ବେଙ୍ଗାଲୁରୁ, ୨୧।୬: ପୁଣି ବଡ଼ ଦୁର୍ଘଟଣାରୁ ଅଳ୍ପକେ ବର୍ତ୍ତିଛି ବିମାନ। ଏୟାର ଇଣ୍ଡିଆ ପରେ ଇଣ୍ଡିଗୋ ବିମାନ ଦୁର୍ଘଟଣା ହେଉ ହେଉ ବର୍ତ୍ତି ଯାଇଛି। ଗୁଆହାଟୀରୁ ଚେନ୍ନାଇ ଅଭିମୁଖେ ଯାଉଥିବା ଇଣ୍ଡିଗୋ ବିମାନ (ଫ୍ଲାଇଟ ନମ୍ବର 6E-6764)ର ହଠାତ୍ ଅଧା ଆକାଶରେ ଇନ୍ଧନ ସରିଯାଇଥିଲା। ଯାହାପରେ ବିମାନଟିକୁ ବେଙ୍ଗାଲୁରୁର କେମ୍ପେଗୌଡ଼ା ଆନ୍ତର୍ଜାତୀୟ ବିମାନବନ୍ଦରରେ ଜରୁରୀ ଅବତରଣ କରିଛି। ଏହି ବିମାନରେ ପ୍ରାୟ ୧୬୮ ଜଣ ଯାତ୍ରୀ ଥିଲେ। ସୂଚନା ଅନୁଯାୟୀ, ବିମାନର ପାଇଲଟ ଇନ୍ଧନ ସ୍ତର ଅତ୍ୟନ୍ତ କମ ହେବା ଯୋଗୁଁ ‘ମେଡେ’ (ଜରୁରୀ ସଙ୍କେତ) କଲ ଜାରି କରିଥିଲେ।
ବିମାନଟି ଗୁଆହାଟୀରୁ ସଂଧ୍ୟା ୪:୪୦ରେ ଉଡ଼ାଣ କରି ଚେନ୍ନାଇରେ ରାତି ୭:୪୫ ସମୟରେ ଅବତରଣ କରିବାର ଥିଲା। କିନ୍ତୁ ଚେନ୍ନାଇ ବିମାନବନ୍ଦରରେ ଅବତରଣ ପୂର୍ବରୁ ଏକ ଅସ୍ଥିର ପହଞ୍ଚ (unstabilised approach) ଯୋଗୁଁ ପାଇଲଟ ଲ୍ୟାଣ୍ଡିଂ ପରିତ୍ୟାଗ କରି ‘ଗୋ ଆରାଉଣ୍ଡ’ ନିଷ୍ପତ୍ତି ନେଇଥିଲେ। ଏହା ପରେ ବିମାନରେ ଆବଶ୍ୟକ ମାତ୍ରାରୁ କମ ଇନ୍ଧନ ଥିବା ଜଣାପଡ଼ିଥିଲା। ବେଙ୍ଗାଲୁରୁ ବିମାନବନ୍ଦରଠାରୁ ପ୍ରାୟ ୩୫ ମାଇଲ ଦୂରରେ ଥାଇ ପାଇଲଟ ମେଡେ କଲ ଜାରି କରିଥିଲେ।
ଇଣ୍ଡିଗୋ ଏୟାରଲାଇନ୍ସ ଦାବି କରିଛି ଯେ ଚେନ୍ନାଇ ବିମାନବନ୍ଦରରେ ଟ୍ରାଫିକ ଜନିତ ସମସ୍ୟା ଯୋଗୁଁ ବିମାନଟି ବେଙ୍ଗାଲୁରୁକୁ ଡାଇଭର୍ଟ କରାଯାଇଥିଲା। କିନ୍ତୁ ଚେନ୍ନାଇ ଏୟାର ଟ୍ରାଫିକ କଣ୍ଟ୍ରୋଲ (ATC) ଏହି ଦାବିକୁ ଖଣ୍ଡନ କରିଛି। ସୂତ୍ରରୁ ଜଣାପଡ଼ିଛି ଯେ ବିମାନରେ ବିକଳ୍ପ ବିମାନବନ୍ଦରକୁ ଯିବା ପାଇଁ ଆବଶ୍ୟକ ନ୍ୟୂନତମ ଇନ୍ଧନ ମଧ୍ୟ ନ ଥିଲା।
ବେଙ୍ଗାଲୁରୁରେ ସୁରକ୍ଷିତ ଅବତରଣ ପରେ ବିମାନଟିରେ ଇନ୍ଧନ ପୂରଣ କରାଯାଇଥିଲା ଏବଂ ଏହା କିଛି ବିଳମ୍ବ ପରେ ଚେନ୍ନାଇ ଅଭିମୁଖେ ଯାତ୍ରା କରିବାର ଥିଲା। ଯାତ୍ରୀମାନେ ଏହି ଘଟଣାରେ ଭୟଭୀତ ହୋଇଥିଲେ, କିନ୍ତୁ ସମସ୍ତେ ସୁରକ୍ଷିତ ଥିବା ଜଣାପଡ଼ିଛି। ଏହି ଘଟଣା ବିମାନ ଚଳାଚଳରେ ଇନ୍ଧନ ପରିଚାଳନା ଏବଂ ସୁରକ୍ଷା ପ୍ରୋଟୋକଲର ଗୁରୁତ୍ୱକୁ ପୁନର୍ବାର ଆଲୋକପାତ କରିଛି। ନିୟନ୍ତ୍ରଣ କର୍ତ୍ତୃପକ୍ଷ ଏହି ଘଟଣାର ତଦନ୍ତ କରିବେ ଏବଂ ଭବିଷ୍ୟତରେ ଏପରି ଘଟଣା ରୋକିବା ପାଇଁ କଡ଼ା ନିର୍ଦ୍ଦେଶାବଳୀ ଜାରି କରିପାରନ୍ତି।
