ଟୋକିଓ/ନୂଆଦିଲ୍ଲୀ,୩।୮: ଅଲିମ୍ପିକ ସେମିଫାଇନାଲରେ ଭାରତୀୟ ପୁରୁଷ ହକି ଦଳ ବେଲଜିୟମଠାରୁ ପରାଜିତ ହୋଇଛି। ଫଳରେ ଭାରତର ଗୋଲ୍ଡ ଏବଂ ସିଲିଭର୍ ପଦକ ଆଶା ଧୁଳିସାତ୍ ହୋଇଛି। ତେବେ ବ୍ରୋଞ୍ଜ ପଦକ ଆଶା ରହିଛି। ଏହି ମ୍ୟାଚରେ ଭାରତ ଦୁଇଟି ଗୋଲ ସ୍କୋର କରିଥିବାବେଳେ ବେଲଜିୟମ ପାଞ୍ଚଟି ଗୋଲ ସ୍କୋର କରି ଫାଇନାଲରେ ପ୍ରବେଶ କରିଛି। ଦ୍ୱିତୀୟ ସେମିଫାଇନାଲର ବିଜେତା ଫାଇନାଲରେ ଖେଳିବ, ହାରିଥିବା ଦଳ ବ୍ରୋଞ୍ଜ ପଦକ ପାଇଁ ଭାରତ ସହିତ ପ୍ରତିଦ୍ୱନ୍ଦ୍ୱିତା କରିବ।
ମ୍ୟାଚର ପ୍ରଥମ କ୍ୱାର୍ଟରରେ ବେଲଜିୟମର ଗୋଟିଏ ଗୋଲ ବିପକ୍ଷରେ ଭାରତୀୟ ଦଳ ଦୁଇଟି ଗୋଲ ଦେଇ ଅଗ୍ରଣୀ ହାସଲ କରିଥିଲା। କିନ୍ତୁ ଏହା ପରେ ବେଲଜିୟମ ଦଳ ଭାରତୀୟ ଦଳକୁ ସୁଯୋଗ ଦେଇ ନ ଥିଲା। ମ୍ୟାଚରେ ବେଲଜିୟମକୁ ୧୪ ପେନାଲ୍ଟି କର୍ନର ମିଳିଥିଲା । ଏଥିରୁ ବେଲଜିୟମ୍ ୩ଟି କର୍ନରକୁ ଗୋଲରେ ପରିଣତ କରିଥିଲା। ସେମିଫାଇନାଲ ମ୍ୟାଚର ଦ୍ୱିତୀୟ କ୍ୱାର୍ଟର ରୋମାଞ୍ଚକର ଥିଲା। ଏଥିରେ ଉଭୟ ଦଳ ପେନାଲ୍ଟି କର୍ନର ପାଇଥିଲେ। ଖେଳର ତୃତୀୟ କ୍ୱାର୍ଟରରେ ଭାରତୀୟ ଦଳକୁ ପଞ୍ଚମ ପେନାଲ୍ଟି କର୍ନର ମିଳିଥିଲା। ତେବେ ଦଳ ଏହାକୁ ଗୋଲରେ ପରିଣତ କରିପାରି ନ ଥିଲା। ମ୍ୟାଚର ଚତୁର୍ଥ କ୍ୱାର୍ଟରରେ ବେଲଜିୟମ ଏକ ପେନାଲ୍ଟି ଷ୍ଟ୍ରୋକ ପାଇଥିଲା ଏବଂ ଦଳର ଖେଳାଳି ହେଣ୍ଡ୍ରିକ୍ସ ଆଉ ଏକ ଗୋଲ ସ୍କୋର କରିଥିଲେ।
