ହରାରେ,୨୫ା୭: ଇଶାନ କିଶନ ଓ ତିଲକ ବର୍ମାଙ୍କ ବିସ୍ଫୋରକ ଅର୍ଦ୍ଧଶତକ ବଳରେ ଶନିବାର ଅନୁଷ୍ଠିତ ଦ୍ୱିତୀୟ ଟି୨୦ ମ୍ୟାଚ୍ରେ ଭାରତ ୯୦ ରନରେ ଜିମ୍ବାଓ୍ବେକୁ ପରାସ୍ତ କରିଛି।
ଫଳରେ ଦୁଇ ବିଜୟ ସହ ଭାରତ ୩ ମ୍ୟାଚ୍ ବିଶିଷ୍ଟ ସିରିଜ୍କୁ ୨-୦ରେ ଆଗୁଆ ଜିତି ନେଇଛି। ଏହି ମ୍ୟାଚ୍ରେ ୟଶ ଠାକୁର ଟି୨୦ ଅନ୍ତର୍ଜାତୀୟ କ୍ୟାରିୟର ଆରମ୍ଭ କରିଛନ୍ତି। ସିରିଜ୍ର ତୃତୀୟ ତଥା ଅନ୍ତିମ ମ୍ୟାଚ୍ ରବିବାର ଖେଳାଯିବ।
ପାଇ ପ୍ରଥମେ ବ୍ୟାଟିଂ କରିଥିବା ଭାରତ ଆରମ୍ଭରୁ ଅଭିଷେକ ଶର୍ମା (୮)ଙ୍କ ଉଇକେଟ ହରାଇଥିଲା। ଅନ୍ୟତମ ଓପନର ବୈଭବ ସୂର୍ଯ୍ୟବଂଶୀ ୯ ବଲରେ ୨୦ (୩ ଚୌକା ଓ ୧ ଛକା) ରନ କରି ପାଭିଲିଅନ ଫେରିଥିଲେ। ଇଶାନ କିଶନ ଓ ଅଧିନାୟକ ଶ୍ରେୟସ ଆୟାର ତୃତୀୟ ଉଇକେଟରେ ୪୨ ବଲରେ ୬୬ ରନ ଯୋଡ଼ିଥିଲେ। ଅଧିନାୟକ ଶ୍ରେୟସ (୨୫ ରନ, ୫ ଚୌକା) ଆଉଟ୍ ହେବା ପରେ ଇଶାନଙ୍କ ସହ ତିଲକ ମିଶି ଦଳୀୟ ସ୍କୋରକୁ ଦ୍ରୁତ ଗତିରେ ଆଗେଇ ନେଇଥିଲେ। ଦୁହେଁ ଚତୁର୍ଥ ଉଇକେଟରେ ୪୩ ବଲରେ ବିସ୍ଫୋରକ ୯୪ ରନ କରି ଦଳୀୟ ସ୍କୋରକୁ ୨୦୦ରେ ପଞ୍ଚାଇଥିଲେ।
ଇଶାନ ୪୪ ବଲରେ ୯ ଚୌକା ଓ ୨ ଛକା ସହ ୮୧ ରନ କରି ଆଉଟ୍ ହୋଇଥିଲେ। ଶେଷ ଆଡ଼କୁ ରିଙ୍କୁ ସିଂ ୧୨ ରନ କରି ଆଉଟ୍ ହୋଇଥିବା ବେଳେ ତିଲକ ୨୯ ବଲରେ ୬୦ (୫ ଚୌକା ଓ ୩ ଛକା) ରନ କରି ଅପରାଜିତ ରହିଥିଲେ। ଫଳରେ ୨୦ ଓଭରରେ ଭାରତ ୫ ଉଇକେଟ ହରାଇ ୨୧୯ ରନ କରିଥିଲା।
ଜବାବରେ ଜିମ୍ବାଓ୍ବେକୁ ବ୍ରିଆନ ବେନେଟ (୧୯ ବଲ, ୩୨ ରନ, ୩ ଲେଖାଏ ଚୌକା ଓ ଛକା) ଭଲ ଆରମ୍ଭ ପ୍ରଦାନ କରିଥିଲେ। ହେଲେ ତାଙ୍କ ଉଇକେଟ ପଡ଼ିବା ସହ ଦଳ କ୍ରମାଗତ ବ୍ୟବଧାନରେ ଉଇକେଟ ହରାଇ ୧୭.୫ ଓଭରରେ ୧୨୯ ରନରେ ଅଲଆଉଟ୍ ହୋଇଯାଇଥିଲା।
