Advertisement

ଅନ୍ତର୍ଜାତୀୟ ରିପୋର୍ଟ ଓ ଭାରତ ସରକାର

ବିଚିତ୍ର ବିଶ୍ୱାଳ

ସଦ୍ୟ ପ୍ରକାଶିତ ବିଶ୍ୱ କ୍ଷୁଧା ସୂଚକାଙ୍କ ଅର୍ଥାତ୍‌ ଗ୍ଲୋବାଲ୍‌ ହଙ୍ଗର ଇଣ୍ଡେକ୍ସରେ ୧୨୧ଟି ଦେଶ ମଧ୍ୟରୁ ଭାରତ ରହିଛି ୧୦୭ତମ ସ୍ଥାନରେ । ଭାରତ ତଳକୁ ବିଶ୍ୱର ମାତ୍ର ୧୪ଟି ଦେଶ ଅଛନ୍ତି। ବାଂଲାଦେଶ, ନେପାଳ ପରି ଦେଶ ମଧ୍ୟ ଭାରତଠାରୁ ଭଲ ସ୍ଥିତିରେ ଅଛନ୍ତି। ଏହା ପୂର୍ବରୁ ୨୦୨୦ରେ ଭାରତ ୯୪ତମ ସ୍ଥାନରେ ଥିଲା ଓ ୨୦୨୧ରେ ୧୦୧ତମ ସ୍ଥାନକୁ ଖସିଥିଲା। ଚଳିତ ବର୍ଷ ଆଉ ୬ଟି ସ୍ଥାନ ତଳକୁ ଖସିଛି। ବିଶ୍ୱ କ୍ଷୁଧା ସୂଚକାଙ୍କରେ ଭାରତ କ୍ରମାଗତ ଭାବେ ତଳକୁ ତଳକୁ ଖସି ଚାଲିଛି। ଏହା ଅତ୍ୟନ୍ତ ଚିନ୍ତାର ବିଷୟ। ରିପୋର୍ଟ ଅନୁସାରେ ବିଶ୍ୱର ୮୨୮ ବିଲିୟନ ଲୋକ ଭୋକରେ ଶୋଇବାକୁ ଯାଉଛନ୍ତି। ଅନ୍ତର୍ଜାତୀୟ ସଂସ୍ଥା କନ୍‌ସନ୍‌ ୱାଲର୍‌ଡ ୱାଇଡ୍‌ ଓ ୱେଲ୍‌ଟ ହଙ୍ଗର ହିଲ୍‌ଫେ ଦ୍ୱାରା ପ୍ରତ୍ୟେକ ବର୍ଷ ଅକ୍ଟୋବରରେ ଏହି ରିପୋର୍ଟ ପ୍ରକାଶିତ ହୋଇଥାଏ। ବିଶ୍ୱର ଭିନ୍ନ ଭିନ୍ନ ଦେଶଗୁଡ଼ିକ କ୍ଷୁଧା ସମ୍ପର୍କିତ ସଷ୍ଟେନେବଲ୍‌ ଡେଭେଲପ୍‌ମେଣ୍ଟ ଗୋଲ୍‌କୁ କିପରି ଭାବେ ହାସଲ କରିଛନ୍ତି, ତାହାକୁ ନିରୀକ୍ଷଣ କରି ଏହି ରିପୋର୍ଟ ପ୍ରକାଶିତ ହୋଇଥାଏ। ଏହି ରିପୋର୍ଟ ଆହୁରି କହିଛି ଯେ, ବିଶ୍ୱର ୪୫ଟି ଦେଶର ସମୁଦାୟ ୫୦ମିଲିୟନ ଲୋକ ଦୁର୍ଭିକ୍ଷ ପରିସ୍ଥିତିରେ ଅଛନ୍ତି। ବିଶ୍ୱଗୁରୁ ହେବାକୁ ଆସ୍ଫାଳନ କର଼ୁଥିବା ଆମ ସରକାର ଏହି ରିପୋର୍ଟ ପ୍ରକାଶ ପାଇବା ପରେ ସ୍ବଭାବଗତ ଭାବେ ଉକ୍ତ ରିପୋର୍ଟକୁ ପ୍ରତ୍ୟାଖ୍ୟାନ କରିଛନ୍ତି ଓ ଏହା