ନୂଆଦିଲ୍ଲୀ,୧୧।୫: କରୋନା ମହାମାରୀ ସଂକ୍ରମଣ ଯୋଗୁ ଦେଶରେ ସ୍ଥିତି ସଙ୍କଟ ଜନକ ହୋଇଛି। କରୋନା ଲଢ଼େଇ ବିରୋଧରେ ଟିକା ଏକମାତ୍ର ଅସ୍ତ୍ର ବୋଲି ବିଶ୍ୱସ୍ବାସ୍ଥ୍ୟ ସଂଗଠନ ପକ୍ଷରୁ କୁହାଯାଇଛି। ତେବେ ଭାରତରେ ସାର୍ବଜନୀକ ଟିକାଦାନ ଯୋଗୁ ଇତିମଧ୍ୟରେ ୧୭ କୋଟି ୧ ଲକ୍ଷ ୭୬ ହଜାର ୬୦୩ ଲୋକଙ୍କୁ ଟିକାଦାନ କରାଯାଇ ସାରିଛି। ୧୭ କୋଟି ଲୋକଙ୍କୁ ୧୧୪ ଦିନରେ ଟିକାଦାନ କରାଯାଇଛି। ଚାଇନା ଏଥି ପାଇଁ ୧୧୯ ଦିନ ସମୟ ନେଇଥିବାବେଳେ ଆମେରିକା ୧୧୫ ଦିନ ସମୟ ନେଇଥିଲା। ଭାରତରେ ଟିକାଦାନ ଶୀଘ୍ର ହେଉଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାରଙ୍କ ପକ୍ଷରୁ କୁହାଯାଇଛି। ତେବେ ଜୁଲାଇ ସୁଦ୍ଧା ଦେଶର ୩୦ କୋଟି ଲୋକଙ୍କୁ ଟିକାଦାନ କରାଯିବା କଷ୍ଟକର ବୋଲି ଏବେ ଅନୁମାନ କରାଯାଉଛି। ଟିକା ଅଭାବ ଏହାର ମୁଖ୍ୟ କାରଣ ବୋଲି କୁହାଯାଉଛି। ବର୍ତ୍ତମାନ ସୁଦ୍ଧା ସରକାର ଧାର୍ଯ୍ୟ କରିଥିବା ୩୦ କୋଟି ଲୋକଙ୍କ ମଧ୍ୟରୁ ୩ କୋଟିରୁ କମ୍ ଲୋକ ଟିକାର ଉଭୟ ଡୋଜ୍ ନେଇ ସାରିଛନ୍ତି। ଯାହାକି ୩୦ କୋଟିର ୧୦ ପ୍ରତିଶତ ପାଖାପାଖି ରହିଛି। ସମ୍ପ୍ରତି ଟିକାର ଉଭୟ ଡୋଜ୍ ନେଇଥିବା ଲୋକଙ୍କ ମଧ୍ୟରେ ୬୪, ୭୧, ୩୮୫ ସ୍ବାସ୍ଥ୍ୟ କର୍ମଚାରୀ, ୭୭,୫୫,୨୮୩ ଫ୍ରଣ୍ଟ୍ ଲାଇନ୍ ଓ୍ବାକର୍ସ ଏବଂ ୧,୪୯,୮୩,୨୧୭ ବରିଷ୍ଠ ନାଗରିକ ଅଛନ୍ତି। ସେହିପରି ୪୫ରୁ ୬୦ ବର୍ଷ ବୟସ୍କଙ୍କ ମଧ୍ୟରେ ୬୫, ୬୧, ୮୫୧ ଲୋକ ଟିକାର ଦ୍ୱିତୀୟ ଡୋଜ୍ ନେଇ ନାହାନ୍ତି। ସେହିପରି ୧୮ରୁ ଅଧିକ ବୟସ୍କଙ୍କ ମଧ୍ୟରୁ ୨୦ ଲକ୍ଷଙ୍କୁ ଟିକାଦାନ କରାଯାଇଛି। ଦେଶର ୫୫ କୋଟି ଲୋକଙ୍କୁ ଟିକାଦାନ କରାଯିବାର ଆବଶ୍ୟକତା ରହିଥିବାବେଳେ ବର୍ତ୍ତମାନ ସୁଦ୍ଧା ୦.୩୬ ପ୍ରତିଶତଙ୍କୁ କରୋନା ଟିକାଦାନ କରାଯାଇଥିବା ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ରିପୋର୍ଟରୁ ଜଣାପଡ଼ିଛି।
