ପୁରୀ ଅଫିସ,୨୯।୪: ଶ୍ରୀମନ୍ଦିର ଐତିହ୍ୟ କରିଡର ନିର୍ମାଣ ପ୍ରସଙ୍ଗରେ ଭୁବନେଶ୍ୱର ଏମ୍ପି ଅପରାଜିତା ଷଡ଼ଙ୍ଗୀଙ୍କୁ ପୁରୀ ବିଧାୟକ ଜୟନ୍ତ କୁମାର ଷଡ଼ଙ୍ଗୀ ସମର୍ଥନ କରିଛନ୍ତି। ଜୟନ୍ତ ନିଜ ସ୍ବର ବଦଳାଇ ଅପରାଜିତାଙ୍କୁ ସମର୍ଥନ କରିବା ସହ ଭାରତୀୟ ପ୍ରତ୍ନତତ୍ତ୍ୱ ସର୍ବେକ୍ଷଣ ସଂସ୍ଥା (ଏଏସ୍ଆଇ) ମୁଣ୍ଡରେ ସବୁ ଦୋଷ ଲଦିଛନ୍ତି। ଜୟନ୍ତ କହିଛନ୍ତି, ପ୍ରକଳ୍ପ କାର୍ଯ୍ୟରେ ବିବାଦ ନାହିଁ। କାମକୁ ବିରୋଧ ନ ଥିବାବେଳେ ଅନୁମୋଦନକୁ ନେଇ ସମସ୍ୟା ରହିଛି। ଏ ପ୍ରସଙ୍ଗରେ ଅପରାଜିତା ଠିକ୍ କହୁଛନ୍ତି। ଏଏସ୍ଆଇ ଅନୁମୋଦନ କ୍ରମେ କାର୍ଯ୍ୟ କରାଯିବା ଦରକାର। ଅନୁମତି ଆଣିବା ଦାୟିତ୍ୱ ରାଜ୍ୟ ସରକାରଙ୍କର। ପ୍ରକଳ୍ପ କାର୍ଯ୍ୟ ଆଇନଗତ ଭାବେ ହେବା ଦରକାର। ସେହିଭଳି କୌଣସି ବଡ଼ଧରଣର ନିର୍ମାଣ କାର୍ଯ୍ୟ ହେଉନାହିଁ। ଏଏସ୍ଆଇ ଜାଣତରେ ସବୁ କାମ ହେଉଛି। ସେହିଭଳି ଅପରାଜିତାଙ୍କ ପଦଯାତ୍ରା ସମ୍ପର୍କରେ ସେ କହିଛନ୍ତି, ଅପରାଜିତା ଦର୍ଶନ କରିବାକୁ ଯାଇଥିଲେ। ଅନୁମତି ମିଳି ନଥିବାରୁ ସେ ପଦଯାତ୍ରା କରିନାହାନ୍ତି। ଅନ୍ୟପକ୍ଷରେ ମତ ବଦଳାଇବା ସମ୍ପର୍କରେ ଜୟନ୍ତ କହିଛନ୍ତି, ବିକାଶ କାର୍ଯ୍ୟକୁ ବିରୋଧ କରାଯିବ ନାହିଁ। କାମ କରିବା ପାଇଁ ବିଧାୟକ ଭାବେ ନିର୍ବାଚିତ ହୋଇଛି। ତେଣୁ ରାଜନୀତି ନ କରି ବିଧାୟକ ଭାବେ କାର୍ଯ୍ୟ କରିବା ମୋ’ ପ୍ରାଥମିକତା। ଶ୍ରୀସେତୁ, ଜଗନ୍ନାଥ ବଲ୍ଲଭ, ଅବଢ଼ା ଯୋଜନାରେ ପୁରୀ ଅଗ୍ରଗତି କରୁଛି। ସୂଚନାଯୋଗ୍ୟ, ପୂର୍ବରୁ ରାଜ୍ୟ ସରକାରଙ୍କ ପକ୍ଷ ନେଇ ଜୟନ୍ତ କହିଥିଲେ, ବିକାଶ କାର୍ଯ୍ୟ କରିବାକୁ ଦିଆଯାଉ ଓ ଅପରାଜିତା ରାଜନୀତି କରନ୍ତୁ ନାହିଁ। ତେବେ ଏହି ପ୍ରତିକ୍ରିୟାକୁ ୨୪ ଘଣ୍ଟା ପୂରି ନ ଥିବା ବେଳେ ଜୟନ୍ତ ନିଜ ସ୍ବର ବଦଳାଇବା ଚର୍ଚ୍ଚାର ବିଷୟ ପାଲଟିଛି।
ରାଜନୀତି ସରିଲେ ଗୃହ କମିଟି ଯିବ: ବାଚସ୍ପତି
ଐତିହ୍ୟ କରିଡର ପ୍ରସଙ୍ଗରେ କଂଗ୍ରେସ ବିଧାୟକ ନରସିଂହ ମିଶ୍ର କହିଛନ୍ତି, ଯେଉଁ ଯାଗାରେ ଖନନ ହେଉଛି, ଆଇନ ଅନୁସାରେ ଏଏସ୍ଆଇ ଅନୁମୋଦନ ବିନା ସେଠାରେ ଖନନ କାର୍ଯ୍ୟ ହୋଇପାରିବ ନାହିଁ। ବହୁ ବଡ଼ ବଡ଼ ଭିତ୍ତିଭୂମି ନିର୍ମାଣ ପାଇଁ ମୂଳଦୁଆ ପଡ଼ିଛି। ଏଣୁ ସରକାର ଅନୁମୋଦନ ସମ୍ପର୍କରେ ସ୍ପଷ୍ଟ କରନ୍ତୁ। ଅନ୍ୟପକ୍ଷରେ ବିଜେଡି ନେତ୍ରୀ ପ୍ରମିଳା ମଲ୍ଲିକ କହିଛନ୍ତି, ପ୍ରଶାସନ ବୁଝିଶୁଝି କାର୍ଯ୍ୟ କରୁଛନ୍ତି। ସେବାୟତ, ପରିଚାଳନା କମିଟି ଏବଂ ଗଜପତି ମହାରାଜା ପରିକ୍ରମା ପ୍ରକଳ୍ପ ସପକ୍ଷରେ ଯୁକ୍ତି ବାଢୁଥିବାବେଳେ ଜଣେ କେବଳ ବିରୋଧ କରୁଛନ୍ତି। ସେହିପରି ବାଚସ୍ପତି ସୂର୍ଯ୍ୟନାରାୟଣ ପାତ୍ର କହିଛନ୍ତି, ଯିଏ ଯିବା କଥା ପୁରୀ ଯାଇ ବୁଲିଆସନ୍ତୁ, ରାଜନୀତି ସରୁ। ତା’ପରେ ବିଧାନସଭା ଗୃହ କମିଟି ଯାଇ ସ୍ଥିତି ଅନୁଧ୍ୟାନ କରିବ। ମୁଁ ନିଜେ ଏଠାକାର ଓ ସେଠାକାର ପରିସ୍ଥିତି ଉପରେ ନଜର ରଖିଛି।