ଭାରତକୁ ବଦ୍‌ନାମ ତଥା ତଳୁଆ ଦେଖାଇବା ପାଇଁ ଅନ୍ତର୍ଜାତୀୟ ସ୍ତରରେ ଏକ ଷଡ଼ଯନ୍ତ୍ର ବୋଲି କହିଛନ୍ତି। ଅନ୍ତର୍ଜାତୀୟ ସଂସ୍ଥାଗୁଡ଼ିକର ରିପୋର୍ଟ ପ୍ରତି ମୋଦି ସରକାରଙ୍କ ଏପରି ଆକ୍ଷେପ ନୂଆ ନୁହେଁ। ୨୦୨୦ ଓ ୨୦୨୧ରେ ହଙ୍ଗର ଇଣ୍ଡେକ୍ସ ପ୍ରକାଶ ପାଇବା ବେଳେ ବି ମୋଦି ସରକାର ଓ ତାଙ୍କର ମନ୍ତ୍ରୀମାନେ ସମାନ ଅଭିଯୋଗ ଆଣିଥିଲେ। ସମସ୍ୟାକୁ ସମାଧାନ କରିବାକୁ ପ୍ରୟାସ ନ କରି ସମସ୍ୟାକୁ ଗୋଟାପଣେ ଟାଳିଦେବା ବା ତଥ୍ୟକୁ ଅସ୍ବୀକାର କରିବା ମୋଦି ସରକାରଙ୍କର ଏକ ନୂଆ କୌଶଳ ହୋଇଛି। ୨୦୧୪ ପୂର୍ବର କୌଣସି ଅନ୍ତର୍ଜାତୀୟ ସଂସ୍ଥାଗୁଡ଼ିକର ରିପୋର୍ଟକୁ ନେଇ ଆମ ଦେଶରେ ଏପରି ପ୍ରତିକ୍ରିୟାର ଧାରା ନ ଥିଲା। ଯଦିଓ ସେତେବେଳେ ଭାରତର ସ୍ଥିତି ଭଲ ନ ଥିଲା, କିନ୍ତୁ ସରକାର ସେ ରିପୋର୍ଟକୁ ସ୍ବୀକାର କରୁଥିଲେ। ଏବେ ବି ଭାରତ ବ୍ୟତୀତ ଅନ୍ୟ କୌଣସି ଦେଶ ଏହି ରିପୋର୍ଟକୁ ଅସ୍ବୀକାର କରୁଥିବାର ଶୁଣାଯାଇନାହଁି।
ଏତଦ୍‌ବ୍ୟତୀତ ୨୪ ଏପ୍ରିଲ୍‌ ୨୦୨୨ରେ ପ୍ରକାଶିତ ୟୁନାଇଟେଡ୍‌ ନେଶନ୍‌ସ ହାପିନେସ୍‌ ରିପୋର୍ଟରେ ଭାରତର ସ୍ଥାନ ୧୪୬ଟି ଦେଶ ମଧ୍ୟରୁ ୧୩୬। ଅର୍ଥାତ୍‌ ସାରା ବିଶ୍ୱର ମାତ୍ର ଦଶଟି ଦେଶ ଭାରତ ତଳେ ଅଛନ୍ତି। ହାପିନେସ୍‌ ଅର୍ଥାତ୍‌ ଖୁସିର ରହିବାରେ ମଧ୍ୟ ଭାରତ ତଳଆଡୁ ଦଶମ ସ୍ଥାନରେ ଅଛି। ଜନସାଧାରଣଙ୍କ ଶାନ୍ତିରେ ସହାବସ୍ଥାନକୁ ନେଇ ଇଣ୍ଟରନ୍ୟାଶନାଲ ଥିଙ୍କ୍‌ ଟ୍ୟାଙ୍କ୍‌ ଓ ଇନଷ୍ଟିଚ୍ୟୁଟ୍‌ ଅଫ୍‌ ଇକୋନିମିକ୍‌ ଆଣ୍ଡ ପିସ୍‌ ଦ୍ୱାରା ପ୍ରତିବର୍ଷ ଏକ ଗ୍ଲୋବାଲ୍‌ ପିସ୍‌ ଇଣ୍ଡେକ୍ସ ପ୍ରକାଶିତ ହୋଇଥାଏ। ୨୦୨୨ର ଗ୍ଲୋବାଲ୍‌ ପିସ୍‌ ଇଣ୍ଡେକ୍ସରେ ୧୬୩ଟି ଦେଶ ମଧ୍ୟରୁ ଭାରତର ସ୍ଥାନ ୧୩୫। ୨୦୨୧ ତୁଳନାରେ ଭାରତ ତିନୋଟି ସ୍ଥାନ ଉପରକୁ ଉଠିଥିଲା ବୋଲି ଗଣମାଧ୍ୟମଗୁଡ଼ିକ ଏହାକୁ ଟିକେ ପ୍ରଚାର କରିଥିଲେ ଓ ସରକାର ବି ଏହି ରିପୋର୍ଟ ପ୍ରତି ଆକ୍ଷେପ କରିଥିବାର ଶୁଣାଯାଇ ନାହଁି। କମିଟ୍‌ମେଣ୍ଟ ଟୁ ରିଡ଼୍ୟୁସ୍‌ ଇନ୍‌ଇକ୍ୱାଲିଟି ଇଣ୍ଡେକ୍ସ-୨୦୨୨ଅର୍ଥାତ୍‌ ଅସମାନତା ହ୍ରାସକରିବା ନିମନ୍ତେ ସଙ୍କଳ୍ପବଦ୍ଧତା ସୂଚକାଙ୍କ-୨୦୨୨ ଅନୁସାରେ ୧୬୧ଟି ଦେଶ ମଧ୍ୟରେ ଭାରତର ସ୍ଥାନ ୧୨୩। ପ୍ୟାରିସ୍‌ ସ୍ଥିତ ୱାଲର୍‌ଡ ଇନ୍‌ଇକ୍ୱାଲିଟି ଲାବ୍‌ ଦ୍ୱାରା ଏହି ରିପୋର୍ଟ ପ୍ରସ୍ତୁତ ହୋଇଥାଏ। ଏହା ଅନୁଯାୟୀ ଭାରତ ସର୍ବାଧିକ ଅସମାନତା ଦେଶ। ଭାରତର ୧ ପ୍ରତିଶତ ଧନୀଙ୍କ ପାଖରେ ସମୁଦାୟ ରାଷ୍ଟ୍ରୀୟ ରୋଜଗାରର ପାଞ୍ଚ ଭାଗରୁ ଭାଗେ ସମ୍ପଦ ଗଚ୍ଛିତ ଅଛି। ଧନୀମାନଙ୍କ ପାଖରେ ହଁି ଦେଶର ସିଂହଭାଗ ସମ୍ପଦ ଠୁଳ ହୋଇଛି। ବିଶ୍ୱ ଅସମାନତା ରିପୋର୍ଟରେ ଭାରତର ସ୍ଥାନ ସମଗ୍ର ବିଶ୍ୱରେ ପ୍ରଥମ। ଅର୍ଥାତ୍‌ ଆମ ଦେଶରେ ବିସମତା ସର୍ବାଧିକ। ସମ୍ପ୍ରତି ସରକାରଙ୍କ ନୀତି ମଧ୍ୟ ଏହି ଅସମାନତାକୁ ଅଧିକରୁ ଅଧିକ ବଢ଼େଇ ଚାଲିଛି। ଧନୀମାନେ ଅଧିକ ଧନୀ ହେଉଥିବା ବେଳେ ଗରିବମାନେ ଅଧିକ ଗରିବ ହେଉଛନ୍ତି। ସମ୍ପ୍ରତି ଆମ ଦେଶର ସରକାରଙ୍କ ଆଶୀର୍ବାଦ ପ୍ରାପ୍ତ ଜଣେ ଧନୀକ ବିଶ୍ୱର ପ୍ରଥମ ତିନିଜଣ ଧନୀ ତାଲିକାରେ ସାମିଲ ହୋଇଛନ୍ତି। ଠିକ୍‌ ସେହି ସମୟରେ ଆମ ଦେଶ ବିଶ୍ୱ କ୍ଷୁଧା ସୂଚକାଙ୍କରେ ଛଅଟି ସ୍ଥାନ ତଳକୁ ଖସିଛି। ଏହାଠାରୁ ବଳି ଦୁର୍ଭାଗ୍ୟର