କେନ୍ଦୁଝର, ୨୮ା୧୨(ସ୍ବ.ପ୍ର.) କେନ୍ଦୁଝର ସହରର ବିଭିନ୍ନ ଅଞ୍ଚଳକୁ ୪ ଦିନ ହେଲା ପାନୀୟ ଜଳ ଯୋଗାଣ ବନ୍ଦ ରହିଥିବାରୁ ସାହିବାସୀ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏନେଇ ଜନସ୍ବାସ୍ଥ୍ୟ ବିଭାଗ ପକ୍ଷରୁ ପଦକ୍ଷେପ ନିଆ ନ ଯିବାରୁ ପଞ୍ଚଦେବ ବିହାର, ମଶାଣୀ ସାହି, ଗୋବିନ୍ଦମୁଣ୍ଡା ଛକ, ନିହାଲସିଂ ଛକ ଆଦି ଅଞ୍ଚଳର ଲୋକେ ସୋମବାର ଜିଲାପାଳଙ୍କ ଦ୍ୱାରସ୍ଥ ହୋଇ ଜଳ ଯୋଗାଣ ସ୍ବାଭାବିକ କରିବାକୁ ଦାବି କରିଛନ୍ତି। ସରକାର ପାଇପ ଦ୍ୱାରା ବିଶୁଦ୍ଧ ପାଣି ଯୋଗାଇଦେବାକୁ ବ୍ୟାପକ ଅର୍ଥ ଖର୍ଚ୍ଚ କରିଥିଲେ ହେଁ ଅନେକ ସମୟରେ ବିଦ୍ୟୁତ ସମସ୍ୟା, ପାଣି ପାଇପ ଫାଟିବା, ନିମ୍ନମାନର ପାଇପ ବିଛା କାମ ଆଦି ଯୋଗୁ ସହରର ବିଭିନ୍ନ ଅଞ୍ଚଳକୁ ନିୟମିତ ଜଳ ଯୋଗାଣ ହେଉନାହିଁ। ଏଥିପାଇଁ ଲୋକେ ଜଳ କର ମଧ୍ୟ ଦେଇ ଆସୁଛନ୍ତି। ଏହା ସତ୍ତ୍ୱେ ଏଭଳି ଜଳ ଯୋଗାଣ ସମସ୍ୟା ଲାଗି ରହୁଥିବା ଏବଂ ବିକଳ୍ପ ବ୍ୟବସ୍ଥା କରାଯାଉ ନ ଥିବାରୁ ଲୋକେ ବହୁ ଅସୁବିଧା ଭୋଗୁଥିବା କହିଛନ୍ତି। ଏନେଇ ନିର୍ମଳ ଚନ୍ଦ୍ର ନାୟକ, କୃଷ୍ଣଚନ୍ଦ୍ର ବାରିକ, କୈଳାସ ଚନ୍ଦ୍ର ମହାପାତ୍ରଙ୍କ ସମେତ ବହୁ ଦସ୍ତଖତ କରି ଦାବିପତ୍ର ପ୍ରଦାନ କରିଥିବା ଜଣାପଡିଛି।
