ନୂଆଦିଲ୍ଲୀ,୨୦।୧୨ : ସମାଜବାଦୀ ପାର୍ଟିର ରାଜ୍ୟ ସଭା ଏମ୍ପି ତଥା ବରିଷ୍ଠ ଆଇନଜୀବୀ କପିଲ ସିବଲ କେନ୍ଦ୍ର ସରକାରଙ୍କୁ ସ୍ବାଧୀନତାର ଶେଷ ଭିତ୍ତିଭୂମି ନ୍ୟାୟପାଳିକାକୁ ନିଜ ହାତକୁ ନେବାକୁ ଚେଷ୍ଟା କରୁଥିବା ଅଭିଯୋଗ କରିଛନ୍ତି। ଏହା ବିରୋଧରେ କୋର୍ଟ ଦୃଢ଼ ଭାବରେ ଠିଆ ହେବେ ବୋଲି ସେ କହିଛନ୍ତି। ବିଚାରପତିଙ୍କ ନିଯୁକ୍ତି ନେଇ କେନ୍ଦ୍ର ସହ ଚାଲିଥିବା ବିବାଦ ଉପରେ କପିଲ ସିବଲ ସ୍ପଷ୍ଟ କରିଛନ୍ତି ଯେ ବର୍ତ୍ତମାନର କଲେଜିୟମ ବ୍ୟବସ୍ଥାରେ କେତେକ ଅସୁବିଧା ଅଛି। କିନ୍ତୁ ସରକାରଙ୍କୁ ସମ୍ପୂର୍ଣ୍ଣ ସ୍ବାଧୀନତା ଦେବା ଠିକ ରାସ୍ତା ନୁହେଁ। ଏହା ଅତ୍ୟନ୍ତ ବିପଜ୍ଜନକ । ନ୍ୟୁଜ ଚ୍ୟାନେଲକୁ ଦେଇଥିବା ଏକ ସ୍ବତନ୍ତ୍ର ସାକ୍ଷାତକାରରେ ପୂର୍ବତନ ଆଇନ ମନ୍ତ୍ରୀ କପିଲ ସିବଲ କହିଛନ୍ତି ଯେ ବିଚାରପତିଙ୍କ ନିଯୁକ୍ତିକୁ ନେଇ ସରକାର ଚୂଡ଼ାନ୍ତ ନିଷ୍ପତ୍ତି ନେବାକୁ ଚାହୁଁଛନ୍ତି ଏବଂ ଯଦି ଏହା ଘଟେ ତେବେ ଏହା ଏକ ନ୍ୟାୟିକ ବ୍ୟବସ୍ଥାରେ ବିପର୍ଯ୍ୟୟ ହେବ।
ଉପରାଷ୍ଟ୍ରପତି ଜଗଦୀପ ଧନକର ଏବଂ ଆଇନ ମନ୍ତ୍ରୀ କିରେନ ରିଜିଜୁଙ୍କ ମନ୍ତବ୍ୟ ସମ୍ପର୍କରେ ପଚରାଯାଇଥିବା ବେଳେ ସିବଲ କହିଛନ୍ତି ଯେ ସେମାନେ ଅନ୍ୟ କୌଣସି ପ୍ରସଙ୍ଗରେ ନୀରବ ରହି ନାହାଁନ୍ତି, ସେମାନେ ଏବେ କାହିଁକି ଚୁପ ରହିବେ? ସେ କହିଛନ୍ତି ଯେ ନ୍ୟାୟପାଳିକା ହେଉଛି ସ୍ବାଧୀନତାର ଶେଷ ମୂଳଦୁଆ, ଯାହାକୁ ସରକାର ଏପର୍ଯ୍ୟନ୍ତ ନିଜ ହାତକୁ ନେଇ ନାହାନ୍ତି। ନିର୍ବାଚନ ଆୟୋଗ ଠାରୁ ଆରମ୍ଭ କରି ଗଭର୍ନର, ବିଶ୍ୱବିଦ୍ୟାଳୟ କୁଳପତି, ଏନଫୋର୍ସମେଣ୍ଟ ଡାଇରେକ୍ଟୋରେଟ ଏବଂ କେନ୍ଦ୍ରୀୟ ତଦନ୍ତ ବ୍ୟୁରୋ ପର୍ଯ୍ୟନ୍ତ ଅନ୍ୟ ସମସ୍ତ ଅନୁଷ୍ଠାନକୁଚ ସରକାର ନିଜ ହାତକୁ ନେଇ ସାରିଛନ୍ତି। ଯାଞ୍ଚ୍ ବିଭାଗ, ଏନଆଇଏ ଏବଂ ଗଣମାଧ୍ୟମକୁ ମଧ୍ୟ ନିଜ ନିୟନ୍ତ୍ରଣକୁ ସରକାର ନେଇସାରିଛନ୍ତି।
କୋର୍ଟ ଅତ୍ୟଧିକ ଛୁଟିଦିନ ହେଉଥିବା ଆଇନ ମନ୍ତ୍ରୀଙ୍କ ମନ୍ତବ୍ୟକୁ ସିବଲ ସମ୍ପୂର୍ଣ୍ଣ ଅନ୍ୟାୟ ବୋଲି କହିଛନ୍ତି। ସିବଲ ବ୍ୟଙ୍ଗାତ୍ମକ ଭାବରେ କହିଛନ୍ତି, ଆଇନ ମନ୍ତ୍ରୀ ଜଣେ ଅଭ୍ୟାସକାରୀ ଆଇନଜୀବୀ ନୁହଁନ୍ତି। ଜଣେ ଜଜ ପ୍ରତିଦିନ ୧୦ ରୁ ୧୨ ଘଣ୍ଟା ଆବେଦନ ଶୁଣନ୍ତି, ପରଦିନର ଶୁଣାଣି ପାଇଁ ପୃଷ୍ଠଭୂମି ପଢ଼ନ୍ତି ଏବଂ ବିଚାର ଲେଖନ୍ତି। ତାଙ୍କର ଛୁଟିଦିନଗୁଡିକ ସ୍ପିଲ ଓଭର ପରିଚାଳନା କରିବାରେ ବିତିଥାଏ।
ଏମ୍ପିମାନଙ୍କ ଅପେକ୍ଷା କୋର୍ଟ ଅଧିକ ପରିଶ୍ରମ କରନ୍ତି ବୋଲି ସେ ଦାବି କରିଛନ୍ତି। ସିବଲ କହିଛନ୍ତି ଯେ ଗତ ଏକ ବର୍ଷ ମଧ୍ୟରେ ଜାନୁଆରୀରୁ ଡିସେମ୍ବର ମଧ୍ୟରେ ସଂସଦ ୫୭ ଦିନ କାମ କରିଥିଲା। ଅପରପକ୍ଷରେ କୋର୍ଟ ଗୋଟିଏ ବର୍ଷରେ ୨୬୦ ଦିନ କାର୍ଯ୍ୟ କରିଥାଏ।