ବିଷୟ ଆଉ କ’ଣ ଥାଇପାରେ! ରିପୋର୍ଟର୍ସ ୱିଦାଉଟ୍‌ ବର୍ଡର ଅନ଼ୁଷ୍ଠାନ ଦ୍ୱାରା ଏବେ ବିଂଶତମ ବିଶ୍ୱ ପ୍ରେସ୍‌ ସ୍ବାଧୀନତା ସୂଚକାଙ୍କ ପ୍ରକାଶିତ ହୋଇଛି। ସମଦାୟ ୧୮୦ଟି ଦେଶ ମଧ୍ୟରୁ ଭାରତର ସ୍ଥାନ ୧୫୦। ୨୦୨୧ରେ ଆମ ଦେଶ ଏହି ସୂଚକାଙ୍କରେ ୧୪୨ତମ ସ୍ଥାନରେ ଥିବା ବେଳେ ଚଳିତ ବର୍ଷ ଆଠଟି ସ୍ଥାନ ତଳକୁ ଖସି ୧୫୦ରେ ପହଞ୍ଚତ୍ଛି। ଏହି ଗୋଟିଏ ବର୍ଷ ମଧ୍ୟରେ ନେପାଳ ୩୦ ସ୍ଥାନ ଉପରକୁ ଉଠି ୭୬ତମ ସ୍ଥାନରେ ଅଛି। ପାକିସ୍ତାନ ୧୫୭ତମ ସ୍ଥାନରେ ଥିବା ବେଳେ ଶ୍ରୀଲଙ୍କା ଭାରତଠାରୁ ଭଲ ସ୍ଥିତିରେ ଅର୍ଥାତ୍‌ ୧୪୬ତମ ସ୍ଥାନରେ ଅଛି। ନର୍‌ୱେ ଓ ଡେନ୍‌ମାର୍କ ବିଶ୍ୱ ପ୍ରେସ୍‌ ସ୍ବାଧୀନତା ସୂଚକାଙ୍କରେ ଯଥାକ୍ରମେ ପ୍ରଥମ ଓ ଦ୍ୱିତୀୟ ସ୍ଥାନରେ ଅଛନ୍ତି। ଆମେ ଦେଖି ଆସୁଛେ ଯେ, ଆମ ଦେଶରେ ଗଣମାଧ୍ୟମର ସ୍ବାଧୀନତା ଆଦୌ ବି ନାହଁି କହିଲେ ଚଳିବ। ଅଧିକାଂଶ ଗଣମାଧ୍ୟମକୁ ସରକାର ନିଜ ସ୍ତୁତି ଗାନ କରିବା କାମରେ ଲଗେଇଛନ୍ତି। ସ୍ବାସ୍ଥ୍ୟ ଓ ଶିକ୍ଷାର ସୁବିଧା, ରୋଜଗାରର ସୁଯୋଗ ଆଦି ସହିତ ଲୋକମାନଙ୍କର ଉଚ୍ଚ ମାନର ଜୀବନଶୈଳୀକୁ ନେଇ ପ୍ରତିବର୍ଷ ମାନବ ବିକାଶ ସୂଚକାଙ୍କ ପ୍ରକାଶିତ ହୋଇଥାଏ। ମାନବ ବିକାଶ ସୂଚକାଙ୍କ ୨୦୨୧-୨୨ରେ ୧୯୧ଟି ଦେଶ ମଧ୍ୟରୁ ଭାରତ ୧୩୨ତମ ସ୍ଥାନରେ ଅଛି।
ଉପରୋକ୍ତ ଅନ୍ତର୍ଜାତୀୟ ରିପୋର୍ଟ ଓ ସୂଚକାଙ୍କଗୁଡ଼ିକୁ ଲକ୍ଷ୍ୟ କଲେ ଦେଖାଯାଉଛି ଯେ, ଭାରତ ନିୟମିତ ଭାବେ ତଳ ସ୍ଥାନରେ ଅଛି। ଏପରିକି ଏସିଆ ମହାଦେଶର ଛୋଟ ଛୋଟ ପଡ଼ୋଶୀ ଦେଶଗୁଡ଼ିକ ମଧ୍ୟ ଭାରତଠାରୁ ଭଲ ପରିସ୍ଥିତିରେ ଅଛନ୍ତି। ଏହା ହଁି ବାସ୍ତବ ସ୍ଥିତି। ଅନ୍ତର୍ଜାତୀୟ ସଂସ୍ଥାଗୁଡ଼ିକ ଭିନ୍ନ ଭିନ୍ନ ମାପକକୁ ନେଇ ଏହି ସବୁ ରିପୋର୍ଟ ପ୍ରକାଶ କରୁଛନ୍ତି। ଏକା ପ୍ରକାର ମାନକ ବିଶ୍ୱର ସମସ୍ତ ଦେଶ ପାଇଁ ବ୍ୟବହାର ହେଉଛି। ଏମିତି ନୁହେଁ ଯେ, ଭାରତ ପାଇଁ ଗୋଟିଏ ମାନକ ବ୍ୟବହାର ହେଉଛି ଓ ଅନ୍ୟ ଦେଶଗ଼ୁଡ଼ିକ ପାଇଁ ଅଲଗା ମାନକ ବ୍ୟବହାର ହେଉଛି। କିନ୍ତୁ ଆମ ଦେଶର ବର୍ତ୍ତମାନର ସରକାର ଏହି ନଗ୍ନ ସତ୍ୟକୁ ସ୍ବୀକାର କରି ପରିସ୍ଥିତିରେ ଉନ୍ନତି ପାଇଁ ଚେଷ୍ଟା ନ କରି ଗାଲୁଆଙ୍କ ବାରବାଟୀ ଚାଷ ପରି ରିପୋର୍ଟକୁ ପ୍ରତ୍ୟାଖ୍ୟାନ କରୁଛନ୍ତି ଓ ନିଜ ହାତରେ ଚଉଦ ପା’ ହେବା ପରି ନିଜକୁ ନିଜେ ବିଶ୍ୱଗୁରୁ ଘୋଷଣା କରୁଛନ୍ତି। ସୂଚନା ଯୋଗ୍ୟ ଯେ, ରିପୋର୍ଟକୁ ତଥା ବାସ୍ତବ ପରିସ୍ଥିତିକୁ ଅସ୍ବୀକାର କଲେ ପରିସ୍ଥିତି ଦୂରେଇ ଯିବ ନାହଁି। ଓଲଟି ସମୟକ୍ରମେ ପରିସ୍ଥିତି ଆହୁରି ଭୟାନକ ଭାବେ ଉଭା ହେବ। ଆମ ଦେଶ ଭାରତ ବର୍ତ୍ତମାନ ସେପରି ପରିସ୍ଥିତି ଦିଗରେ ଗତି କରୁଛି। ସରକାର ବର୍ତ୍ତମାନ ପ୍ରଚାର କରୁଛନ୍ତି ଯେ, ସାରା ବିଶ୍ୱ ଆମ ବିରୋଧରେ ଅଛି। ଅନ୍ତର୍ଜାତୀୟ ସଂସ୍ଥା ତଥା ରିପୋର୍ଟ ଭାରତ ବିରୋଧରେ ଷଡ଼ଯନ୍ତ୍ର କରି ଭାରତକୁ ଜାଣି ଜାଣି ତଳୁଆ ଦେଖାଉଛନ୍ତି। ଏହା ଏକ ପ୍ରକାର ମିଛ। ଏପରି କରି ସରକାର ଲୋକମାନଙ୍କର ମାନସିକତାକୁ ଗୋଟେ ନିବୁଜ କୂଅ ମଧ୍ୟରେ ରଖିବାର ପ୍ରୟାସ କରୁଛନ୍ତି ଓ ପ୍ରକାରାନ୍ତରେ ନିଜ ସ୍ବେଚ୍ଛାଚାରିତାର ଅଧ୍ୟାୟକୁ ଧୀରେ ଧୀରେ ପ୍ରତିଷ୍ଠା କରୁଛନ୍ତି।
ଭିରଙ୍ଗ, ତିରଣ, ଜଗତ୍‌ସିଂହପୁର
ମୋ- ୯୪୩୮୪୬୮୪୭୪


