ହିନ୍ଦୋଳ, ୨୮।୭(ଡି.ଏନ୍.ଏ.) – ସାଇକେଲରେ କାମକୁ ଯାଉଥିବାବେଳେ ଭାରସାମ୍ୟ ହରାଇ କାଦୁଅ ରାସ୍ତାରେ କଚାଡ଼ି ହୋଇ ପଡ଼ିଲେ। ଅଣ୍ଟାରେ ଲାଗିଥିବା ଆଘାତ ଶରୀରକୁ ଅଚଳ କରିଦେଲା। ସେହିଦିନଠାରୁ ୩ ବର୍ଷ ହେଲା ଶଯ୍ୟାରେ ପଡ଼ି ରହିଛନ୍ତି ଢେଙ୍କାନାଳ ଜିଲା ହିନ୍ଦୋଳ ବ୍ଲକ ଜରଡ଼ା ପଞ୍ଚାୟତ ବାଲିକିଆରୀ ଗ୍ରାମର ସନ୍ତୋଷ ସାହୁ (୩୩)। ଚିକିତ୍ସାରେ ଲକ୍ଷାଧିକ ଟଙ୍କା ଖର୍ଚ୍ଚ ହୋଇଥିଲେ ହେଁ ତାଙ୍କ ସ୍ବାସ୍ଥ୍ୟାବସ୍ଥାରେ ସୁଧାର ଆସୁନାହିଁ। ପରିବାର ସର୍ବସ୍ବାନ୍ତ ହୋଇଗଲାଣି। ଏଭଳି ସ୍ଥିତିରେ ସିନ୍ଦୂରକୁ ବଞ୍ଚାଇବା ଲାଗି ସରକାରଙ୍କ ନିକଟରେ ଆକୁଳ ନିବେଦନ କରିଛନ୍ତି ସ୍ତ୍ରୀ ଶିଶୁଳା।
ଦିନ ମଜୁରିଆ ଭାବେ କାର୍ଯ୍ୟରତ ସନ୍ତୋଷ ସବୁଦିନ ପରି ଘଟଣା ଦିନ ସାଇକେଲ ଧରି କାମକୁ ବାହାରିଥିଲେ। ଗ୍ରାମଠାରୁ ଅଳ୍ପ ଦୂର ଯାଇଥିବାବେଳେ କାଦୁଅ ରାସ୍ତାରେ ଭାରସାମ୍ୟ ହରାଇ ସାଇକେଲରୁ ଖସି ପଡ଼ିଥିଲେ। ଏଥିରେ ତାଙ୍କ ଅଣ୍ଟାରେ ଗଭୀର ଆଘାତ ଲାଗିଥିଲା। ତାଙ୍କୁ ପ୍ରଥମେ ହିନ୍ଦୋଳ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ପର୍ଯ୍ୟାୟକ୍ରମେ ଅନୁଗୋଳ ଏବଂ କଟକ ବଡ଼ ମେଡିକାଲରେ ଚିକିତ୍ସା ଲାଗି ଭର୍ତ୍ତି କରାଯାଇଥିଲେ ମଧ୍ୟ ସୁଫଳ ମିଳି ନ ଥିଲା। ଅଣ୍ଟାଠାରୁ ଗୋଡ଼ ଯାଏ ଅଚଳ ହୋଇପଡ଼ିଥିବାରୁ ସନ୍ତୋଷ ଶଯ୍ୟାଶାୟୀ ହୋଇ ପଡ଼ିରହିଛନ୍ତି। ଅଦ୍ୟାବଧି ତାଙ୍କ ଚିକିତ୍ସାରେ ୨ ଲକ୍ଷରୁ ଊର୍ଦ୍ଧ୍ୱ ଟଙ୍କା ଖର୍ଚ୍ଚ ହେଲାଣି। ଭଲ ହେବା ପାଇଁ ଆହୁରି ୩ ଲକ୍ଷ ଟଙ୍କା ଦରକାର ବୋଲି ଡାକ୍ତର କହିବା ପରେ ପରିବାର ମୁଣ୍ଡରେ ଚଡ଼କ ପଡ଼ିଛି।
ସନ୍ତୋଷଙ୍କ ବାପା ସର୍ବେଶ୍ୱର ଜଣେ ପକ୍ଷାଘାତ ରୋଗୀ। ବୃଦ୍ଧା ମା’ ରୋଜଗାର କରିବାକୁ ଅସମର୍ଥ। ୭ବର୍ଷର ପୁଅ ହିମାଂଶୁ ଏବଂ ଅଢ଼େଇ ବର୍ଷର ଝିଅ ଲକିଙ୍କୁ ମିଶାଇ ମୋଟ ୬ ପ୍ରାଣୀଙ୍କ ପାଇଁ ପ୍ରତିଦିନ ଆହାର ଯୋଗାଡ଼ କରିବା ଶିଶୁଳାଙ୍କ ପକ୍ଷେ କଷ୍ଟକର ହୋଇଯାଉଛି। ମୂଲମଜୁରି ଲାଗି ଯାହା ଆଣନ୍ତି, ସେଥିରେ ପରିବାର ଚଳାଇବା ଅସମ୍ଭବ। ଜମିବାଡ଼ି କିଛି ନାହିଁ। ସନ୍ତୋଷଙ୍କୁ ଦିବ୍ୟାଙ୍ଗ ତାଲିକାଭୁକ୍ତ କରିବାକୁ ଆବେଦନ କରାଯାଇଥିଲେ ମଧ୍ୟ ତାହା ହୋଇପାରିନାହିଁ। ସମ୍ପୃକ୍ତ ପରିବାରକୁ ସହାୟତାର ହାତ ବଢ଼ାଇବା ସହିତ ସନ୍ତୋଷଙ୍କ ଚିକିତ୍ସା ଖର୍ଚ୍ଚ ବହନ କରିବାକୁ ପ୍ରଶାସନ ନିକଟରେ ଗ୍ରାମବାସୀ ଦାବି କରିଛନ୍ତି। ଏ ସଂକ୍ରାନ୍ତରେ ସରପଞ୍ଚ ସ୍ନେହଦାୟିନୀ ପୃଷ୍ଟିଙ୍କୁ ପଚାରିବାରେ ସେ କୁହନ୍ତି, ସନ୍ତୋଷଙ୍କ ସମସ୍ୟା ସମ୍ପର୍କରେ ପ୍ରଶାସନର ଦୃଷ୍ଟି ଆକର୍ଷଣ କରାଯିବ। ପଞ୍ଚାୟତ ପକ୍ଷରୁ ଯଥାସାଧ୍ୟ ସହାୟତା ପ୍ରଦାନ କରାଯିବାକୁ ଉଦ୍ୟମ କରାଯିବ।
