ନୂଆଦିଲ୍ଲୀ,୩୦।୭: ଶ୍ରୀଲଙ୍କା ଗୁରୁବାର ଖେଳାଯାଇଥିବା ତୃତୀୟ ତଥା ଅନ୍ତିମ ଟି୨୦ ମ୍ୟାଚ୍ରେ ୭ ଉଇକେଟରେ ଭ୍ରମଣକାରୀ ଭାରତକୁ ପରାସ୍ତ କରି ସିରିଜ ହାତେଇଥିଲା। ହେଲେ ଭାରତୀୟ ଟିମ୍ର ପ୍ରଶଂସାରେ ଶତମୁଖ ହେଉଛନ୍ତି ଲୋକେ। ଚିନ୍ତାଜନକ ପରିସ୍ଥିତିରେ ସିରିଜ ଖେଳି ଫେରିବା ବଡ଼ କଥା ବୋଲି ପ୍ରଶଂସକ ମତ ରଖୁଛନ୍ତି। ଏହି କ୍ରମରେ ପାକିସ୍ତାନର ଅଭିଜ୍ଞ କ୍ରିକେଟର ଇଞ୍ଜମାମ-ଉଲ-ହକ୍ ମଧ୍ୟ ଟିମ୍ ଇଣ୍ଡିଆର ପ୍ରଶଂସା କରିଛନ୍ତି। ଦଳ ଚାହିଁଥିଲେ ଖେଳିବାକୁ ମନା କରିପାରିଥାନ୍ତା। ହେଲେ ଦଳ ହାରିବାକୁ ଡରେ ନାହିଁ ବୋଲି ସେ କହିଛନ୍ତି।
ନିଜର ୟୁଟ୍ୟୁବ୍ ଚ୍ୟାନେଲ୍ ‘ଦ ମ୍ୟାଚ୍ ଓ୍ବିନର’ରେ ଭାରତ-ଶ୍ରୀଲଙ୍କା ମଧ୍ୟରେ ହୋଇଥିବା ଟି-୨୦ ସିରିଜ ଉପରେ ଆଲୋଚନା କରିଥିଲେ। ଏଥିରେ ସେ କହିଥିଲେ, ଯେଉଁଭଳି ପରିସ୍ଥିତିରେ ଭାରତ ଖେଳି ସିରିଜ ପୂରଣ କରିଛି ତାହା ପ୍ରଶଂସନୀୟ। କ୍ରୁନାଲ ପାଣ୍ଡ୍ୟାଙ୍କ ପରେ ୮ ଖେଳାଳି ଚାଲିଯାଇଥିଲେ। ସେତେବେଳେ ଖେଳିବେ କି ନାହିଁ ବୋଲି କହିବାର ସୁଯୋଗ ଥିଲା। ହେଲେ ଯୁବ କ୍ରିକେଟରଙ୍କୁ ଧରି ଭାରତ ପଡ଼ିଆକୁ ଓହ୍ଲାଇଥିଲା। ଏହା ଦର୍ଶାଉଛି କି ଭାରତ ହାରିବାକୁ ଡରେ ନାହିଁ। ଶ୍ରୀଲଙ୍କା ଭଲ ଖେଳିଲା ବୋଲି କହିପାରିବି ନାହିଁ। ମାତ୍ର ୮ଜଣ ଖେଳାଳି ନ ଥାଇ ଭାରତ ଖେଳିଲା। ପଛକୁ ହଟିଲା ନାହିଁ, ତାହାର ପ୍ରଶଂସା ନିଶ୍ଚୟ କରିବି ବୋଲି ସେ କହିଛନ୍ତି।
ଏଥିସହ ସେ ରାହୁଲ ଦ୍ରାବିଡଙ୍କ ପ୍ରଶଂସା କରି କହିଛନ୍ତି, ଅଣ୍ଡର-୧୯ ଦଳରେ ସେ ନୂଆ ଖେଳାଳିମାନଙ୍କୁ ପ୍ରସ୍ତୁତ କରିଛନ୍ତି ତାହା ପ୍ରଶଂସାଯୋଗ୍ୟ। ସେ ହିଁ ଦଳକୁ କେବେ ଆଶା ନ ଛାଡ଼ିବାକୁ ଶିଖାଇଛନ୍ତି। ସତ କହିଲେ ଏଭଳି ସ୍ଥିତିରେ ଖେଳିବା ଜାରି ରଖିବା ପ୍ରଶଂସାର ବିଷୟ ବୋଲି ସେ କହିଛନ୍ତି। ତେବେ ଏହି ଭିଡିଓ ଏବେ ଚର୍ଚ୍ଚାର ବିଷୟ ପାଲଟିଛି।
