ନୂଆଦିଲ୍ଲୀ, ୨ା୯:ସର୍ଭିକାଲ୍ କ୍ୟାନ୍ସର ବା ଜରାୟୁ କର୍କଟ ପାଇଁ ଦେଶରେ ପ୍ରଥମ କରି ସ୍ବଦେଶୀ ଜ୍ଞାନକୌଶଳରେ ପ୍ରତିଷେଧକ ଟିକା ପ୍ରସ୍ତୁତ ହୋଇଛି। ସିରମ୍ ଇନ୍ଷ୍ଟିଚ୍ୟୁଟ୍ ଅଫ୍ ଇଣ୍ଡିଆ (ଏସ୍ଆଇଆଇ) ସର୍ଭାଭାକ୍ ଭାକ୍ସିନ ଆଣିଥିବାବେଳେ ଏହାର ତୃତୀୟ ପର୍ଯ୍ୟାୟ ପରୀକ୍ଷଣ ଶେଷ ହୋଇଛି। ଚଳିତ ବର୍ଷ ଶେଷ ସୁଦ୍ଧା ଏହି ଟିକା ବଜାରରେ ଉପଲବ୍ଧ ହେବ। ଏହାର ମୂଲ୍ୟ ଡୋଜ୍ ପିଛା ୨୦୦ରୁ ୪୦୦ ଟଙ୍କା ମଧ୍ୟରେ ରହିବ ବୋଲି ସିରମ୍ ଇନ୍ଷ୍ଟିଚ୍ୟୁଟ୍ ସିଇଓ ଅଦର ପୁନାଓ୍ବାଲା କହିଛନ୍ତି। ସାଧାରଣ ଲୋକଙ୍କ ନିକଟରେ ଏହାକୁ ସହଜରେ ଏବଂ କମ୍ ମୂଲ୍ୟରେ ପହଞ୍ଚାଇବା ପାଇଁ ସରକାର ସୁନିଶ୍ଚିତ କରିବେ ବୋଲି କେନ୍ଦ୍ର ବିଜ୍ଞାନ ଓ ପ୍ରଯୁକ୍ତିବିଦ୍ୟା ମନ୍ତ୍ରୀ ଡ. ଜିତେନ୍ଦ୍ର ସିଂ ସାଇଣ୍ଟିଫିକ୍ କମ୍ପ୍ଲିସନ୍ କାର୍ଯ୍ୟକ୍ରମରେ ଯୋଗଦେଇ କହିଛନ୍ତି।
କ୍ୱାଡ୍ରିଭାଲେଣ୍ଟ୍ ହୁମ୍ୟାନ ପାପିଲୋମାଭାଇରସ୍ (କ୍ୟୁଏଚ୍ପିଭି) ପାଇଁ ଉଦ୍ଦିଷ୍ଟ ଭାକ୍ସିନ ସର୍ଭାଭାକ୍ ପ୍ରଥମେ ସରକାରୀ ମାଧ୍ୟମରେ ଉପଲବ୍ଧ ହେବ। ପରେ ଏହାକୁ ଘରୋଇ ସହଯୋଗୀଙ୍କୁ ଯୋଗାଇ ଦିଆଯିବ। ଏହାର ଚୂଡ଼ାନ୍ତ ମୂଲ୍ୟ ନିର୍ଦ୍ଧାରଣ କରାଯାଇ ନ ଥିବାବେଳେ ଲୋକେ ୨ ଶହରୁ ୪ ଶହ ଟଙ୍କା ମଧ୍ୟରେ ଟିକା ପାଇପାରିବେ ବୋଲି ପୁନାଓ୍ବାଲା ଗୁରୁବାର ଉକ୍ତ ସାଇଣ୍ଟିଫିକ୍ କମ୍ପ୍ଲିସନ୍ କାର୍ଯ୍ୟକ୍ରମରେ ସୂଚନା ଦେଇଛନ୍ତି। ସାଇଣ୍ଟିଫିକ୍ କମ୍ପ୍ଲିସନ୍ ଅର୍ଥ ଭାକ୍ସିନ୍ ଉପରେ ଗବେଷଣା ଓ ଏହାର ପ୍ରସ୍ତୁତି ଶେଷ ହେବା। ପରବର୍ତ୍ତୀ ପର୍ଯ୍ୟାୟରେ ତାହାକୁ ଲୋକଙ୍କ ନିକଟରେ ପହଞ୍ଚାଯିବ। ପ୍ରଥମେ ଦେଶରେ ପର୍ଯ୍ୟାପ୍ତ ପରିମାଣର ଟିକା ଲୋକଙ୍କୁ ଦିଆଯିବ। ପରେ ଏହାକୁ ବିଦେଶ ପଠାଇବାକୁ ଯୋଜନା ରହିଛି। ଆଗାମୀ ୨ ବର୍ଷରେ ୨୦ କୋଟି ଡୋଜ୍ ପ୍ରଦାନ କରାଯିବ। ପ୍ରଥମେ ୧୦ରୁ ୧୪ ବର୍ଷର କିଶୋରୀଙ୍କୁ ଏହି