ନବରଙ୍ଗପୁର,୨୨।୮(ବି.ପ୍ର.): ନାଟକୀୟ ଢଙ୍ଗରେ ଗଞ୍ଜେଇ ଚାଲାଣ ପାଇଁ ଅଟୋରିକ୍ସା ଲୁଟି ନେଇଥିଲେ ୫ ଜଣ ଅଭିଯୁକ୍ତ। ନବରଙ୍ଗପୁର ଆଦର୍ଶ ଥାନାରେ ମାମଲା ରୁଜୁ ପରେ ପୋଲିସ ତନାଘନା ଆରମ୍ଭ କରିଥିଲା। ଅଭିଯୁକ୍ତମାନେ ଚା ପିଇ ପେଟିଏମ୍ରେ ଟଙ୍କା ଦେଇଥିଲେ। ଏହି ସୁରାକ ପାଇ ନବରଙ୍ଗପୁର ପୋଲିସ ଖୋଳତାଡ଼ ଆରମ୍ଭ କରିଥିଲା। ସହରର ବିଭିନ୍ନ ସ୍ଥାନରେ ଲାଗିଥିବା ସିସି କ୍ୟାମେରା ଯାଞ୍ଚ କରି ପୋଲିସ ଜୟପୁର ସଦର ଥାନା ଅଧୀନ କବିରାଜ ଖିଲ ଓ ଯମୁନାଗୁଡା ଗଁାର ମୁନା ନାୟକଙ୍କୁ ନବରଙ୍ଗପୁର ପୋଲିସ ଗିରଫ କରିଛି। ସେମାନଙ୍କଠାରୁ ୨ଟି ମୋବାଇଲ ଓ ଗୋଟିଏ ବାଇକ୍ ଜବତ କରି ପୋଲିସ ରବିବାର ଅଭିଯୁକ୍ତଙ୍କୁ କୋର୍ଟଚାଲାଣ କରିଛି।
ଉଲ୍ଲେଖଯୋଗ୍ୟ, ଜୁଲାଇ ୨୪ରେ କୋରାପୁଟ ଜିଲା ବୈପାରିଗୁଡା ଥାନା ଅଧୀନ ବୋମେଲ ଗାଁର ଭୀମ ଗାଦବା ହରିଶ୍ଚନ୍ଦ୍ର ନାୟକଙ୍କ ସହ ଏକ ଅଟୋ (ଓଡି-୧୦ଏସ୍-୫୫୭୨)ରେ ଜୟପୁର ଆସିଥିଲେ। ହରିଶ୍ଚନ୍ଦ୍ର ଭୀମଙ୍କୁ କିଛି ନିଶା ସେବନ କରିବାକୁ ଦେବା ସହ ନବରଙ୍ଗପୁର ଯିବାକୁ କହିଥିଲେ। ଅଟୋ ମାଲିକ ଭୀମ ନିଶାସକ୍ତ ଅବସ୍ଥାରେ ଥିବାବେଳେ ହରିଶ୍ଚନ୍ଦ୍ର ନିଜ ସାଥୀ କବିରାଜ ଖିଲ, ମୁନା ନାୟକ, ରବି ନାୟକ, ସୁନଧର ହନ୍ତାଳଙ୍କୁ ଅଟୋ ଲୁଟ କରିବା ପାଇଁ ପୂର୍ବ ଯୋଜନା ଅନୁଯାୟୀ ଡାକିଥିଲେ। ବୋରିଗୁମ୍ମା ନିକଟରୁ କବିରାଜ, ମୁନା, ରବି, ସୁନାଧର ୨ଟି ବାଇକ୍ରେ ଅଟୋ ପଛରେ ନବରଙ୍ଗପୁର ପର୍ଯ୍ୟନ୍ତ ଆସିଥିଲେ। ନବରଙ୍ଗପୁର ବସଷ୍ଟାଣ୍ଡ ନିକଟରେ ଭୀମଙ୍କୁ ମାଡ଼ ମାରିବା ସହ କବିରାଜ ଓ ମୁନା ବାଇକ୍ରେ ତାଙ୍କୁ ପୋଡାଲଗୁଡା ରାସ୍ତା ଆଡ଼କୁ ନେଇ ମୋବାଇଲ, ପର୍ସ ଆଦି ଲୁଟି ନେଇଥିଲେ। ରବି, ହରିଶ୍ଚନ୍ଦ୍ର ଓ ସୁନାଧର ଅଟୋ ନେଇ ଚାଲି ଯାଇଥିଲେ। ଏହାପରେ ନୂଆବନ୍ଧ ସାହି ଛକ ପାଖରେ ଏକ ଦୋକାନରେ ଅଭିଯୁକ୍ତମାନେ ଚା’ ପିଇ ଅନ୍ଲାଇନ୍ରେ ଟଙ୍କା ଦେଇଥିଲେ। ୨୫ ତାରିଖରେ ଭୀମ ନବରଙ୍ଗପୁର ଥାନାରେ ଅଭିଯୋଗ କରିଥିଲେ। ପୋଲିସ ୩୫୨/୨୨ରେ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ୨୬ରେ କୋଷାଗୁମୁଡା ପୋଲିସ ଅଟୋରିକ୍ସାରେ ଗଞ୍ଜେଇ ଚାଲାଣ ସମୟରେ ୫ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ଚାଲାଣରେ ବ୍ୟବହୃତ ଅଟୋଟି ନବରଙ୍ଗପୁରରୁ ଲୁଟ ହୋଇଥିବା ନବରଙ୍ଗପୁର ପୋଲିସ ଖବର ପାଇଥିଲା। ଗଞ୍ଜେଇ ଚାଲାଣରେ ଗିରଫ ଅଭିଯୁକ୍ତଙ୍କ ମଧ୍ୟରେ ଅଟୋ ଲୁଟ୍ ଘଟଣାରେ ସମ୍ପୃକ୍ତ ଜୟପୁର ଇରିଗେଶନ କଲୋନୀର ରବି ନାୟକ, ବୈପାରିଗୁଡା ଥାନା ବୋମେଲ ଗାଁର ହରଶ୍ଚନ୍ଦ୍ର ନାୟକ, କଟ୍ରାଗୁଡାଗାଁର ସୁନାଧର ହନ୍ତାଳ ଅଛନ୍ତି ବୋଲି ନବରଙ୍ଗପୁର ଅତିରିକ୍ତ ଏସ୍ପି ଜୟକୃଷ୍ଣ ବେହେରା କହିଛନ୍ତି। ଅଭିଯୁକ୍ତମାନଙ୍କ ଗିରଫ ପରେ ନବରଙ୍ଗପୁର ପୋଲିସ ସିସିଟିଭି ଫୁଟେଜ ଆଧାରରେ ଯାଞ୍ଚ କରୁଥିଲା। ଅଭିଯୁକ୍ତମାନେ ଚା’ ପିଇ ଅନ୍ଲାଇନ୍ ଟାଞ୍ଜାକ୍ଶନ କରିଥିବା ଜାଣି ଉକ୍ତ ସୁରାକ ଆଧାରରେ ତଦନ୍ତ କରି କବିରାଜ ଓ ମୁନାଙ୍କୁ ପୋଲିସ ଧରିଛି। ନବରଙ୍ଗପୁର ଥାନାଧିକାରୀ ନରେଶ କୁମାର ପ୍ରଧାନଙ୍କ ତତ୍ତ୍ୱାବଧାନରେ ଏସ୍ଆଇ ଶବୀର ଅହମ୍ମଦ ଓ ଦେବାଶିଷ ସାହୁଙ୍କୁ ନେଇ ଗଠିତ ଟିମ୍ ଅଭିଯୁକ୍ତଙ୍କୁ ଧରିଛି।
