାପତି କହିଛନ୍ତି।
ବିଭିନ୍ନ ଦଳ ପାଇଁ ରାଜନୈତିକ ଉପଦେଷ୍ଟା ଭାବେ କାର୍ଯ୍ୟ କରିଥିବା ପ୍ରଶାନ୍ତ ଏବେ ଉକ୍ତ ପେସା ଛାଡ଼ିଦେଇ ନିଜ ରାଜ୍ୟ ବିହାରକୁ ସମ୍ପୂର୍ଣ୍ଣ ବଦଳାଇବା ଉପରେ ମନୋନିବେଶ କରିଥିବା ଦାବି କରୁଛନ୍ତି।
