ଛତ୍ରପୁର,୨।୬ (ଡି.ଏନ୍.ଏ.): ଗଞ୍ଜାମ ଜିଲା ପ୍ରଶାସନ ବିଭିନ୍ନ ସମୟରେ ତାରା, ସ୍ବଂୟସିଦ୍ଧା, ନିର୍ଭୟ କଢି, ମୋ ଗେହ୍ଲା ଝିଅ ଭଳି ନିଜସ୍ବ ଯୋଜନା ଓ କାର୍ଯ୍ୟକ୍ରମ ଆରମ୍ଭ କରି ସେଥିରେ ସଫଳ ହୋଇଛି। ଏହାକୁ ରାଜ୍ୟ ସରକାର ମଧ୍ୟ ପ୍ରଶଂସା କରିଛନ୍ତି। ଗଞ୍ଜାମ ଜିଲା ପ୍ରଶାସନ ପକ୍ଷରୁ ଜଳ ସମୃଦ୍ଧି କାର୍ଯ୍ୟକ୍ରମ ଆରମ୍ଭ ହୋଇଛି। ଏହି ଯୋଜନାରେ ବୁଧବାର ଛତ୍ରପୁରଠାରେ ଥିବା ଗେଟ୍ ବନ୍ଧର ପଙ୍କ ଉଦ୍ଧାର କାର୍ଯ୍ୟ ଆରମ୍ଭ ହୋଇଛି। ଏହା ଜନସାଧାରଣଙ୍କ ଦ୍ୱାରା କରାଯିବ। ଜିଲାପାଳ ବିଜୟ ଅମୃତା କୁଲାଙ୍ଗେ ଏହାର ଶୁଭାରମ୍ଭ କରି କହିଛନ୍ତି ଯେ, ଜଳ ସମୃଦ୍ଧି କାର୍ଯ୍ୟକ୍ରମରେ ଜିଲାର ୧୦୦ ପୋଖରୀର ପଙ୍କ ଉଦ୍ଧାର କରାଯିବ। ଉଭୟ ସହରାଞ୍ଚଳ ଓ ଗ୍ରାମାଞ୍ଚଳରେ ଏହା କରାଯିବାକୁ ଥିବା ବେଳେ ପଞ୍ଚାୟତିରାଜ ବିଭାଗ, ରାଜସ୍ବ, ଡ୍ରେନେଜ୍, ସହରାଞ୍ଚଳ ଉନ୍ନୟନ ସଂସ୍ଥା ମିଳିତ ଭାବେ ଏହି କାର୍ଯ୍ୟକୁ ତ୍ୱରାନ୍ବିତ କରିବେ। ଏହାଦ୍ୱାରା ପୋଖରୀର ପଙ୍କ ଉଦ୍ଧାର ହୋଇପାରିବ ଏବଂ ଏହି ପଙ୍କକୁ ଚାଷୀମାନେ ନେଇ ବିଲରେ ପକାଇ ପାରିବେ। ଏହାଫଳରେ ପୋଖରୀ ସ୍ବଚ୍ଛ ରହିବା ସହ ଜମିର ଉର୍ବରତା ବୃଦ୍ଧି ହେବ ବୋଲି ଜିଲାପାଳ କହିଛନ୍ତି। ଛତ୍ରପୁର ଏନଏସି ଗେଟ୍ବନ୍ଧ ପଙ୍କ ଉଦ୍ଧାର କାର୍ଯ୍ୟକ୍ରମ ସହ ପୋଡାପଦର, କଣମଣା ଓ ଚିକଲଖଣ୍ଡି ପଞ୍ଚାୟତକୁ ଟ୍ୟାଗ୍ କରାଯାଇଛି। କାର୍ଯ୍ୟକ୍ରମ ଶୁଭାରମ୍ଭ ବେଳେ ଡିଆରଡିଏ ପିଡି ସିନ୍ଧେ ଦତାତ୍ରେୟ ଭାଉସାହେବ, ଛତ୍ରପୁର ଉପଜିଲାପାଳ ନୀଳମାଧବ ଭୋଇ, ଡୁଡା ପିଡି ସଚ୍ଚିଦାନନ୍ଦ ନାୟକ, ଛତ୍ରପୁର ତହସିଲଦାର ପ୍ରକାଶ କୁମାର ମିଶ୍ର, ଏନଏସି ନିର୍ବାହୀ ଅଧିକାରୀ ଏନ.ଗଣେଶ ବାବୁ, ଉପାଧ୍ୟକ୍ଷ ଜି.ପାପା ରାଓ, ୧୨ ନଂ ୱାର୍ଡ କାଉନସିଲର ବି.ନିଶ୍ଚଳା, ପୂର୍ବତନ କାଉନସିଲର ରାଜେଶ ସାହୁ ପ୍ରମୁଖ ଉପସ୍ଥିତ ଥିଲେ।
