ନୂଆଦିଲ୍ଲୀ,୧୩।୮: ଅନ୍ତର୍ଜାତୀୟ ବଜାରରେ କଚା ତେଲ (Crude Oil) ଦରରେ ଗତ ୫ ଦିନ ଧରି ଚାଲିଆସୁଥିବା ବୃଦ୍ଧିରେ ଶେଷରେ ବ୍ରେକ ଲାଗିଛି। ୧୩ ଅଗଷ୍ଟ ୨୦୨୬ରେ ବ୍ରେଣ୍ଟ କ୍ରୁଡ ଏବଂ WTI କ୍ରୁଡ ଉଭୟର ଦରରେ ୧%ରୁ ଅଧିକ ହ୍ରାସ ଦେଖିବାକୁ ମିଳିଛି। ଆମେରିକା ଓ ଇରାନ ମଧ୍ୟରେ କୌଣସି ଚୁକ୍ତି ହେବାର ଆଶା ବଢ଼ିବା ଯୋଗୁ ତେଲ ଦରରେ ଏହି ନରମତା ଆସିଛି। କିନ୍ତୁ ସବୁଠାରୁ ବଡ଼ ପ୍ରଶ୍ନ ହେଉଛି ଅନ୍ତର୍ଜାତୀୟ ବଜାରରେ କ୍ରୁଡ ଅଏଲ ଶସ୍ତା ହେବା ଯୋଗୁ ଭାରତରେ ପେଟ୍ରୋଲ ଓ ଡିଜେଲ ଦର କମିବ କି?
ସକାଳର କାରବାର ସମୟରେ ଅନ୍ତର୍ଜାତୀୟ ବଜାରରେ କ୍ରୁଡ ଅଏଲ ଦରରେ ହ୍ରାସ ଦେଖାଯାଇଥିଲା। ବ୍ରେଣ୍ଟ କ୍ରୁଡ ୧.୦୧% ହ୍ରାସ ପାଇ ୮୮.୦୮୦ ଡଲାର ପ୍ରତି ବ୍ୟାରେଲରେ ପହଞ୍ଚିଥିଲା। ସେହିପରି WTI କ୍ରୁଡ ଅଏଲ ୧.୧୫% ହ୍ରାସ ପାଇ ୮୨.୩୦୧ ଡଲାର ପ୍ରତି ବ୍ୟାରେଲରେକାରବାର କରୁଛି।
କଚା ତେଲ ଦରରେ ଏହି ହ୍ରାସର ସବୁଠାରୁ ବଡ଼ କାରଣ ହେଉଛି ମଧ୍ୟପ୍ରାଚ୍ୟରେ ଉତ୍ତେଜନା କମିବା ଏବଂ ଆମେରିକା-ଇରାନ ମଧ୍ୟରେ ସମ୍ଭାବ୍ୟ ଚୁକ୍ତିର ଆଶା। ନିବେଶକମାନେ ଆଶା କରୁଛନ୍ତି ଯେ, ଦୁଇ ଦେଶ ମଧ୍ୟରେ ଆଲୋଚନା ହେଲେ ତେଲ ଯୋଗାଣର ସବୁଠାରୁ ଗୁରୁତ୍ୱପୂର୍ଣ୍ଣ ସମୁଦ୍ର ପଥ ହର୍ମୁଜ ଷ୍ଟ୍ରେଟ୍ ସୁରକ୍ଷିତ ରହିବ।
ଅନ୍ୟପଟେ, ପାକିସ୍ତାନ ପକ୍ଷରୁ ମଧ୍ୟ ସଙ୍କେତ ମିଳିଛି ଯେ ତେହରାନ (ଇରାନ) ଓ ୱାଶିଂଟନ (ଆମେରିକା) ମଧ୍ୟରେ ପରଦା ପଛରେ ଆଲୋଚନା ଚାଲିଛି। ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି ଯେ, ଗୁରୁତ୍ୱପୂର୍ଣ୍ଣ ଜଳପଥ ଉପରେ ତାଙ୍କର ନିୟନ୍ତ୍ରଣ ରହିଛି। ତେବେ ସେ ଇରାନ ଉପରେ ଆର୍ଥିକ ଚାପ ମଧ୍ୟ ଜାରି ରଖିଛନ୍ତି। ଅନ୍ୟପଟେ ଇରାନ ମଧ୍ୟ ସ୍ପଷ୍ଟ କରିଛି ଯେ, ବର୍ତ୍ତମାନ କୌଣସି ଅନ୍ତରୀଣ ଚୁକ୍ତିକୁ ନେଇ ବଡ଼ କୌଣସି ବିକାଶ ହୋଇନାହିଁ।
ଭାରତରେ ପେଟ୍ରୋଲ-ଡିଜେଲ ଦର ଉପରେ କ’ଣ ପ୍ରଭାବ ପଡ଼ିଲା?
ଅନ୍ତର୍ଜାତୀୟ ବଜାରରେ କ୍ରୁଡ ଅଏଲ ଦର ହ୍ରାସ ପାଇଥିଲେ ମଧ୍ୟ ଆଜି ଭାରତରେ ପେଟ୍ରୋଲ ଓ ଡିଜେଲ ଦରରେ କୌଣସି ପରିବର୍ତ୍ତନ ହୋଇନାହିଁ।
ଭାରତୀୟ ତେଲ ବିପଣନ କମ୍ପାନୀଗୁଡ଼ିକ ନିକଟ ଦିନଗୁଡ଼ିକରେ କ୍ରୁଡ ଅଏଲ ମହଙ୍ଗା ହୋଇଥିଲେ ମଧ୍ୟ ଦେଶରେ ପେଟ୍ରୋଲ-ଡିଜେଲ ଦର ବଢ଼ାଇନଥିଲେ। ତେଣୁ ଏବେ କ୍ରୁଡ ଅଏଲ ଦରରେ ସାମାନ୍ୟ ହ୍ରାସ ଆସିଥିବାରୁ ତୁରନ୍ତ ପେଟ୍ରୋଲ ଓ ଡିଜେଲ ଦର କମିବାର ସମ୍ଭାବନା ମଧ୍ୟ କମ୍ ରହିଛି।
