ବୁଗୁଡ଼ା,୨୬ା୧(ଡି.ଏନ୍.ଏ.): ବୁଗୁଡ଼ା ବ୍ଲକ ମୋଟାବାଡ଼ି ଗ୍ରାମରେ ଉଦ୍ୟାନ ବିଭାଗ ଅଧୀନରେ ୪ ହେକ୍ଟର ଜମିରେ ୮ଶହ କାଜୁ ଗଛ ଲାଗିଥିବା ନେଇ ଫଳକ ମରାଯାଇଛି। ହେଲେ ସେଠାରେ ଏବେ ୮ଟି ମଧ୍ୟ କାଜୁ ଗଛ ନାହିଁ। ଫଳକରେ ଲେଖାଯାଇଥିବା ସୂଚନାନୁସାରେ ଏମ୍ଜିଏନ୍ଆରଇଜିଏସ୍ ଯୋଜନାରେ ୨୦୨୧ -୨୨ ଆର୍ଥିକ ବର୍ଷରେ ୪ ହେକ୍ଟର ଜମିରେ ହେକ୍ଟର ପିଛା ୨ ଶହ ଗଛ ହିସାବରେ ୮ଶହ କାଜୁ ଗଛ ଲାଗିଥିଲା, ଯାହା ୨୦୨୧ ଜୁଲାଇ ୫ରେ ହୋଇଥିବା ଉଲ୍ଲେଖ ରହିଛି। ତେବେ କାର୍ଯ୍ୟ ଶେଷ କେବେ ହେଲା ତାହା ଦର୍ଶାଯାଇନି। ଗଛ ଲଗାଇବା ନାଁରେ ମିଥ୍ୟା ବିଲ୍ କରି ଲକ୍ଷାଧିକ ଟଙ୍କା ଆତ୍ମସାତ କରାଯାଇଥିବା ଅଭିଯୋଗ ହୋଇଛି। ଏନେଇ ଉଦ୍ୟାନ ବିଭାଗ ଓଭରସିଅର ରବୀନ୍ଦ୍ର କୁମାର ଦଳେଇଙ୍କୁ ପଚାରିବାରେ ସେ ସେଠାରେ ଗଛ ଅଛି ବୋଲି ସଫେଇ ଦେଇଛନ୍ତି। ଏହାର ଉଚ୍ଚସ୍ତରୀୟ ତଦନ୍ତ କରାଗଲେ ପ୍ରକୃତ ସତ୍ୟାସତ୍ୟ ସହ ଆହୁରି ଅନେକ ଦୁର୍ନୀତି ପଦାକୁ ଆସିବ ବୋଲି ସାଧାରଣରେ ମତ ପ୍ରକାଶ ପାଇଛି।
