ନୂଆଦିଲ୍ଲୀ,୧୩।୮(ପି.ଟି.): ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ଅନ୍ୟତମ ପ୍ରାୟୋଜକ ଏଜୁକେଶନ ଟେକ୍ନୋଲୋଜି କମ୍ପାନୀ ଅନ୍ଏକାଡେମୀ ଏବେ ଟାଇଟଲ ସ୍ପୋନ୍ସରଶିପ୍ ଦୌଡ଼ରେ ସାମିଲ ହୋଇଛି। ଚାଇନା ମୋବାଇଲ ଫୋନ୍ କମ୍ପାନୀ ଭିଭୋ ବଦଳରେ ଅନ୍ଏକାଡେମୀ ଚଳିତ ସେସନ ପାଇଁ ବିଡ୍ ଦାଖଲ କରିବାକୁ ନିଷ୍ପତ୍ତି ନେଇଛି। ଅନ୍ଏକାଡେମୀ ବିଡ୍ କାଗଜପତ୍ର କ୍ରୟ କରିଛି। ତେବେ ଅନ୍ଏକାଡେମୀ ତରଫରୁ ଏ ସଂକ୍ରାନ୍ତରେ ଅଧିକ କିଛି କୁହାଯାଇନାହିଁ। କିନ୍ତୁ ଅନ୍ଏକାଡେମୀ ଏହାକୁ ବେଶ୍ ଗୁରୁତ୍ୱ ଦେଇଛି ବୋଲି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ଜଣେ ଅଧିକାରୀ କହିଛନ୍ତି। ଅନ୍ୟପଟେ ଯଦି ପତଞ୍ଜଳି ବିଡ୍ ଦାଖଲ କରେ ତା’ହେଲେ ଟାଇଟଲ ସ୍ପୋନ୍ସରଶିପ୍ ପାଇଁ ଏକ ପ୍ରତିଯୋଗିତା ହେବ ବୋଲି ବରିଷ୍ଠ ଅଧିକାରୀ ଜଣକ ନାମ ଗୋପନ ରଖି କହିଛନ୍ତି।
ପୂର୍ବରୁ ପ୍ରାୟୋଜକ ଭାବେ ଭିଭୋ ବର୍ଷକୁ ୪୪୦ କୋଟି ଟଙ୍କା ଦେଉଥିଲା। ତେବେ ଚାଇନା ଓ ଭାରତ ମଧ୍ୟରେ ସୃଷ୍ଟି ହୋଇଥିବା ସୀମା ବିବାଦ ପାଇଁ ଭିଭୋକୁ ସ୍ପୋନ୍ସରଶିପ୍ରୁ ଓହରିବାକୁ ପଡିଥିଲା। ବିସିସିଆଇ ଏବେ ଅପେକ୍ଷାକୃତ କମ୍ ମୂଲ୍ୟରେ ୩୦୦ରୁ ୩୫୦ କୋଟି ମଧ୍ୟରେ ୪ ମାସ ଓ ୧୩ ଦିନ ପାଇଁ ପ୍ରାୟୋଜକ ସନ୍ଧାନରେ ରହିଛି। ଉଲ୍ଲେଖଥାଉ କି, ଅନ୍ଏକାଡେମୀ ୨୦୨୦ରୁ ୨୦୨୩ ପର୍ଯ୍ୟନ୍ତ ଡ୍ରିମ ୧୧ ଓ ପେଟିଏମ୍ ସହିତ ଆଇପିଏଲ୍ ସେଣ୍ଟ୍ରାଲ ସ୍ପୋନ୍ସରଶିପ୍ ପୁଲ୍ର ଅଂଶବିଶେଷ ରହିଆସିଛି। ସେଣ୍ଟ୍ରାଲ ସ୍ପୋନ୍ସରଶିପ୍ ଓ ଟାଇଟଲ ସ୍ପୋନ୍ସରଶିପ୍ ମଧ୍ୟରେ ଫରକ ରହିଛି। ସେଣ୍ଟ୍ରାଲ ସ୍ପୋନ୍ସରଶିପ୍ରେ ଜର୍ସି ରାଇଟ୍ ସାମିଲ ନାହିଁ ବୋଲି ବୋର୍ଡର ଅଧିକାରୀ କହିଛନ୍ତି।
