ସୁନ୍ଦରଗଡ,୭।୧୧(ଡି.ଏନ୍.ଏ.): ବେଦାନ୍ତକୁ ମିଳିଥିବା ଜାମକାନୀ କୋଇଲା ଖଣି ଭୂମିପୂଜନ ଆରମ୍ଭ ଦିନଠାରୁ ବିସ୍ଥାପିତଙ୍କ ଧାରଣା ବର୍ତ୍ତମାନ ପର୍ଯ୍ୟନ୍ତ ଜାରି ରହିଛି। ବିସ୍ଥାପିତମାନେ ସମ୍ପୂର୍ଣ୍ଣ କ୍ଷତିପୂରଣ ଦାବିରେ ଜିଦ୍ରେ ଅଟଳ ରହିଥିବା ବେଳେ ପୋଲିସ ସହାୟତାରେ ଖଣି ଖୋଳା କାର୍ଯ୍ୟ ଆରମ୍ଭ ହୋଇଛି। ମରିବୁ ପଛେ ଇଞ୍ଚେ ଜମି ଛାଡ଼ିବୁ ନାହିଁ ଜିଦ୍ରେ ୩ ଦିନ ହେଲା ବିସ୍ଥାପିତ ଗ୍ରାମବାସୀ ଅହୋରାତ୍ର ଧାରଣା ଦେଇଛନ୍ତି। ସୋମବାର ସୁନ୍ଦରଗଡ଼ ବିଧାୟିକା କୁସୁମ ଟେଟେ ଅସୁସ୍ଥତା ସତ୍ତ୍ୱେ ଧାରଣାସ୍ଥଳରେ ପହଞ୍ଚିଛନ୍ତି। ସେ ବିସ୍ଥାପିତଙ୍କୁ ସମର୍ଥନ ଜଣାଇବା ସହ ତାଙ୍କ ଦାବିକୁ ସମର୍ଥନ କରିଛନ୍ତି। ପୋଲିସର ଲାଠି ଚାଳନାକୁ ନିନ୍ଦା କରିବା ସହ ବିସ୍ଥାପିତଙ୍କ ଦାବିକୁ ନେଇ ମଙ୍ଗଳବାର ସେ ଆନ୍ଦୋଳନରତ ନେତାଙ୍କ ଏକ ଟିମ୍କୁ ନେଇଜିଲାପାଳଙ୍କୁ ଭେଟିବାର କାର୍ଯ୍ୟକ୍ରମ ରହିଛି। ଜିଲାପାଳଙ୍କୁ ଭେଟିବା ପରେ ପରବର୍ତ୍ତୀ କାର୍ଯ୍ୟପନ୍ଥା ସ୍ଥିର କରାଯିବ ବୋଲି ବିଧାୟିକା କହିଛନ୍ତି। ତେବେ ଧାରଣାସ୍ଥଳରେ ବିସ୍ଥାପିତ ନେତା ଗୋପାଳ ପଧାନ, ସିପିଆଇ ନେତା ରାଜେନ୍ଦ୍ର ନାଏକ, ପୁନୁଲାଲ ପ୍ରଧାନ, ହେମଗିରି ବ୍ଲକ ଅଧକ୍ଷ ପ୍ରେମାନନ୍ଦ ସା, ପ୍ରଶାସନ ପକ୍ଷରୁ ଅତିରିକ୍ତ ଜିଲାପାଳ ଅଭିମନ୍ୟୁ ବେହେରା ପ୍ରମୁଖ ଉପସ୍ଥିତ ରହିଥିଲେ।
