ଡେଲାଙ୍ଗ/ଗୋପ/କାକଟପୁର,୩୧।୧(ଡି.ଏନ୍.ଏ.):ଡେଲାଙ୍ଗ ବ୍ଲକ ଅଞ୍ଚଳରେ ପ୍ରଧାନମନ୍ତ୍ରୀ ଆବାସ ଯୋଜନାରେ ଅନିୟମିତତା ଅଭିଯୋଗ ଆଣି ଡେଲାଙ୍ଗ -ପିପିଲି ଜନକଲ୍ୟାଣ ମଞ୍ଚର ଆବାହକ ରାଧାମୋହନଙ୍କ ନେତୃତ୍ୱରେ ଶତାଧିକ ହିତାଧିକାରୀ ସୋମବାର ବ୍ଲକ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଛନ୍ତି। ଫନୀ ବାତ୍ୟା ସମୟରେ ବ୍ଲକର ଅନେକ ହିତାଧିକାରୀ ସରକାରୀ ସହାୟତାରୁ ବଞ୍ଚିତ ହୋଇଥିବା ବେଳେ ଅଯୋଗ୍ୟଙ୍କୁ ସହାୟତା ଦିଆଯାଇଥିଲା। ଏପରିକି ୧୫ଶହ ହିତାଧିକାରୀଙ୍କ ଆକାଉଣ୍ଟକୁ ବ୍ଲକ କରାଯାଇ ଟଙ୍କା ଫେରସ୍ତ ନିଆଯାଇଥିଲା। ଏହି ସବୁ ଘଟଣାରେ ଏକ ରାଜନୌତିକ ଦଳର ହାତ ଥିବା ଆବାହକ ରାଧାମୋହନ କହିଛନ୍ତି। ସେହିପରି ଆବାସ ଅନିୟମିତତା ନେଇ ଅଯୋଗ୍ୟଙ୍କ ବିରୋଧରେ ଗରିବ ହିତାଧିକାରୀ ଅଭିଯୋଗ କରିବା ସମ୍ଭବ ନୁହେଁ। ତେଣୁ ତୁରନ୍ତ ସରକାରୀ ଅଧିକାରୀମାନେ ଠିକ୍ ତଦନ୍ତ କରି ତାଲିକା ସଂଶୋଧନ କରନ୍ତୁ ବୋଲି ମଞ୍ଚର କର୍ମକର୍ତ୍ତା ଜନ୍ମେଜୟ ଜେନା କହିଛନ୍ତି। ଏହି ସମସ୍ୟାର ସମାଧାନ ଲାଗି ଜିଲାପାଳଙ୍କ ଉଦ୍ଦେଶ୍ୟରେ ଏକ ଦାବିପତ୍ର ଅତିରିକ୍ତ ତହସିଲଦାର ରଞ୍ଜନ ନାୟକଙ୍କୁ ଦିଆଯାଇଥିଲା। ଆଇନଜୀବୀ ପ୍ରମୋଦ ପାତ୍ର, ଦେବାଶିଷ୍ ଦୀକ୍ଷିତ୍, ଧନେଶ୍ୱର ପରିଡା, ଚଣ୍ଡେଶ୍ୱର ଦାଶ, ବିଚିତ୍ର ରାଉତ, ସୁରେଶ ମହାରଣା, ରାଜେନ୍ଦ୍ର ସ୍ବାଇଁ, ଅକ୍ଷୟ ନାୟକ ପ୍ରମୁଖ ୩ହଜାରରୁ ଊର୍ଦ୍ଧ୍ୱ ଜନସାଧାରଣ ଉପସ୍ଥିତ ଥିଲେ। ଡେଲାଙ୍ଗ ଥଧିକାରୀ ଅନିଲ ମହାନ୍ତି ଓ ହାଟ ବଜାର ଫାଣ୍ଡି ଅଧିକାରୀ ଧନପତି ପିଙ୍ଗ୍ ଫୋର୍ସ ସହ ଥିଲେ। ଶୀଘ୍ର ସମସ୍ୟାର ସମାଧାନ କରା ନ ଗଲେ ଆଗାମୀ ଦିନରେ ଜିଲାପାଳ କାର୍ଯ୍ୟାଳୟ ଘେରାଉ କରାଯିବ ବୋଲି ମଞ୍ଚ ଚେତାବନୀ ଦେଇଛି। ସେହିଭଳି ଗୋପ ବ୍ଲକର ୩୧ ପଞ୍ଚାୟତରେ ଆବାସ ଗୃହ ଯୋଜନାକୁ ନେଇ ଦ୍ୱନ୍ଦ୍ୱ ବଢ଼ି ଚାଲିଛି। ଗତ ୧୬ତାରିଖରୁ ଆବାସ ଯୋଜନାକୁ ନେଇ ଗ୍ରାମସଭା ସହିତ ତଦନ୍ତ ସୋମବାର ଶେଷ ହୋଇ ଥିବାବେଳେ ବଣିଆ ସାହି, ନୂଆଖୋଲା ପଞ୍ଚାୟତରେ ନାନା ଦ୍ୱନ୍ଦ୍ୱ ଯୋଗୁ ଗ୍ରାମସଭା ହୋଇପାରି ନାହିଁ। ସେହିଭଳି କାକଟପୁର ପଞ୍ଚାୟତରେ ସୋମବାର ଡକାଯାଇଥିବା ଗ୍ରାମସଭାରେ ହୋହଲ୍ଲା ହୋଇଛି। ୧୪୧ ହିତାଧିକାରୀଙ୍କ ମଧ୍ୟରୁ ୨୭ଜଣ ହିତାଧିକାରୀ ଚୟନ ହୋଇଥିବା ନେଇ ସଭାକୁ ପିଇଓ ଜଣାଇଥିଲେ। ହେଲେ ଯେଉଁ ହିତାଧିକାରୀଙ୍କ ନଁା ୧୪୧ ତାଲିକାରେ ଥିଲା, ଏବେ ବାଦ ପଡିଥିବାରୁ ସେମାନେ ଏହାକୁ ବିରୋଧ କରି ହୋହଲ୍ଲା କରିଥିଲେ। ଫଳରେ ଗ୍ରାମସଭାକୁ ସରପଞ୍ଚ ଅଭୟ ସେଠୀ ବନ୍ଦ କରିଦେଇଥିଲେ।
