ନୂଆଦିଲ୍ଲୀ,୨୫।୧୨: ଗତ କିଛି ବର୍ଷ ହେବ ଜାତୀୟ ଓ ଅନ୍ତର୍ଜାତୀୟ ସମସ୍ୟା ଲାଗି ରହିଛି। ହେଲେ ଉକ୍ତ ସମୟ ମଧ୍ୟରେ ଦେଶ ବିକାଶ ପଥରେ ଅଗ୍ରସର ହେବାକୁ ମଧ୍ୟ ପ୍ରୟାସ ଜାରି ରଖିଛି। ଏପରିକି ୫ ଟ୍ରିଲିୟନ ଡଲାର ଅର୍ଥନୀତିର ସଫଳତା ଏକ ସ୍ବଳ୍ପକାଳୀନ ଆକାଂକ୍ଷା ଲକ୍ଷ୍ୟ ବୋଲି ଭାରତୀୟ ରିର୍ଜଭ ବ୍ୟାଙ୍କ(ଆର୍ବିଆଇ)ର ପୂର୍ବତନ ଗର୍ଭନର ସି.ରଙ୍ଗରାଜନ୍ ଶନିବାର ଏକ ସମ୍ମିଳନୀରେ ଯୋଗଦେଇ କହିଛନ୍ତି। ବିଶେଷକରି ମୁଣ୍ଡ ପିଛା ଆୟ ୩୪୭୨ ଡଲାର ସହ ଭାରତ ମଧ୍ୟମ ଆୟକାରୀ ଦେଶ ଭାବେ ପରିଗଣିତ ହେବ ବୋଲି ରଙ୍ଗରାଜନ୍ ମତପ୍ରକାଶ କରିଛନ୍ତି। ସେହିଭଳି ଏକ ଉଚ୍ଚ ମଧ୍ୟବିତ୍ତ ଦେଶର ସ୍ତରରେ ପହଞ୍ଚତ୍ବାକୁ ହେଲେ ଭାରତକୁ ଆଉ ୨ରୁ ୩ ବର୍ଷ ଲାଗିବ ବୋଲି ଆଶା କରାଯାଉଛି। ଏପରିକି ଏକ ବିକଶିତ ଦେଶ ଭାବେ ବର୍ଗୀକୃତ ହେବାକୁ ହେଲେ ମୁଣ୍ଡ ପିଛା ଆୟ ସର୍ବନିମ୍ନ ୧୩,୨୦୫ ଡଲାର ଆବଶ୍ୟକ ରହିଛି। ଏହାକୁ ହାସଲ କରିବା ପାଇଁ ଆଉ୨ ଦଶନ୍ଧି ( ୨୦ ବର୍ଷ )ରୁ ଅଧିକ ସମୟ ଆବଶ୍ୟକ ବୋଲି ରଙ୍ଗରାଜନ ଆକଳନ କରିଛନ୍ତି। ଅପରପକ୍ଷରେ ୮ରୁ ୯% ଅଭିବୃଦ୍ଧି ହାରରେ ପହଞ୍ଚତ୍ବାକୁ ମଧ୍ୟ ଅନେକ ନୀତି ଓ ଯୋଜନା ସାଙ୍ଗକୁ ସମୟ ଆବଶ୍ୟକ ବୋଲି ସେ ମତବ୍ୟକ୍ତ କରିଛନ୍ତି।
ଉଲ୍ଲେଖଯୋଗ୍ୟ, ଆଇସିଏଫ୍ଏଆଇ ଫାଉଣ୍ଡେଶନର ଦ୍ୱାଦଶ ସମ୍ମିଳନୀରେ ଯୋଗ ଦେଇ ରଙ୍ଗରାଜନ କହିଛନ୍ତି, ସମୁଦାୟ ଆଉଟପୁଟ୍ ସ୍ତରରେ ଭାରତ ବର୍ତ୍ତମାନ ବିଶ୍ୱର ୫ମ ବୃହତ୍ତମ ଅର୍ଥନୀତି ଭାବେ ପରିଗଣିତ ହେଉଛି। ଭାରତ ଏକ ପ୍ରଭାବଶାଳୀ ସଫଳତା ପାଇବାକୁ ପ୍ରୟାସ କରୁଥିବା ବେଳେ ଅନେକ ସମସ୍ୟା