ଦୁବାଇ,୭।୧୧(ପି.ଟି.): କୋଭିଡ୍-୧୯ ମହାମାରୀ କାରଣରୁ ଜୈବସୁରକ୍ଷିତ ପରିବେଶ ବା ବାୟୋ ବବଲ୍ରେ ନିୟମିତ ଖେଳିବା ଏକ ବଡ଼ ଚ୍ୟାଲେଞ୍ଜ୍ ଓ ଏହା କଷ୍ଟକର ବୋଲି ଭାରତୀୟ ଅଧିନାୟକ ବିରାଟ କୋହଲି କହିଛନ୍ତି। ତେଣୁ ଏଭଳି ସ୍ଥିତିରେ ଭବିଷ୍ୟତରେ ବିଭିନ୍ନ ଗସ୍ତର ସମୟସୀମା ନେଇ ବିଚାର କରିବାକୁ କୋହଲି ସୌରଭ ଗାଙ୍ଗୁଲିଙ୍କ ନେତୃତ୍ୱାଧୀନ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)କୁ କହିଛନ୍ତି।
ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ଭାରତୀୟ ଦଳ ଏକ ଲମ୍ବା ଗସ୍ତରେ ଅଷ୍ଟ୍ରେଲିଆ ଯିବାର କାର୍ଯ୍ୟକ୍ରମ ରହିଛି। ତେଣୁ ଭାରତୀୟ ଖେଳାଳିଙ୍କୁ ଏବେ ଗୋଟିଏ ବାୟୋ ବବଲରୁ ଆଉ ଗୋଟିଏକୁ ଯିବା ଏକ ବଡ଼ ଚ୍ୟାଲେଞ୍ଜ ସଦୃଶ ହୋଇଛି ବୋଲି କୋହଲି ରୟାଲ ଚ୍ୟାଲେଞ୍ଜର୍ସ ବାଙ୍ଗାଲେରର ୟୁଟ୍ୟୁବ ଚ୍ୟାନେଲ୍ରେ ଏକ କାର୍ଯ୍ୟକ୍ରମରେ ଅଂଶଗ୍ରହଣ କରି କହିଛନ୍ତି। ତେବେ ଯଦି ସାଥୀ ଖେଳାଳିମାନେ ବନ୍ଧୁତ୍ୱପୂର୍ଣ୍ଣ ଥାନ୍ତି ତା’ହେଲେ ଏହି ପ୍ରକ୍ରିୟା ସହଜ ହୋଇଥାଏ ବୋଲି ସେ କହିଛନ୍ତି। ଆଇପିଏଲ୍ରେ ଥିବା ବାୟୋ ବବଲ ବେଶ୍ ଆମୋଦଦାୟକ ବୋଲି ସେ କହିଛନ୍ତି। ତେବେ ବାରମ୍ବାର ବାୟୋ ବବଲରେ ରହିବା ନିଶ୍ଚିତ ଭାବେ କଷ୍ଟକର ବୋଲି ସେ ସ୍ପଷ୍ଟ କରିଛନ୍ତି। ଦଳର ଅଧିକାଂଶ ସଦସ୍ୟ ଗତ ଅଗଷ୍ଟରୁ ୟୁଏଇରେ ରହୁଛନ୍ତି। ଏହା ପରେ ଲମ୍ବା ଗସ୍ତରେ ଅଷ୍ଟ୍ରେଲିଆ ଯିବାକୁ ହେବ। ଫଳରେ ଖେଳାଳିମାନେ ୪ ମାସରୁ ଅଧିକ ସମୟ ଏହି ପ୍ରକ୍ରିୟା ସହିତ ଜଡିତ ରହିବେ। ଖେଳାଳିମାନେ ଏହି ସମୟରେ ବାହ୍ୟଜଗତ ସହ ସମ୍ପର୍କରେ ରହିବେ ନାହିଁ। ଲମ୍ବା କାର୍ଯ୍ୟସୂଚୀ ସହ ବାୟୋ ବବଲର ବନ୍ଧନ ଖେଳାଳିମାନଙ୍କର ମାନସିକ ବିଷାଦ ବଢାଇବ। ବାରମ୍ବାର ବାୟୋ ବବଲରେ ସମାନ ପରିସ୍ଥିତିର ରହିବା ନିହାତି କଷ୍ଟକର। ତେଣୁ ଏ ନେଇ ଗୁରୁତର ଭାବେ ଚିନ୍ତା କରିବାର ଆବଶ୍ୟକତା ରହିଛି ବୋଲି ସେ କହିଛନ୍ତି। ଖେଳାଳିମାନେ ମାନସିକତା ଶ୍ରେଷ୍ଠସ୍ତରରେ ରହିବା ଆବଶ୍ୟକ। ଖେଳାଳିମାନେ ଉଭୟ କେବଳ ଶାରୀରିକ ନୁହେଁ ମାନସିକସ୍ତରରେ ସୁସ୍ଥ ରହିବା ନିହାତି ଦରକାର। ଅଷ୍ଟ୍ରେଲିଆ ଗସ୍ତ ପରେ ଭାରତ ଘରୋଇ ମାଟିରେ ଇଂଲଣ୍ଡ ବିପକ୍ଷରେ ସିରିଜ ଖେଳିବ। ୩ଟି ଫର୍ମାଟରେ ଜଡିତ ରହିଲେ ଭିନ୍ନ ଭିନ୍ନ ବବଲ ଦେଇ ଗତିକରିବାକୁ ହେବ। ଏପରିସ୍ଥଳେ ଖେଳାଳିମାନେ ପରିବାର ସହିତ ସମୟ କଟେଇବାର ସୁଯୋଗ ପାଇବେ ନାହିଁ। ଆଇପିଏଲ୍ ଖେଳୁଥିବା ପ୍ରାୟ ସବୁ ଦେଶର ଖେଳାଳି ଏ ନେଇ ନିଜର ଚିନ୍ତା ପ୍ରକଟ କରିଛନ୍ତି। ତେଣୁ ଗଠନମୂଳକ ନିଷ୍ପତ୍ତି ନେବାର ଆବଶ୍ୟକତା ରହିଛି ବୋଲି କୋହଲି କହିଛନ୍ତି।