Enter your email to get our daily news in your inbox.

All Right Reserved By Dharitri.Com

ଅଲୌକିକ ଦେବତା

ଡ. ତ୍ରିନାଥ ପଟ୍ଟନାୟକ ଓଡ଼ିଆ ଜାତି ଓ ଉତ୍କଳୀୟ ସଂସ୍କୃତିର ଚିର ନମସ୍ୟ ଶ୍ରୀଜଗନ୍ନାଥ। କଳିଙ୍ଗ ସାଗର ଉପକୂଳରେ ଅବସ୍ଥିତ ନୀଳଶୈଳ ଉପରେ ଶ୍ରୀଜଗନ୍ନାଥଙ୍କ ସୁଦୃଶ୍ୟ...

ଏଇ ଭାରତରେ

ଶ୍ରାବଣ ମାସ ପାଖେଇ ଆସୁଥିବା ବେଳେ ଏହି ସମୟରେ ହଜାର ହଜାର ଶିବଭକ୍ତ କାଉଡି ଯାତ୍ରାରେ ବାହାରିବେ। କାଉଡିଆଙ୍କ ବିଶ୍ରାମ ପାଇଁ ପଥ ପାର୍ଶ୍ୱରେ ଠାଏ...

ଗାନ୍ଧୀଙ୍କ ଈଶ୍ୱର

ପ୍ରଖ୍ୟାତ ବୈଜ୍ଞାନିକ ନିଉଟନ ବିଶ୍ୱାସ କରୁଥିଲେ ଯେ ଏ ସମଗ୍ର ବିଶ୍ୱର ସୃଷ୍ଟି ଏକ ସଚେତନ ମହାଶକ୍ତି ଦ୍ୱାରା ସମ୍ଭବ ହୋଇଛି। ମାତ୍ର ତାଙ୍କର ଜଣେ...

ଦେଶଭକ୍ତିର ପରିଚୟ ଛୋଟ ପରିବାର

ସୟଦ୍‌ ସଫିର୍‌ ଅଲି ଗତ ୭୩ତମ ସ୍ବାଧୀନତା ଦିବସ ପାଳନ ଅବସରରେ ଲାଲକିଲ୍ଲାରୁ ପ୍ରଧାନମନ୍ତ୍ରୀ ମୋଦିଙ୍କ ଭାଷଣର ଏକ ପ୍ରମୁଖ ଅଂଶ ଥିଲା ଦେଶଭକ୍ତିର ପରିଚୟ...

ବିଜୁ ଆଦର୍ଶ ଏକ ଆହ୍ବାନ

ଡ. ଚନ୍ଦ୍ରକଳା ନାୟକ କେବଳ ଭାରତର ମୁକ୍ତି ସଂଗ୍ରାମ କାହିଁକି, ଇଣ୍ଡୋନେସିଆ ରାଷ୍ଟ୍ର ପାଇଁ ବିଜୁବାବୁଙ୍କର ଅବଦାନ ବି ଅତୁଳନୀୟ। ସେଠାରେ ଏହାର ପ୍ରତି ବଦଳରେ...

କରୋନା ସଂକ୍ରମଣ ଓ ସହରାଞ୍ଚଳ ପରିଚାଳନା

ଅମିତାଭ କାନ୍ତ ଓ ରିଚା ରଶ୍ମି ନୋଭେଲ କରୋନା ଭାଇରସ୍‌ (କୋଭିଡ-୧୯) ସଂକ୍ରମଣ ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଏବେ ଏହା ବିଶ୍ୱର ୧୦୦ରୁ...

ଏଇ ଭାରତରେ

ବେସାହାରା ଲୋକଙ୍କ ଲାଗି ଯୁବଶକ୍ତିକୁ କାର୍ଯ୍ୟରେ ଲଗାଇ ଅନ୍ୟମାନଙ୍କ ପାଇଁ ପ୍ରେରଣା ପାଲଟିଛନ୍ତି ଲକ୍ଷ୍ନୌର ଜଣେ ହୋଟେଲ ମାଲିକ ପରମ ସିଂ। ସେ ତାଙ୍କ ସାଙ୍ଗମାନଙ୍କ...

କେରଳ ରୋଲ ମଡେଲ

ଆକାର ପଟେଲ ଦେଶରେ ଲକ୍‌ଡାଉନ୍‌ ଲାଗୁକରି ୩୭,୦୦୦ ରୁ ୭୧,୦୦୦ କୋଭିଡଜନିତ ମୃତ୍ୟୁ ଟାଳି ଦେଇଛୁ ବୋଲି ସରକାର କହିଛନ୍ତି। ଯଦି ଦୁଇଟି ଲକ୍‌ଡାଉନ ଲାଗୁ...

Advertisement
Archives

Model This Week