ଟିକା ଦିଆଯିବାକୁ ଲକ୍ଷ୍ୟ ରହିଛି। ଗତ ଜୁଲାଇରେ ଡ୍ରଗ୍ସ କଣ୍ଟ୍ରୋଲର ଜେନେରାଲ ଅଫ୍ ଇଣ୍ଡିଆ (ଡିସିଜିଆଇ) କ୍ୟୁଏଚ୍ପିଭି ଟିକା ସର୍ଭାଭାକ୍ ପ୍ରସ୍ତୁତ ନିମନ୍ତେ ଏସ୍ଆଇଆଇକୁ ବଜାର ସ୍ବୀକୃତି ଦେଇଥିଲା। ୨ ହଜାରରୁ ଊର୍ଦ୍ଧ୍ୱ ସ୍ବେଚ୍ଛାସେବୀଙ୍କଠାରେ ଭାକ୍ସିନ୍ର ପରୀକ୍ଷଣ କରାଯାଇଥିବା ବାୟୋଟେକ୍ନୋଲୋଜି ବିଭାଗ ସଚିବ ରାଜେଶ ଗୋଖଲେ କହିଛନ୍ତି। ସବୁ ବର୍ଗର ମହିଳାଙ୍କ କ୍ଷେତ୍ରରେ ଏହି ଟ୍ରାଏଲ ସଫଳ ହୋଇଛି।
ମହିଳାମାନଙ୍କ ସର୍ଭିକ୍ସ ବା ଗର୍ଭାଶୟ ଗ୍ରୀବାରେ ଜରାୟୁ କର୍କଟ ହୋଇଥାଏ। ପ୍ରାୟ ସମସ୍ତ ମହିଳା ସର୍ଭିକାଲ କର୍କଟରେ ଆକ୍ରାନ୍ତ ହେବାର ଆଶଙ୍କା ରହିଛି। ବିଶେଷକରି ୧୫ରୁ ୪୪ ବର୍ଷୀୟା ଏଥିରେ ପୀଡ଼ିତ ହୋଇଥାନ୍ତି। ତେବେ ୩୦ ବର୍ଷରୁ ଊର୍ଦ୍ଧ୍ୱ ବୟସ୍କାଙ୍କ କ୍ଷେତ୍ରରେ ସର୍ଭିକାଲ କ୍ୟାନ୍ସର ଆଶଙ୍କା ଅଧିକ ରହିଥାଏ। ଦୀର୍ଘଦିନ ଧରି ହ୍ୟୁମାନ ପାପିଲୋମାଭାଇରସ୍ ସଂକ୍ରମଣ ଲାଗି ରହିଲେ ଜଣେ ସହଜରେ ଏଥିରେ ଆକ୍ରାନ୍ତ ହୋଇଥାନ୍ତି। ବିଶ୍ୱ ସ୍ବାସ୍ଥ୍ୟ ସଙ୍ଗଠନ (ଡବ୍ଲ୍ୟୁଏଚ୍ଓ) ତଥ୍ୟ ଅନୁସାରେ ୨୦୧୯ଠାରୁ ଅଦ୍ୟାବଧି ଭାରତରେ ପ୍ରାୟ ୪୨ ଲକ୍ଷ ମହିଳା ସର୍ଭିକାଲ କ୍ୟାନ୍ସରରେ ପ୍ରାଣ ହରାଇଛନ୍ତି। ମୋଟ କ୍ୟାନ୍ସର ପୀଡ଼ିତାଙ୍କ ମଧ୍ୟରେ ଜରାୟୁ କର୍କଟରେ ଆକ୍ରାନ୍ତଙ୍କ ସଂଖ୍ୟା ଦେଶରେ ଦ୍ୱିତୀୟ ସର୍ବାଧିକ। ସଚେତତନା ଅଭାବରୁ ମହିଳାମାନେ ଏହି ରୋଗକୁ ପ୍ରଥମ ପର୍ଯ୍ୟାୟରେ ଜାଣିପାରି ନ ଥାନ୍ତି। ଫଳରେ ପ୍ରାୟ ୯୮% ମହିଳା ଶେଷ ଷ୍ଟେଜ୍ରେ ଚିକିତ୍ସା ପାଇଁ ଡାକ୍ତରଖାନା ଯାଇଥାନ୍ତି। ହେଲେ ବିଳମ୍ବ ଯୋଗୁ ସେମାନେ ଆରୋଗ୍ୟ ଲାଭ କରିବା ସମ୍ଭାବନା କ୍ଷୀଣ ହୋଇଯାଏ, ଯାହା କି ମୃତ୍ୟୁର କାରଣ ହୋଇଥାଏ। ବିଦେଶରେ ଏଥିପାଇଁ ପୂର୍ବରୁ ଟିକା ବାହାରିଥିଲେ ହେଁ ଏହାର ମୂଲ୍ୟ ଅତିକମ୍ରେ ୪ ହଜାର ଟଙ୍କାରୁ ଊର୍ଦ୍ଧ୍ୱ ରହିଛି।