ସୃଷ୍ଟି ହେଉଛି। ହେଲେ ମୁଣ୍ଡ ପିଛା ଆୟ ଦୃଷ୍ଟିରୁ ଆଇଏମ୍ଏଫ୍ର ମାନ୍ୟତା ଅନୁଯାୟୀ ୧୯୭ ଦେଶ ମଧ୍ୟରୁ ଭାରତ ୧୪୨ତମ ସ୍ଥାନରେ ରହିଛି। ଏ ସମ୍ପର୍କରେ ଦେଶର ନୀତି ନିର୍ଣ୍ଣୟକାରୀଙ୍କ ତୁରନ୍ତ ଧ୍ୟାନ ଅର୍ଥନୀତିର ଅଭିବୃଦ୍ଧି ହାରକୁ ବୃଦ୍ଧି କରିବା ଆବଶ୍ୟକ ରହିଛି। ବିଶେଷକରି ୫ ଟ୍ରିଲିୟନ ଡଲାର ଅର୍ଥନୀତିର ସଫଳତା ଏକ ସ୍ବଳ୍ପ ମିଆଦୀ ଆକାଂକ୍ଷା ଲକ୍ଷ୍ୟ। ଏଥିପାଇଁ ସର୍ବନିମ୍ନ ୫ ବର୍ଷର ପ୍ରୟାସ ସହ ୯%ର ଅଭିବୃଦ୍ଧି ହାରରେ ପହଞ୍ଚତ୍ବାକୁ ସମୟ ଲାଗିବ। ଏହା ସତ୍ତ୍ୱେ ଭାରତର ମୁଣ୍ଡ ପିଛା ଆୟ ମାତ୍ର ୩୪୭୨ ଡଲାର ରହିବ ବୋଲି ଆଶା କରାଯାଉଛି। ସେହିପରି ଆମେ ଏପର୍ଯ୍ୟନ୍ତ ଏକ ନିମ୍ନ ମଧ୍ୟମ ଆୟ ଦେଶ ଭାବେ ବର୍ଗୀକୃତ ହେବୁ ବୋଲି ରଙ୍ଗରାଜନ ଦର୍ଶାଇଛନ୍ତି।
ଏହିପରି ଆମକୁ ବହୁ ଦୂର ଯିବାକୁ ପଡ଼ିବ। ଏହା କେବଳ ଦର୍ଶାଏ ଯେ ଆମକୁ ନିଶ୍ଚିତ ଭାବେ ଦ୍ରୁତଗତିରେ ଚାଲିବା ଆବଶ୍ୟକ ବୋଲି ପୂର୍ବତନ ଅଧ୍ୟକ୍ଷ ଅର୍ଥନୈତିକ ପରାମର୍ଶଦାତା ପରିଷଦ ମତପ୍ରକାଶ କରିଛନ୍ତି। ଅପରପକ୍ଷରେ କୋଭିଡ୍-୧୯ ଏବଂ ରୁଷିଆ-ୟୁକ୍ରେନ୍ ଯୁଦ୍ଧ ଯୋଗୁ ଅନେକ ସମସ୍ୟା ସୃଷ୍ଟି ହୋଇଛି। ହେଲେ ଭାରତର ଭବିଷ୍ୟତ ବିକାଶ ପାଇଁ ଏକ ସ୍ବଚ୍ଛ ରୋଡ୍ମ୍ୟାପ୍ ରଖିବାର ଆବଶ୍ୟକତା ଅଛି। ପ୍ରାରମ୍ଭରେ ଦେଶର ଅଭିବୃଦ୍ଧି ହାରକୁ ୭%କୁ ବୃଦ୍ଧି କରିବାକୁ ପଡ଼ିବ ଏବଂ ତା’ପରେ ଏହାକୁ ୮ରୁ ୯% ଅଭିବୃଦ୍ଧି ହାରରେ ଅନୁସରଣ କରିବାକୁ ପଡିବ। ଭାରତ ଅତୀତରେ ଦର୍ଶାଇଛି ଯେ ଏହା ଉପରେ ଏକ ଅଭିବୃଦ୍ଧି ହାର ୬ରୁ ୭ବର୍ଷ ଅବଧି ରହିପାରେ ବୋଲି ରଙ୍ଗରାଜନ କହିଛନ୍ତି।
