ଓ୍ବାଶିଂଟନ, ୨୩।୮: ଶିଶୁମାନଙ୍କ ଦ୍ୱାରା ଭୂତାଣୁ ସଂକ୍ରମଣ ହାର ଅଧିକ ଏବଂ ତାହା ସେମାନଙ୍କୁ ନୀରବ ସଂକ୍ରମଣକାରୀରେ ପରିଣତ କରିପାରେ ବୋଲି ନିକଟରେ ହୋଇଥିବା ଏକ ଅଧ୍ୟୟନରୁ ଜଣାପଡ଼ିଛି। ଆମେରିକାର କେତେକ ଅଞ୍ଚଳରେ ସ୍କୁଲ ଖୋଲିଥିବାବେଳେ କେତେଜଣ ପିଲାଙ୍କଠାରେ ଅଧିକ ମାତ୍ରାରେ ଭୂତାଣୁ ଥିବା ଜଣାପଡିଛି। ପ୍ରଥମ ତିନି ଦିନର ସଂକ୍ରମଣ ସତ୍ତ୍ୱେ ଏହି ପିଲାମାନଙ୍କଠାରେ ସାମାନ୍ୟ ଲକ୍ଷଣ ଦେଖାଯାଉଛି କିମ୍ବା ଆଦୌ ଲକ୍ଷଣ ନାହିଁ। ସେମାନଙ୍କ ଦ୍ୱାରା ଯେତିକି ସଂକ୍ରମଣ ହେବାର ପୂର୍ବରୁ ବିଶ୍ୱାସ କରାଯାଉଥିଲା ତାହାଠାରୁ ଯଥେଷ୍ଟ ଅଧିକ। ଏପରିକି ଗୋଷ୍ଠୀ ସଂକ୍ରମଣରେ ସେମାନଙ୍କର ଭୂମିକା ରହିପାରେ ବୋଲି ଗୁରୁବାର ପ୍ରକାଶିତ ଉକ୍ତ ଅଧ୍ୟୟନରେ କୁହାଯାଇଛି। ମାସ୍ ଜେନେରାଲ ହସ୍ପିଟାଲର ଶିଶୁ ରୋଗ ବିଭାଗ ଡାକ୍ତର ଆଲେସିଓ ଫାସାନୋଙ୍କ କହିବା ଅନୁଯାୟୀ ପିଲାଙ୍କ ଠାରେ ଲକ୍ଷଣ ଥିଲେ ମଧ୍ୟ ସେମାନେ କ୍ୱଚିତ୍ ଦେଖାଇଥାନ୍ତି। ଅଧିକାଂଶ ପ୍ରାରମ୍ଭିକ ପର୍ଯ୍ୟାୟରେ ଏହାକୁ ଅଣଦେଖା କରୁଥିବାରୁ ପରୀକ୍ଷା କରାଇ ନ ଥାନ୍ତି। ଫଳରେ ସେମାନେ ନୀରବ ସଂକ୍ରମଣକାରୀ ଭାବେ କାର୍ଯ୍ୟ କରିପାରନ୍ତି।
ପିଲାମାନେ ସୁରକ୍ଷିତ ବୋଲି କେତେଜଣ ବିଶ୍ୱାସ କରୁଥିବାବେଳେ ଏହା ସମ୍ପୂର୍ଣ୍ଣ ଭୁଲ୍ ବୋଲି ଫାସାନୋ କହିଛନ୍ତି। ପିଲା ଓ କରୋନା ଭୂତାଣୁ ସଂକ୍ରମଣ ଉପରେ ଏହି ଅଧ୍ୟୟନ ପେଡିଆଟ୍ରିକ୍ସ ପତ୍ରିକାରେ ପ୍ରକାଶ ପାଇଛି। ଜୁଲାଇ ୩୦ରେ ଜେଏଏମ୍ଏ ପେଡିଆଟ୍ରିକ୍ସରେ ପ୍ରକାଶିତ ତଥ୍ୟ ଅନୁଯାୟୀ ସାମାନ୍ୟ କିମ୍ବା ମଧ୍ୟମ ଧରଣର ଅସୁସ୍ଥ ୫ ବର୍ଷରୁ କମ୍ ପିଲାଙ୍କ ନାକରେ ବଡ଼ ପିଲା ଓ ବୟସ୍କଙ୍କ ତୁଳନାରେ ଅଧିକ ଭୂତାଣୁ ରହିଥାନ୍ତି। ଏହାର କିଛିଦିନ ପୂର୍ବରୁ ଦକ୍ଷିଣ କୋରିଆରେ ପ୍ରକାଶିତ ଏକ ଅଧ୍ୟୟନରେ ବିଶ୍ୱାସ କରାଯାଇଥିଲା ବଡ଼ ପିଲା ଓ ବୟସ୍କଙ୍କ ତୁଳନାରେ ଛୋଟ ପିଲା ଭୂତାଣୁର କମ୍ ସଂକ୍ରମଣ କରିଥାନ୍ତି। ତେବେ ଏହା ସ୍ପଷ୍ଟ ନୁହେଁ ବୋଲି ପରବର୍ତ୍ତୀ ଅନୁଧ୍ୟାନରୁ ଜଣାପଡିଥିଲା। ଉପରୋକ୍ତ ତିନୋଟି ଅଧ୍ୟୟନ ଛୋଟ ଏବଂ କେତେକ ତଥ୍ୟ ପରସ୍ପର ବିରୋଧୀ ହୋଇଥିଲେ ମଧ୍ୟ ମହାମାରୀ ସଂକ୍ରମଣରେ ପିଲାମାନଙ୍କ ଭୂମିକା ଚିନ୍ତାଜନକ ବୋଲି ସ୍ପଷ୍ଟ ହୋଇଛି।
