ନୂଆଦିଲ୍ଲୀ, ୩୧।୩: ଇଂଲଣ୍ଡ ଓପନର ଜାସନ ରୟଙ୍କୁ ବୁଧବାର ଦଳରେ ସାମିଲ କରିଛି ଆଇପିଏଲ ଫ୍ରାଞ୍ଚାଇଜ ସନରାଇଜର୍ସ ହାଇଦ୍ରାବାଦ। ତାଙ୍କୁ ଅଷ୍ଟ୍ରେଲିଆନ ଖେଳାଳି ମିଚେଲ ମାର୍ଶଙ୍କ ବଦଳରେ ମିଳିଛି ଆଇପିଏଲ କଣ୍ଟ୍ରାକ୍ଟ। ବ୍ୟକ୍ତିଗତ କାରଣ ଯୋଗୁ ଏହି ଅଲରାଉଣ୍ଡର ଆସନ୍ତା ୯ ତାରିଖରୁ ଆରମ୍ଭ ହେବାକୁ ଥିବା ଆଇପିଏଲ-୧୪ରୁ ଓହରି ଯାଇଛନ୍ତି।
ଉଲ୍ଲେଖଥାଉ କି, ୨୦୨୦ ସଂସ୍କରଣର ପ୍ରଥମ ମ୍ୟାଚ୍ରେ ମାର୍ଶ ଆହତ ହୋଇଥିଲେ। ଏଥିଯୋଗୁ ବାଦ୍ ପଡ଼ିଥିଲେ ପୂରା ସିଜନରୁ। ତେବେ ଜାସନଙ୍କ ନିକଟରେ ଆଇପିଏଲରେ ଖେଳିବାର ଅଭିଜ୍ଞତା ରହିଛି। ସେ ୨୦୧୭ରେ ଗୁଜରାଟ ଲାୟନ୍ସ ପାଇଁ ଆଇପିଏଲରେ ପଦାର୍ପଣ କରିଥିଲେ। ଏହାର ପର ସଂସ୍କରଣରେ ସେ ଖେଳିଥିଲେ ଦିଲ୍ଲୀ ଡେୟାରଡେଭିଲ୍ସ (ଏବେ ଦିଲ୍ଲୀ କ୍ୟାପିଟାଲ୍ସ) ପାଇଁ। ମୋଟ ୮ ମ୍ୟାଚ୍ ଖେଳିଥିବା ଇଂଲଣ୍ଡ ବ୍ୟାଟ୍ସମ୍ୟାନଙ୍କ ନାମରେ ରହିଛି ଗୋଟିଏ ଅର୍ଦ୍ଧଶତକ ସହ ୧୭୯ ରନ୍ । ନିକଟରେ ଶେଷ ହୋଇଥିବା ଭାରତ ବିପକ୍ଷ ଦିନିକିଆ ଓ ଟି୨୦ ସିରିଜ୍ରେ ଜାସନଙ୍କ ବ୍ୟାଟରୁ ଦେଖିବାକୁ ମିଳିଥିଲା କିଛି ଚମତ୍କାର ଇନିଂସ। ସନରାଇଜର୍ସ ହାଇଦ୍ରାବାଦ୍ ଜାସନଙ୍କୁ ୨ କୋଟି ଟଙ୍କାର ବେସ ପ୍ରାଇସରେ ଦଳରେ ସାମିଲ କରିଛି।
