ଭୁବନେଶ୍ୱର, ୨୦।୮ (କ୍ରୀଡ଼ା ପ୍ରତିନିଧି): ବେଙ୍ଗାଲୁରୁର ଶ୍ରୀ କାନ୍ତିରଭା ଷ୍ଟାଡିୟମରେ ଚାଲିଥିବା ୪ର୍ଥ ଇଣ୍ଡିଆନ ଓପନ ଜାତୀୟ ପାରା ଆଥ୍ଲେଟିକ ଚାମ୍ପିୟନଶିପ୍ରେ ଓଡ଼ିଶାର ଜୟନ୍ତୀ ବେହେରା ଦ୍ୱିତୀୟ ସ୍ବର୍ଣ୍ଣ ପଦକ ହାସଲ କରିଛନ୍ତି। ଶୁକ୍ରବାର ପ୍ରତିଯୋଗିତାର ଦ୍ୱିତୀୟ ଦିବସରେ ଅନୁଷ୍ଠିତ ୨୦୦ ମିଟର ରେସ୍ର ମହିଳା ଟି-୪୭ ବର୍ଗରେ ଜୟନ୍ତୀ ୨୮.୩୯ ସେକେଣ୍ଡରେ ଅତିକ୍ରମ କରି ପ୍ରଥମସ୍ଥାନ ଅଧିକାର କରିଛନ୍ତି। ସେହିପରି ୪୦୦ ମିଟର ରେସରେ ୧:୦୩.୨୭ ସେକେଣ୍ଡ ସମୟ ନେଇ ସେ ରୌପ୍ୟ ପଦକଲାଭ କରିଛନ୍ତି। ପ୍ରତିଯୋଗିତାର ପ୍ରଥମ ଦିବସରେ ଅର୍ଥାତ୍ ଗୁରୁବାର ଅନୁଷ୍ଠିତ ୧୦୦ ମିଟର ରେସ୍ରେ ୧୩.୨୩ ସେକେଣ୍ଡ ସମୟ ନେଇ ଜୟନ୍ତୀ ସ୍ବର୍ଣ୍ଣ ପଦକ ହାସଲ କରିଥିଲେ। ତେଣୁ ପ୍ରତିଯୋଗିତାରେ ସେ ୨ ସ୍ବର୍ଣ୍ଣ ଓ ୧ ରୌପ୍ୟ ପଦକ ପାଇଛନ୍ତି। ପୁରୁଷ ଟି-୪୪ ବର୍ଗ ଲଙ୍ଗଜମ୍ପରେ ଓଡ଼ିଶାର ରଶ୍ମିରଞ୍ଜନ ମଲିକ ୫.୮୦ ମିଟର କ୍ଲିୟର କରି ବ୍ରୋଞ୍ଜ ପଦକ ପାଇଛନ୍ତି। ସେ ପୂର୍ବରୁ ୧୦୦ ମିଟର ରେସ୍ରେ ୧୨.୩୨ ସେକେଣ୍ଡ ସମୟ ନେଇ ବ୍ରୋଞ୍ଜ ପଦକ ହାସଲ କରିଥିଲେ।
ପ୍ରଫୁଲ୍ଲଙ୍କୁ ରୌପ୍ୟ
ପ୍ରତିଯୋଗିତାରେ ଭାଗ ନେଇଥିବା ଅନ୍ୟତମ ଓଡ଼ିଆ ଆଥ୍ଲେଟ ପ୍ରଫୁଲ୍ଲ କୁମାର ଖଣ୍ଡାୟତରାୟ ହୁଇଲଚେୟାର ଏଫ୍-୫୪ ବର୍ଗ ଜାଭେଲିନ୍ ଥ୍ରୋରେ ରୌପ୍ୟ ପଦକ ହାସଲ କରିଛନ୍ତି। ସେ ୨୦.୧୮ ମିଟର ଦୂରକୁ ଥ୍ରୋ କରି ଏହି ସଫଳତା ପାଇଛନ୍ତି। ପ୍ରଫୁଲ୍ଲଙ୍କର ଏହାଥିଲା ବ୍ୟକ୍ତିଗତ ଶ୍ରେଷ୍ଠ ପ୍ରଦର୍ଶନ।
